تەكسەرۋشىلەردىڭ ايتۋىنشا, سانيتارلىق-ەپيدەميولوگيالىق باقىلاۋ ورگاندارىمەن بىرلەسىپ كارانتين رەجيمىن قاساقانا بۇزۋشىلارعا قاتىستى ءتيىمدى شارالار قابىلداۋ ماقساتىندا جينالعان ماتەريالدار اكىمشىلىك سوتقا جىبەرىلەدى. بۇل نىساننىڭ جۇمىسىن توقتاتۋ ءۇشىن جاسالىنىپ وتىر.
مىسالى, اكىمشىلىك سوت «Alanya» تۇنگى كلۋبىنىڭ قىزمەتىن 3 ايعا توقتاتتى جانە 100 اەك مولشەرىندە ايىپپۇل سالدى,«Janym Sol» كاراوكە-بارى, «زولوتو» مەيرامحاناسى جانە «Tequila كافە-بارى ءبىر اي جۇمىس ىستەمەيدى, سونداي-اق 70 اەك مولشەرىندە ايىپپۇل تولەۋ مىندەتتەلدى.
«كارانتيندىك شارالاردى قاساقانا بۇزعانى ءۇشىن ەلوردانىڭ بىرقاتار تۇنگى كلۋبى مەن قوعامدىق تاماقتانۋ نىساندارىنا قاتىستى تاعى سەگىز ماتەريال سوت قاراۋىندا جاتىر. بۇرىن اتالعان سۋبەكتىلەرگە زاڭ بۇزۋشىلىقتى توقتاتۋ تۋرالى ۇيعارىمدار بەرىلگەن. قۇقىق بۇزۋشىلارعا قاتىستى قىزمەتتى توقتاتا تۇرۋ تۋرالى سوت اكتىسى ورىندالماعان جاعدايدا اكىمشىلىك قاماۋعا الۋ شارالارى قابىلدانادى», دەپ حابارلادى ۆەدومستۆوارالىق كوميسسيا.
شوب نىساندارى بۇقارالىق ءىس-شارالاردى وتكىزۋ, جۇمىس رەجيمىن, كەلۋشىلەردىڭ بەلگىلەنگەن سانىن (30-دان استام), قىزمەتكەرلەردىڭ (داياشىلار, ساتۋشىلار) بەتپەردە رەجيمىن ساقتاماۋى سىندى زاڭبۇزۋشىلىقتارعا ءجيى جول بەرەدى. سول سياقتى ويىن-ساۋىق ورىندارىنىڭ جۇمىسىنا تىيىم سالۋدى ەلەمەۋ جاتادى.
ەلوردانىڭ سانيتارلىق-ەپيدەميولوگيالىق باقىلاۋ دەپارتامەنتىنىڭ اقپاراتىنا سايكەس, وتكەن جىلدىڭ 5 شىلدەسىنەن 31 جەلتوقسانىنا دەيىن شەكتەۋ جانە كارانتين شارالارىن بۇزعانى ءۇشىن 1 454 جەكە, لاۋازىمدى جانە زاڭدى تۇلعالار جالپى سوماسى 283 616 250 تەڭگەگە اكىمشىلىك جاۋاپكەرشىلىككە تارتىلدى.
قازىرگى ۋاقىتتا جالپى سوماسى 190 901 215 تەڭگە بولاتىن 1 015 اكىمشىلىك ايىپپۇل وتەلدى.
