وسىعان وراي جاڭادان قۇرىلعان تۇركىستان وبلىسىنىڭ تۇرعىندارى مەن اۆتوكولىكتەردىڭ ءجۇرىپ-تۇرۋىنا قولايلى بولۋى ءۇشىن بارلىق جاعداي جاسالىپ وتىر.
جول بويىنا سوڭعى ۇلگىدەگى بەينەباقىلاۋ كامەرالارى ورناتىلۋدا.
مۇنداعى باستى ماقسات – جول قوزعالىسى ەرەجەسىنىڭ بۇزىلۋىنا جول بەرمەۋ, جول-كولىك وقيعاسىنىڭ سانىن ازايتۋ.
وسى باعىتتا تۇركىستان قالاسىنىڭ كولىك كوپ جۇرەتىن ورىندارىندا 10 «سەرگەك» اۆتوماتتى قۇرىلعىسى ورنالاستىرىلىپ, 5 قاڭتاردان باستاپ ءوز قىزمەتىن اتقارۋدا.
ناقتىراق ايتساق, تاۋكە حان كوشەسىندە – 3, س.قوجانوۆ كوشەسىندە – 2 «سەرگەك» بەينەباقىلاۋ كامەراسى قويىلعان. ال بايبۇرت, ب.ساتتارحانوۆ, قازىبەك بي كوشەلەرىندە, قىزىلوردا تاسجولى بويىندا, قازاقستانعا 30 جىل داڭعىلىنا ءبىر دانادان ورناتىلدى.
تۇركىستان وبلىسى پد اكىمشىلىك پوليتسيا باسقارماسى باستىعىنىڭ ورىنباسارى پوليتسيا پولكوۆنيگى عالىمجان ەسىموۆتىڭ ايتۋىنشا, بۇل قۇرىلعىنى ورناتۋدىڭ نەگىزگى سەبەبى – قاۋىپسىزدىكتىڭ بارىنشا جوعارى دەڭگەيىن قامتاماسىز ەتۋ جانە قۇقىق بۇزۋشىلىقتاردى اۆتوماتتى تۇردە فوتوبەينەتىركەۋ جۇيەلەرىنە ەنگىزۋ.
«سەرگەك كامەرالارى رۇقساتتى جىلدامدىقتى ارتتىرۋ, قىزىلعا ءوتۋ, جول بەلگىلەرى مەن جولاقتارىنىڭ تالاپتارىن بۇزۋ, رۇقسات ەتىلمەگەن جەردە توقتاۋ مەن تۇرۋ جانە اۆتوبۋس جولاعىمەن ءجۇرۋ سياقتى ەرەجە بۇزۋشىلىقتاردى تىركەپ, كولىك يەسىنە ايىپپۇل جازىپ بەرە الادى. ماسەلەن, وسى «سەرگەك» قۇرىلعىسى ورناتىلعان 2 كۇننىڭ ىشىندە جىلدامدىقتى اسىرۋ بويىنشا 25 اكىمشىلىك قۇقىق بۇزۋشىلىق انىقتالىپ, جۇرگىزۋشىلەرگە 500 000 تەڭگەگە جۋىق ايىپپۇل سالىنعان. جالپى ايتا كەتەتىن جايت, جول اپاتى سالدارىنان 2020 جىلى قازا تاپقاندار سانى وتكەن جىلمەن سالىستىرعاندا 46 پايىزعا ازايعان.
ال, جاراقات العاندار 115-تەن 82-گە كەمىگەن. كورسەتكىشتەردىڭ بۇلاي تومەندەۋىنە وسى ورناتىلىپ جاتقان بەينەباقىلاۋ كامەرالارىنىڭ دا سەپتىگى ءتيىپ وتىر. سوندىقتان ءبىرىنشى كەزەكتە ءوزىڭىز بەن وزگە دە جۇرگىزۋشى, جولاۋشىلاردىڭ ءومىرى ءۇشىن جول ەرەجەلەرىن ساقتاپ ءجۇرىڭىز. اسىقپاڭىز, جىلدامدىقتى اسىرماڭىز», دەپ اتاپ ءوتتى ول.
