نەمات كەلىمبەتوۆ اتىنداعى تۇركىتانۋ ورتالىعى ۇيىمداستىرعان ءىس-شاراعا قازاقستان, ازەربايجان, قىرعىزستان وزبەكستان جانە تۇركيا ەلدەرىنىڭ تۇركىتانۋشى عالىمدارى قاتىستى. ءىس-شارا بارىسىندا كونە تۇركى ءتىلى مەن ادەبيەتى ماسەلەلەرى تالقىلاندى.
ونلاين-كونفەرەنتسيانىڭ اشىلۋىندا اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ رەكتورى تاكير بالىقباەۆ, قر ستراتەگيالىق جوسپارلاۋ جانە رەفورمالار اگەنتتىگىنىڭ توراعاسى, «استانا» حالىقارالىق قارجى ورتالىعىنىڭ باسقارۋشىسى قايرات كەلىمبەتوۆ, تۇركيا مەملەكەتتىك Tۇرىك ءتىلى قوعامىنىڭ پرەزيدەنتى گۇرەر گۇلسەۆين مىرزالار قاتىسىپ, ءسوز سويلەدى.
ءىس-شارا بارىسىندا نەمات كەلىمبەتوۆ اتىنداعى تۇركىتانۋ ورتالىعىنىڭ عىلىمي قىزمەتكەرلەرى شەرۋباي قۇرمانباي ۇلى مەن مارلەن ءادىلوۆتىڭ «اباي ءتىلىنىڭ ەرەكشەلىكتەرى» جاڭا كىتابىنىڭ تۇساۋكەسەر ءراسىمى ءوتتى. كىتاپتا اباي شىعارمالارىنداعى قازىرگى قازاق ادەبي تىلىندە كەزدەسپەيتىن نەمەسە وتە سيرەك قولدانىلاتىن تىلدىك ەرەكشەلىكتەر مورفولوگيالىق, فونەتيكالىق جانە لەكسيكالىق ايىرماشىلىقتار تۇرعىسىنان قاراستىرىلعان.
حالىقارالىق جيىندا شاكىر ىبىراەۆ ف.ع.د., پروف. (قازاقستان); مەحمەت ولمەز پروف., دوكت. (تۇركيا); تاشپولوت سادىقوۆ ف.ع.د., پروف. (قىرعىزستان); تەمىرحان تەبەگەنوۆ ف.ع.د. پروف. (قازاقستان); جۋراقۋزيەۆ نوديربەك PhD دوكت., دوتس. (وزبەكستان); ەلچين يبراحيموۆ PhD دوكت., دوتس. (ازەربايجان) سىندى تۇركولوگ عالىمدار كونە تۇركى ءتىلى مەن ادەبيەتىنىڭ ماسەلەلەرىنە قاتىستى عىلىمي باياندامالار جاسادى.
