قالادا وندىرىستىك ينفراقۇرىلىمى بار 3 ايماق جۇمىس ىستەپ تۇر. وسى ءۇش يندۋستريالدى ايماقتا جالپى ينۆەستيتسيا كولەمى 229,7 ملرد تەڭگە, 10 مىڭنان استام جۇمىس ورنىمەن 170 جوبا جۇزەگە اسىرىلىپ وتىر.
بۇل جونىندە شىمكەنت قالاسىنىڭ اكىمى مۇرات ايتەنوۆ پرەزيدەنت جانىنداعى وكق الاڭىندا وتكەن ءباسپاسوز بريفينگتە مالىمدەدى.
مۇرات دۇيسەنبەك ۇلىنىڭ ايتۋىنشا, شىمكەنتتە 98,6 ملرد.تەڭگەگە 5,5 مىڭ جۇمىس ورنىمەن 100 جوبا جۇزەگە اسىرىلىپ, وسى جىلدىڭ 10 ايىندا 66,5 ملرد تەڭگەنىڭ ءونىمى شىعارىلعان. جىل سوڭىنا دەيىن ينۆەستيتسيالىق كولەمى 20,9 ملرد تەڭگەگە 566 جۇمىس ورنىمەن 9 جوبا ىسكە قوسىلادى.
"مەملەكەت باسشىسى ءوز جولداۋىندا وڭىرلەردى دامىتۋدىڭ ناقتى جولدارىن بەلگىلەپ بەردى. سوندىقتان, قالا ەكونوميكاسىن قارقىندى دامىتىپ, تۇرعىندارعا ىڭعايلى جاعداي جاساۋ ءبىزدىڭ باستى مىندەتىمىز. جولداۋدا وڭدەۋ ونەركاسىبىن الداعى 5 جىلدا كەم دەگەندە 1,5 ەسەگە ءوسىرۋدى تاپسىردى. وسى ماقساتتا بىرنەشە باستامانى قولعا الىپ وتىرمىز. سونىڭ ءبىرى – 306 گەكتار جەرگە "جۇلدىز" يندۋستريالدى ايماعى ىسكە قوسىلىپ جاتىر", دەدى م.ايتەنوۆ.
بۇل ايماقتا قۇرىلىس, مەتاللۋرگيا, فارماتسەۆتيكا, جيھاز ونەركاسىبى داميتىن بولادى. سونىمەن قاتار, "جۇلدىز" يندۋستريالدى ايماعىندا 105,0 ملرد تەڭگەگە 8 مىڭنان استام جۇمىس ورنىمەن 60 ينۆەستيتسيالىق جوبانى ىسكە اسىرۋ كوزدەلىپ وتىر.
