تراكتورلارعا ارنالعان پلاستيك بولشەكتەر شىعارىلادى

وسى جوبانى ىسكە اسىرۋ ماقساتىندا زاۋىت ماماندارى پەتەربۋرگ تراكتور زاۋىتىندا وقىتۋدان ءوتتى. بولاشاقتا پلاستيكالىق بولشەكتەردىڭ جەرگىلىكتى وندىرىسىنە تولىقتاي كوشۋ، ونىڭ ىشىندە ەڭ كۇردەلى بولىپ سانالاتىن كاپوت ءوندىرىسىن ۇيىمداستىرۋ كوزدەلگەن. قازاقستاندىق قامتۋدى ۇلعايتۋ ءۇشىن كاسىپورىننىڭ مەنشىكتى ينۆەستيتسياسى تەك ءبىرىنشى كەزەڭدە عانا 85 ملن تەڭگەنى قۇرادى.

وسىدان بىرنەشە كۇن بۇرىن قوستاناي تراكتور زاۋىتىنىڭ تەحنيكاسىن قۇراستىرۋ ۋچاسكەسىنىڭ باستىعى، التى تەمىر ۇستاسى جانە شەبەر بريگادير سانكت-پەتەربۋرگتەن ورالدى. پەتەربۋرگ تراكتور زاۋىتىنىڭ قابىرعاسىندا ءبىر اي بويى وتكەن وقۋ قوستانايلىق مامانداردىڭ مۇمكىندىكتەرىن تۇبەگەيلى وزگەرتتى.

ايتا كەتۋ كەرەك، سانكت-پەتەربۋرگ تراكتور زاۋىتى ۇزاق ۋاقىتتان بەرى پلاستيكتەن جاسالعان بولشەكتەردىڭ كەڭ تۇرلەرىن وندىرۋگە كوشتى، بۇل كومپانياعا ءۇشىنشى تاراپ وندىرۋشىلەرىنەن پوليمەرلى ءونىمدى ساتىپ الۋدان تولىعىمەن باس تارتۋعا مۇمكىندىك بەردى. ءدال وسىنداي  تاجىريبەنى، سونىمەن بىرگە تەحنولوگيالار، جابدىقتار مەن ماتەريالداردى قوستانايلىقتار دا قابىلدادى. ەگەر بۇرىن مۇندا تىكەلەي پتز-دا جاسالعان پلاستيكتەن جاسالعان دايىن بولشەكتەر كەلەتىن بولسا، ەندى ولاردى قوستاناي زاۋىتىنىڭ ماماندارى وندىرەتىن بولادى، بۇل ءۇشىن شىنى پلاستيكتى دايىنداۋ بويىنشا بارلىق جاعداي جاسالعان.

جوبا ينجەنەرى دميتري گايداردىڭ ايتۋى بويىنشا، مۇندا پتز وكىلدەرىمەن بىرگە جاسالعان ارنايى قالىپتاۋ ماتريتسالارى قولدانىلادى، ولاردىڭ ساپاسى دا، بولشەكتەرى دە سانكت-پەتەربۋرگتە جاسالعان بۇيىمداردان ەشبىر ەرەكشەلىكتەرى جوق. ەڭ باستىسى، ەندى پلاستيكتەن قاجەتتى بولىك سىنعان نەمەسە اۋىستىرىلعان كەزدە رەسەيگە ءوتىنىش جىبەرۋدىڭ قاجەتى جوق، مۇنداي جاعدايلار ءوندىرىس وشاعىندا ءبىر اپتانىڭ ىشىندە شەشىمىن تابادى.

جاقىن ارادا قوستاناي زاۋىتىنىڭ قىزمەتكەرلەرى كەزەكتى وقۋعا اتتانادى، ودان كەيىن تراكتوردىڭ ەڭ كۇردەلى بولشەگى – كاپوتتى شىعارا الادى. ويتكەنى، ول قوسىمشا تاعى 19 نىساندى قامتيدى، ولاردىڭ بارلىعى ءارتۇرلى پىشىندە.

بۇگىندە زاۋىت سانكت-پەتەربۋرگ تراكتور زاۋىتىنىڭ ساراپتاما كوميسسياسىنىڭ كەلۋىنە دايىندالۋدا، ول پلاستيكپەن جۇمىس ساپاسىن قابىلدايدى. سەرتيفيكاتتاۋ ءساتتى وتكەن جاعدايدا قازاقستاندىق كاسىپورىن قوستانايدا تەك ءوز قاجەتتىلىكتەرى ءۇشىن عانا ەمەس، "كيروۆەتس" تراكتورلارى ءۇشىن دە كومپونەنتتەر شىعاراتىن بولادى. ال بۇل جىلىنا شامامەن 3 مىڭ تراكتور. زاۋىتتىڭ كەلەسى مىندەتى-سانكت-پەتەربۋرگ تراكتور زاۋىتىنا پلاستيكالىق جۇمىستاردى جەتكىزۋ، بۇل جايت وندىرىلگەن جابدىقتار مەن قوسالقى بولشەكتەردىڭ ساپاسىنىڭ جوعارى ەكەندىگىن دالەلدەيدى.

ەستەرىڭىزگە سالا كەتەيىك، قوستاناي تراكتور زاۋىتى قازاقستان رەسپۋبليكاسىنىڭ اۋماعىندا "كيروۆەتس" ەنەرگيامەن قانىققان تراكتورلارىنىڭ رەسمي ءوندىرۋشىسى بولىپ تابىلادى. بيىل زاۋىت ءوزىنىڭ العاشقى تۋعان كۇنىن اتاپ ءوتتى. بۇگىندە وتاندىق ءوندىرىستىڭ "كيروۆەتسى" قازاقستان نارىعىندا ءوز ورنىن تابۋدا. قوستاناي تراكتور زاۋىتى جۇمىس ىستەگەن ءبىر جىلدىڭ ىشىندە ونىڭ تەحنيكاسىن 280-نەن استام فەرمەر ساتىپ العان.