قالا اكىمى ب. ساعىنتاەۆ «جاڭا الماتى» كەشەندى جوسپارى 2019 جىلى مەگاپوليس تۇرعىندارىمەن وتكەن كەزدەسۋلەردىڭ ناتيجەسى ەكەنىن ەسكە سالدى. ونىڭ باستى مىندەتى – قالانىڭ ورتالىعى مەن شەتىندەگى ايىرماشىلىقتى جويۋ. «جاڭا الماتى» كەشەندى دامۋ جوسپارىندا ينجەنەرلىك جانە جول-كولىك ينفراقۇرىلىمىن جاقسارتۋ, جارىقتاندىرۋ, الەۋمەتتىك نىسانداردى سالۋ جۇمىستارى قاراستىرىلعان جانە 2020-2024 جىلدارعا ەسەپتەلگەن.
جالپى, وسى جوسپار اياسىندا 350 شاقىرىم جول, 4 جول ايرىعى, 6 جولدى سوزۋ, 28 باعدارشام نىسانى, 55 جاياۋ جۇرگىنشى وتپەلى جولى جانە 8 جەر استى وتپەلى جولدارى سالىنادى. 194 گەكتار اۋماقتى كوگالداندىرۋ دا جوسپارلانعان.
ماسەلەن, ءوتىپ بارا جاتقان 2020 جىلى كەشەندى جوسپار اياسىندا 300 شاقىرىم سۋمەن جابدىقتاۋ جانە كارىز جەلىلەرى سالىندى. ناتيجەسىندە 50 مىڭ قالا تۇرعىنى سۋمەن جابدىقتاۋدىڭ جانە سۋدان بۇرۋدىڭ ورتالىقتاندىرىلعان جۇيەسىنە قوسىلدى. سونىمەن قاتار, قالا شەتىندەگى 965 كوشە جارىقتاندىرىلدى, 42,8 شاقىرىم جول سالىندى. قازىرگى كەزدە 4 ساياباق جانە 5 جاياۋ جۇرگىنشىلەر ايماقتارى اباتتاندىرىلۋدا.
2021 جىلى بارلىعى 35 الەۋمەتتىك نىساندى پايدالانۋعا بەرۋ جوسپارلانعان. سونىمەن قاتار, 8 مەكتەپ پەن 21,4 مىڭ ورىندى 17 قوسالقى نىسانداردىڭ قۇرىلىستارىن اياقتاۋ جوسپارلانۋدا.
دەنساۋلىق ساقتاۋ مەكەمەلەرىنە ەرەكشە نازار اۋدارىلاتىن بولادى. 2021 جىلى №7 قالالىق كلينيكالىق اۋرۋحانانىڭ جاڭا كورپۋسى (قوسالقى نىسان),قۋاتتىلىعى جىلىنا 80 مىڭ ناۋقاستى قابىلدايتىن اۋدانارالىق تۋبەركۋلەز ديسپانسەرى ىسكە قوسىلادى جانە №6 ەمحانانى كۇردەلى جوندەۋ جانە سەيسميكالىق كۇشەيتۋ جۇمىستارى اياقتالادى
بۇلاردان وزگە, بالالاردىڭ مەديتسينالىق جەدەل جاردەم ورتالىعىنىڭ قابىلداۋ ءبولىمىنىڭ جاڭا كورپۋسىن جانە وپەراتسيالىق بلوگىن سالۋ جوسپارلانۋدا. جەتىسۋ اۋدانىنىڭ «كەمەل» ىقشاماۋدانىندا 200 ادام قاتىنايتىن جانە تۇركسىب اۋدانىنىڭ «نۇرشاشقان» ىقشاماۋدانىندا 100 ادام قابىلدايتىن وتباسىلىق-دارىگەرلىك امبۋلاتوريالار سالۋ دا قاراستىرىلعان.
سونىمەن قاتار, كەلەر جىلدىڭ ءىى توقسانىندا الاتاۋ اۋدانىنىڭ ترۋدوۆيك ىقشاماۋدانىندا جەدەل الەۋمەتتىك كومەك پۋنكتىنىڭ قۇرىلىسى باستالادى.
كەلەر جىلى جەتىسۋ اۋدانىنداعى «اينابۇلاق-2», مەدەۋ اۋدانىنداعى «الاتاۋ», تۇركسىب اۋدانىنداعى «جاس-قانات», الاتاۋ اۋدانىنداعى «زەردەلى», جەتىسۋ اۋدانىنداعى «كەمەل» جانە «قۇلاگەر» ىقشاماۋداندارىندا 6 دەنەشىنىقتىرۋ-ساۋىقتىرۋ كەشەندەرىن سالۋ جوسپارلانۋدا.
كولىك ينفراقۇرىلىمى سالاسىندا الاتاۋ, ناۋرىزباي جانە تۇركسىب اۋداندارىنىڭ 7 ىقشاماۋداندارىنداعى 317 كوشەدە جالپى ۇزىندىعى 76 شاقىرىمنان اساتىن جاڭا جولداردىڭ قۇرىلىسى جالعاسادى. بۇل 60 مىڭ قالالىقتىڭ كولىككە قولجەتىمدىلىگىن جاقسارتادى.
بۇدان وزگە,جالپى ۇزىندىعى 200 شاقىرىم بولاتىن جولدار جەلىسىنىڭ جول جامىلعىسىن جوندەۋ جوسپارلانۋدا. جالپى قالا بويىنشا بارلىعى 30 شاقىرىمنان استام تروتۋارلار جوندەلەدى جانە اباتتاندىرىلادى, جالپى الاڭى 280 مىڭ شارشى مەتردەن اساتىن جول جامىلعىسىنا اعىمداعى جوندەۋ جۇمىستارى جۇرگىزىلەدى
كەلەر جىلدىڭ سوڭىنا دەيىن مەدەۋ اۋدانىنىڭ دۋمان ىقشاماۋدانىنداعى ۇزىندىعى 30,4 شاقىرىم بولاتىن 59 كوشەدەگى جولداردىڭ كۇردەلى جوندەۋ جۇمىستارى اياقتالادى. ءوتىپ بارا جاتقان جىلى ۇزىندىعى 3,7 شاقىرىم بولاتىن 6 كوشە جوندەلدى.
ينجەنەرلىك ينفراقۇرىلىمدى جاقسارتۋ اياسىندا قالانىڭ 7 اۋدانىندا سۋمەن جابدىقتاۋ جانە سۋدى بۇرۋ جەلىلەرىنىڭ قۇرىلىستارى جالعاسادى. كەلەر جىلى جالپى ۇزىندىعى 434 شاقىرىمنان اساتىن سۋمەن جابدىقتاۋ جانە سۋدان بۇرۋدىڭ 21 جوبالارىن اياقتاۋ جوسپارلانۋدا. سونداي-اق, 2021 جىلى 7 كارىزدىك- سورعى ستانتسيالارىنىڭ قۇرىلىسىن اياقتاۋ قاراستىرىلعان.
كەشەندى جوسپاردى جۇزەگە اسىرۋ بويىنشا جۇمىستار جالعاسۋدا.
