ماعزۇم مىرزاعاليەۆ ءوزىنىڭ Twitter پاراقشاسىندا: "مەملەكەت باسشىسىنىڭ بوزجىرا شاتقالىندا قوناقۇي سالۋ جوباسىن قايتا قاراۋ تۋرالى تاپسىرماسىنا سايكەس, اقتاۋ قالاسىندا عالىمدارمەن, بيولوگتارمەن, شەتەلدىك ساراپشىلارمەن, جەرگىلىكتى ەكولبەلسەندىلەرمەن جانە قوعام قايراتكەرلەرىمەن كەزدەسۋ وتكىزدىك. بارلىعى تۋريستىك نىسان تۇرعىزۋ ءوڭىر ءۇشىن اسا ماڭىزدى دەگەن ورتاق وي ايتتى", دەپ جازدى.
ەكولوگيا ءمينيسترى ءتۋريزمدى دامىتۋ مەن بوزجىرا سياقتى ۋنيكالدى تابيعي نىساننىڭ ەكوجۇيەسىن ساقتاۋدىڭ اراسىندا تەپە-تەڭدىك بولۋ كەرەكتىگىن باسا ايتتى.
"جوبانىڭ الەۋەتىن باعالاپ, كەڭەستەرىن بەرۋ ءۇشىن تاجىريبەلى ساراپشىلار مەن عالىمداردى بوزجىراعا الىپ باردىق", دەدى مينيستر.
ونىڭ ايتۋىنشا, جەرگىلىكتى قوعام بەلسەندىلەرى عالىمدارمەن بىرگە قوناق ءۇي سالۋ ءوڭىردىڭ ءتۋريزمىن دامىتىپ, جاڭا جۇمىس ورىندارىن اشۋ ءۇشىن كەرەك دەگەن ويدى العا تارتقان.
"سوندىقتان تۇرعىندار مەن عالىمداردىڭ, قوعام وكىلدەرىنىڭ ۇسىنىسىمەن قوناقۇي ورنى جابايۇشقان قاۋمالىنىڭ سىرتىنا اۋىستىرىلادى. ينۆەستور كومپانيا وكىلدەرى ءوز تاراپىنان جوبانى جۇزەگە اسىراتىن ورىندى قاۋمالدان تىس جەردەن تاڭداۋعا دايىن ەكەندەرىن جەتكىزدى", دەپ حابارلادى ماعزۇم مىرزاعاليەۆ.
