ەلوردادا وتكەن ورتالىق فورۋمعا قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان نازارباەۆ, نۇرسۇلتان نازارباەۆ قورىنىڭ ديرەكتورى داريعا نازارباەۆا, «ەل ءۇمىتى» جانە «قامقورلىق» باستامالارىنىڭ قامقورشىلار كەڭەسىنىڭ توراعاسى, پرەزيدەنتتىڭ كومەكشىسى - قازاقستان رەسپۋبليكاسى قاۋىپسىزدىك كەڭەسىنىڭ حاتشىسى اسەت يسەكەشەۆ قاتىستى.
فورۋمنىڭ باستى قاتىسۋشىلارى «ەل ءۇمىتى» باستاماسىنىڭ - «ەلباسى مەدالى» جوباسى, «ەل ماقتانىشى» سىيلىعى, اۋىل وقۋشىلارى اراسىندا وتكەن «مىڭ بالا» وليمپياداسىنىڭ جەڭىمپازدارى بولدى.
«تاۋەلسىزدىك جولىن جالعاستىرار ۇرپاق» فورۋمىن نۇرسۇلتان نازارباەۆ قورى ۇيىمداستىردى.
ەلباسى «قامقورلىق» باستاماسىن ىسكە اسىرۋدىڭ ماڭىزدىلىعىنا نازار اۋداردى.
«بۇگىنگى تاڭدا ەلىمىزدىڭ سەگىز وڭىرىندە اشىلعان اۋرۋحانالار جانىنداعى وڭالتۋ ورتالىقتارى مەن مەكتەپتەر جانىنداعى ينكليۋزيانى قولداۋ كابينەتتەرى ۇزدىك جابدىقتى پايدالانا وتىرىپ, جىل سايىن بەس مىڭ بالاعا تەگىن كەشەندى وڭالتۋ كورسەتۋگە مۇمكىندىك بەرەدى», دەدى نۇرسۇلتان نازارباەۆ.
«ەل ءۇمىتى» جانە «قامقورلىق» باستامالارىنىڭ جوبالارى ءىس جۇزىندە قوعامىمىزدىڭ قاجەتتىلىكتەرىنە تولىق سايكەس كەلەتىندىگىن دالەلدەدى. الدىن الا قورىتىندىلار بۇل باستامالاردىڭ ەلەۋلى ساياسي جانە الەۋمەتتىك اسەرىن كورسەتتى.
فورۋم سوڭىندا دامۋ ەرەكشەلىكتەرى بار بالالارعا ارنالعان 8 وڭالتۋ ورتالىعىنىڭ اشىلۋ ءراسىمى ءوتتى. ورتالىقتاردى قۇرۋدى نۇرسۇلتان نازارباەۆ قورى وڭىرلىك اكىمدىكتەرمەن بىرلەسىپ جۇزەگە اسىردى. «سامۇرىق – قازىنا» ۇاق» اق ورتالىقتاردى ارنايى جابدىقتارمەن قامتاماسىز ەتتى.
ءار ورتالىقتا 13-تەن استام كابينەت بار. ولار ەدت جانە مەحانوتەراپيا, بالنەوتەراپيا, ەرگوتەراپيا, فيزيوتەراپيا, لوگوپەديا, دەفەكتولوگيا, بكب تەراپيا زالدارى, شۋنگيتتى جانە تۇزدى بولمەلەر. وسىلايشا بۇل ورتالىقتار جىل سايىن دامۋ ەرەكشەلىكتەرى بار 5 مىڭ بالاعا كومەك كورسەتە الادى, وندا سانى 30-دان استام ءار ءتۇرلى كەشەندى قىزمەت تۇرلەرى تەگىن كورسەتىلەدى.
