«بيىل پرەزيدەنت تاپسىرماسىمەن پەداگوگتەردىڭ جالاقىسى 25 پايىزعا ۇلعايتىلدى. سونىمەن بىرگە 2021 جىلى دا 1 قاڭتاردان باستاپ, پەداگوگتەر ايلىعى تاعى 25 پايىزعا كوبەيەدى. ءبىز مۇندا تەك قانا مەكتەپ مۇعالىمدەرىن ايتىپ وتىرعان جوقپىز, بالاباقشا پەداگوگتەرى, قوسىمشا ءبىلىم بەرۋ, كوللەدجدەر مەن جوعارى وقۋ ورىندارىنىڭ ماماندارى دا مەملەكەتتىك قولداۋ شارالارىمەن قامتىلىپ, ەڭبەكاقىلارى كوبەيىپ جاتىر», دەدى ءبىلىم ءمينيسترى.
مينيستر پەداگوگتەرگە بەرىلەتىن ءتۇرلى قوسىمشا تولەمدەر بار ەكەنىن دە ەسكە سالدى.
«بىلىكتىلىك ساناتىنا قاراي ەڭبەكاقىنىڭ 30-دان 50 پايىزعا دەيىنگى كولەمىن قوسىمشا الۋعا بولادى. ءوز ءىسىنىڭ شەبەرى بولسا, اي سايىن ەڭبەكاقىعا قوسىمشا 50 پايىز تولەم الىپ وتىرۋعا بولادى. ءپاندى اعىلشىن تىلىندە جۇرگىزگەنىنە, داپتەر تەكسەرگەنىنە جانە سىنىپ جەتەكشىلىگى ءۇشىن تولەنەدى. بيىل العاش رەت ارىپتەستەرىمىز ماگيسترلىك دارەجەسى ءۇشىن 27 مىڭ تەڭگە كولەمىندە قوسىمشا تولەم الا باستادى», دەپ تۇيىندەدى ۆەدومستۆو باسشىسى.
ەستەرىڭىزگە سالا كەتەيىك, بيىل 1 قىركۇيەكتەن باستاپ مەملەكەتتىك جوعارى وقۋ ورىندارى وقىتۋشىلارىنىڭ جالاقىسى تاعى 20%-عا, ال ۇلتتىق جوو وقىتۋشىلارىنىڭ جالاقىسى 28%-عا ۇلعايعان ەدى.
