قازاقستان ساياسي عىلىمدار قاۋىمداستىعى ۇيىمداستىرىپ وتىرعان Sailau Talks-2021 جوباسىنا ەمين اسكەروۆ, تالعات قاليەۆ, راسۋل جۇمالى, الەكساندر دانيلوۆ, داستان كوشەرباەۆ جانە ت.ب. ساراپشىلار قاتىستى.
ەۋرازيالىق ينتەگراتسيا ينستيتۋتى كوممۋنيكاتيۆتىك ءىس-شارالار جانە ۆيزۋالدى جوبالار ورتالىعىنىڭ جەتەكشىسى ارمان ەشمۇراتوۆتىڭ ايتۋىنشا بۇل جولعى سايلاۋدىڭ ەرەكشەلىگى – پروپورتسيونالدى پرينتسيپ ۇستانۋ.
"2021 جىلدان باستاپ قازاقستاندا دەپۋتاتتىققا پارتيا ءتىزىمى ارقىلى سايلانادى. ونىڭ ناتيجەسى قالاي بولاتىنىن كورە جاتارمىز. بۇرىن ءوزىم ماسليحاتقا سايلانعانمىن. ول كەزدە وكرۋگتەگى سايلاۋشىلارمەن تىعىز جۇمىس ىستەدىم. ال قازىر پارتيالىق تىزىمدەگىلەر قالاي جۇمىس ىستەگەنىن الەۋمەتتىك جەلىلەر ارقىلى كورۋگە بولادى. ولار كوپ جۇمىس اتقاردى. ءبىز ءار كانديداتتىڭ قانداي جۇمىس اتقارعانىن كورىپ وتىردىق. بولاشاقتا الەۋمەتتىك جەلىلەر ارقىلى ۇگىت-ناسيحات جۇمىستارىن جۇرگىزۋ شارالارى كوبەيە بەرەدى دەپ ويلايمىن. بۇل – وتە جاقسى. بۇل ايماقتىق سايلاۋ ءۇشىن – جاڭاشىلدىق. پارتيالىق سايلاۋالدى باعدارلامالار قالاي جۇزەگە اساتىنىن ۋاقىت كورسەتەدى", دەيدى ول.
سونداي-اق, قازاقستان ستراتەگيالىق زەرتتەۋلەر ينستيتۋتىنىڭ جەتەكشى عىلىمي قىزمەتكەرى الماس ارزىقۇلوۆ بۇرىنعى سايلاۋ مەن قازىرگى سايلاۋدىڭ ەرەكشەلىگىنە توقتالىپ ءوتتى.
"بۇرىن سايلاۋ كەزىندە ۇگىت-ناسيحات توبى ايماقتارعا شىعىپ, ۇلكەن زالداردا ءارتۇرلى ۇجىممەن كەزدەسەتىن. پاندەمياعا بايلانىستى ول شارالار قىسقاردى, بىراق بارىنشا الەۋمەتتىك اراقاشىقتىقتى ساقتاي وتىرىپ, ازداعان اداممەن كەزدەسۋلەر بولدى. بۇرىننان بار ءۇش پارتيا جەرگىلىكتى جەرلەردە ءوز جۇمىسىن جۇرگىزدى, ال كەيىن قوسىلعان پارتيالار جەرگىلىكتى جەرلەردە وكىلدەرىنىڭ از بولۋىنا بايلانىستى ولاردىڭ جۇمىسىن ورتالىقتان بارعان توپتار جۇرگىزدى", دەدى ارمان ەشمۇراتوۆ.
