الماتىعا كەلگەن جولاۋشىلاردىڭ 47-سىنەن كوروناۆيرۋس انىقتالدى

ايماقتار • 25 قاراشا، 2020

الماتىعا كەلگەن اۋە جولاۋشىلارىنىڭ 47-سىنەن كوروناۆيرۋس انىقتالدى

39 رەت كورسەتىلدى

الماتىداعى ەپيدەميالىق احۋال جانە COVID-بەن كۇرەسۋگە قاتىستى جۇرگىزىلىپ جاتقان سوڭعى جۇمىستار تۋرالى Egemen.kz حابارلايدى.

ايناش ەسالى

الماتىدا 7011 توسەك-ورىن قۋاتتىلىعىمەن (ونىڭ ىشىندە 250-ءى جان ساقتاۋ) 23 كوۆيدتى ستاتسيونار دايىندالدى. 2 جاڭا ەمحانانىڭ قۇرىلىسى اياقتالدى: 500 توسەك-ورىنعا ارنالعان ينفەكتسيالىق گوسپيتال، 300 توسەك-ورىنعا ارنالعان جاڭا ءمودۋلدى ستاتسيونار. وسىلايشا، سوڭعى ءۇش ايدا ينفەكتسيالىق توسەك-ورىندار سانى ەكى ەسە كوبەيدى.

العاشقى مەديتسينا-سانيتارلىق كومەك جۇمىسى كۇشەيتىلدى. امسك ۇيىمدارىندا "تازا" جانە "لاس" ايماقتار قۇرىلىپ، اعىندار ءبولىندى. ەپيدەمياعا قارسى رەجىمدى، ايماقتارعا ءبولۋدىڭ ساقتالۋى بويىنشا باقىلاۋ كۇشەيتىلدى. 73 ەمحانادا 298 ءموبيلدى بريگادا قىزمەت ەتەدى. تەلەمەديتسينا ورتالىعى قۇرىلدى.

فارمپرەپاراتتار جانە مەديتسينالىق ونىمدەر بويىنشا 10 ملرد.تەڭگەگە تۇراقتاندىرۋ قورى جۇمىس ىستەيدى. تۇراقتاندىرۋ قورىنىڭ شەڭبەرىندە 2021 جىلدىڭ اقپانىنا دەيىنگى ەسەپپەن 68 اتاۋلى دارىلەردىڭ قاجەتتى قورى قۇرىلدى. 2021 جىلدىڭ 31 قاڭتارىنا دەيىن كەمىندە 40 ملن ءدارى-دارىمەك پەن مەديتسينالىق ونىمدەردى جەتكىزۋ جوسپارلانۋدا. قاجەت بولعان جاعدايدا فارماتسەۆتيكالىق پرەپاراتتاردى نارىققا جەتكىزۋ ءۇشىن پايدالانىلاتىن 8 ملن ءدارىنىڭ تومەندەتىلمەيتىن ەڭ از قورى ساقتالۋدا. سونىمەن بىرگە، قالادا دارىحانالارعا كۇن سايىن دارىلىك پرەپاراتتار مەن جەكە قورعانىس قۇرالدارىنىڭ بار-جوعىنا مونيتورينگ جۇرگىزىلەدى.

مەديتسينا قىزمەتكەرلەرىنىڭ قاۋىپسىزدىگى مەن دايىندىعىنا ەرەكشە نازار اۋدارىلعان. جەكە قورعانىس قۇرالدارىنىڭ ەكى ايلىق قورى جاسالعان. قالادا مەديتسينالىق بەتپەردەلەردى شىعاراتىن 6 ءىرى وتاندىق وندىرۋشىلەر بار، ءوندىرۋ قۋاتتىلىعى كۇنىنە – 882 مىڭ.

دەنساۋلىق ساقتاۋ ۇيىمدارىن مەديتسينالىق ماماندارمەن قامتاماسىز ەتۋگە ەرەكشە كوڭىل بولىنۋدە. ەپيدەمياعا قارسى شارالارعا جۇمىلدىرىلعان مەديتسينا قىزمەتكەرلەرىنەن بولەك، 2450 ماماننان قۇرالعان كادرلىق رەزەرۆ دايىندالدى. سونىمەن بىرگە، مەديتسينالىق جوعارى وقۋ ورىندارىنىڭ وقىتۋشىلارى، رەزيدەنتتەرى، دارىگەر-ينتەرندەرىنەن رەزەرۆ قۇرىلدى.

43،1 ملرد تەڭگە سوماسىنا كلينيكالاردى مەديتسينالىق جابدىقتارمەن جاڭارتۋ جانە تولىق جاراقتاندىرۋ جۇرگىزىلدى.

COVID-19 الدىن الۋ جەلىسى بويىنشا لابوراتوريالاردىڭ دايىندىعى قامتاماسىز ەتىلدى. قالادا 18 پتر زەرتحاناسى بار، ولاردىڭ جالپى قۋاتتىلىعى تاۋلىگىنە 14050 زەرتتەۋدى قۇرايدى. سونىمەن بىرگە، تاۋلىگىنە 1152 زەرتتەۋ وتكىزۋ قۋاتتىلىعى بار 12 يفت زەرتحاناسى قىزمەت ەتەدى.

قالانىڭ حالىقارالىق اۋەجايىندا سانيتارلىق-ەپيدەميالىق باقىلاۋدى كۇشەيتۋ بويىنشا شارالار قابىلداندى. شەتەلدەن كەلۋشىلەر ءۇشىن 6 كارانتيندىك ستاتسيونار ۇيىمداستىرىلدى.

بيىلعى 6-23 قاراشا ارالىعىندا الماتى حالىقارالىق اۋەجايىنا بورتىندا 52733 جولاۋشىسى بار 389 رەيس ۇشىپ كەلگەن. ونىڭ ىشىندە COVID-19-عا تەرىس ناتيجەسى بار انىقتامالارىمەن 47627 جولاۋشى، 5083 ادام انىقتاماسىز كەلگەن.

پتر تالداۋ تاپسىرۋ ءۇشىن 5060 ادام كارانتيندىك ستاتسيونارعا جاتقىزىلدى. 47 وڭ ناتيجە الىندى. سونداي-اق، انىقتامانىڭ جوقتىعىنان 23 شەتەلدىك ازامات دەپورتاتسيالاندى. الماتى اۋەجايىندا حالىقارالىق رەيستەرمەن مەگاپوليسكە كوروناۆيرۋس ينفەكتسياسىنا تەستىلەۋدەن وتكەنى تۋرالى انىقتاماسىز كەلگەن ازاماتتاردى انىقتاۋ بويىنشا قاتاڭ باقىلاۋ جۇرگىزىلەدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز