ەرەجەدە جەر ۋچاسكەلەرىن يگەرۋ, ونىڭ ىشىندە بۇعان دەيىن الىنعان وڭ شەشىمدەر مەن رۇقسات قۇجاتتاردى دۇرىس پايدالانۋ قاراستىرىلعان.
ەرەجەنىڭ نەگىزگى تارماقتارى قالانى دامىتۋعا ارنالعان قالا قۇرىلىسى تالاپتارىن بەكىتۋگە باعىتتالاتىن بولادى. سونىمەن قاتار, تاريحي عيماراتتاردى ساقتاۋ جانە وسى ايماقتاردا قۇرىلىستى رەتكە كەلتىرۋ (ايماقتاندىرۋ) ماقساتىندا ەرەكشە قالا قۇرىلىسىن ايماعى بەلگىلەنەدى.
مۇندا تاريحي ورتالىقتىڭ شەكارالارىن انىقتاۋ ماڭىزدى. سونداي-اق, قالانىڭ باسقا اۋداندارىنداعى جەكەلەگەن ايماقتار دا ەرەجەدە قاراستىرىلعان مىسالى, ىقشاماۋداندار مەن تىنىش اۋداندار.
سونداي-اق, تاريحي ماڭىزى بار نىسانداردى انىقتاۋ دا قاراستىرىلعان, ولاردىڭ جانىنان كەز كەلگەن قۇرىلىستى جۇرگىزۋ قوعامدىق تالقىلاۋدان كەيىن عانا مۇمكىن بولادى.
قالا قۇرىلىسىن ەرەكشە رەتتەۋ ايماقتارىندا عيماراتتاردىڭ تىعىزدىعى مەن بيىكتىگى ەسكەرىلەدى. مىسالى, جاڭا عيماراتتىڭ بيىكتىگى ىرگەلەس سالىنعان نىساننان 1/3 بيىك بولماۋى ءتيىس. بۇدان وزگە, ەرەجەلەردە اەراتسيا رەجيمىن جاقسارتۋ, كوگالداندىرۋ, قالالىق ورتانى ساقتاۋ مەن جايلىلىعىن ارتتىرۋ تالاپتارى جازىلادى. تاريحي كەلبەتتى ساقتاۋ ءۇشىن عيماراتتار مەن قۇرىلىستاردىڭ قاسبەتتەرىنە قويىلاتىن تالاپتار دا ەسكەرىلەدى.
قالا تۇرعىندارىن, قوعام بەلسەندىلەر مەن ساراپشىلاردى كەڭىنەن تارتا وتىرىپ, قوعامدىق تالقىلاۋ وتكىزۋ تەتىكتەرىن ازىرلەۋ ماڭىزدى.
جۇرگىزىلگەن ساراپتامالار مەن تۇرعىنداردىڭ پىكىرىن جيناقتاۋ بارىسىندا تاريحي ورتالىق اۋماعىندا 36 جەر تەلىمىنىڭ جەكە مەنشىكتە ەكەنى انىقتالدى. بۇل ۋچاسكەلەر ەكى توپقا ءبولىندى: قۇرىلىس باستالعان جانە بوس جاتقان جەرلەر. 14 ۋچاسكەدە قۇرىلىس باستالعان, ونىڭ ىشىندە 3 نىساننىڭ قۇرىلىسى توقتاتىلدى ءارى رۇقسات قۇجاتتارى قايتارىلدى. تۇرعىنداردىڭ وتىنىشتەرى بويىنشا 11 نىسانعا ۇسىنىم بەرىلدى, مۇندا قوزعالىس سىزباسىن ۇيىمداستىرۋ, اباتتاندىرۋ, قاباتتار سانى جانە تاعى باسقا ماسەلەلەر ەسكەرىلمەك.
بوس جاتقان جەر تەلىمدەرى بويىنشا, ونىڭ ىشىندە 8 ۋچاسكەنى قايتارۋ (ساتىپ الۋ) قاراستىرىلۋدا, مۇندا اباتتاندىرىلعان جانە كوگالداندىرىلعان قوعامدىق كەڭىستىكتەر قۇرىلادى. 14 ۋچاسكەگە جاسىل جەلەكتەردى كەسۋگە تىيىم سالۋ, بۇرىننان بار نىسانداردى ەسكەرە وتىرىپ, قاباتتار سانىن جانە فۋنكتسيونالدى پايدالانۋدى ازايتۋ بويىنشا قالا قۇرىلىسىن جۇرگىزۋگە شەكتەۋ قويىلدى.
