– قالامىزعا ءار بەرەر ايشىقتى نىساندار قاتارى ايبىندى تۋتۇعىر الاڭىمەن تولىقتى. كوك بايراعىمىز كوكپەن ۇشتاستى. ءوز داۋىرىندە داڭقتى بابالارىمىز ءبورلى بايراق ۇستاپ, باعانالى وردا قۇرعان. سوندىقتان تۋ ءبىز ءۇشىن – قانىمىزدا قايناعان نامىس, رۋحتى كوتەرەتىن قۇدىرەت. اتامەكەنىمىزدىڭ تورىنە الىپ تۋ تىگۋ – ءبىز ءۇشىن اسقان ابىروي, زور مارتەبە. قالامىزدىڭ كوركىن اشقان بايراعىمىز ەلىمىزدىڭ ايبىنىن اسقاقتاتا تۇسەرىنە سەنەمىن, – دەيدى اتىراۋ وبلىسىنىڭ اكىمى ماحامبەت دوسمۇحامبەتوۆ.
تۋ ورناتىلعان تۇعىردىڭ بيىكتىگى – 91 مەتر. الىپ تۋدىڭ بولاتتان جاسالعان كونۋستىق تىرەگى بار. ۇزىندىعى 80 مەترلىك تۋتۇعىر كومپوزيتسياسى سۋبۇرقاق پەن دوعا ءپىشىندى ەركەرلىك كومپوزيتسيادان تۇرادى. كومپوزيتسيانىڭ ورتا تۇسىندا قازاقستان رەسپۋبليكاسىنىڭ كارتاسى, جوعارعى جاعىندا ەلتاڭبا, ال شەتكى بولىگىندە ءانۇران جازىلعان. كونۋس ءپىشىندى تۇعىرعا كولەمى 29ح14,5 مەتر بولاتىن تۋ ءىلىندى. ەندى ەلىمىزدىڭ مەملەكەتتىك رامىزدەرى ورنالاسقان الاڭدا ماڭىزدى سالتاناتتى شارالار وتەتىن بولادى.
بۇل نىساننىڭ قۇرىلىسى «تەڭىزشەۆرويل» جشس دەمەۋشىلىگىمەن بوي كوتەردى. كومپانيا باسشىسى يمەر بوننەر «مىقتىلىق, مولشىلىق پەن بەيبىتشىلىك, سونداي-اق 2021 جىلدىڭ جاقسىلىعى كوپ بولسىن. وسىناۋ ەڭسەلى تۇعىرداعى تۋ ۇدايى بيىكتە جەلبىرەپ تۇرسىن», دەپ قازاق ەلىنە ىزگى تىلەگىن ءبىلدىردى.
«كاستادور» جشس-ءنىڭ جوبا مەنەدجەرى ەدۆارد ءيلدىڭ ايتۋىنشا, قۇرىلىس كەزىندە ساپانى باقىلاۋ شارالارى كۇشەيتىلىپتى. تۋ ورناتىلعان تۇعىردى شەتەلدەن كەلگەن بىرنەشە مامان قايتا تەكسەرىپ شىققان. سونداي-اق اقش-تىڭ ينجەنەرلەرى تۇعىردىڭ كومپيۋتەرلىك مودەلىن جاساپ, ءوڭىردىڭ اۋا رايىنا, اتموسفەرا مەن جەلدىڭ جىلدامدىعىنا قاتىستى توزىمدىلىگىن سىناپتى. ءسويتىپ, ولار تەحنيكالىق قىزمەت كورسەتۋدىڭ ەڭ قاۋىپسىز نۇسقاسىن تاڭداپتى.
ەندى مونۋمەنتتىڭ اينالاسىنداعى 6500 شارشى مەتر الاڭعا بۇتالى 8500, قىلقان جاپىراقتى 44 جانە جاپىراقتى 70 كوشەت ەگىلەدى. مونۋمەنتكە ىرگەلەس اۋماق راۋشان گ ۇلىمەن بەزەندىرىلگەلى وتىر.
اتىراۋ وبلىسى
