دەگەنمەن ۋاقىت وتە كەلە تومپاق قىزدىڭ ەڭبەكسۇيگىشتىگى ەلميرا اليەۆا سىندى بىلىكتى باپكەردىڭ نازارىن وزىنە اۋدارا باستاعان. ايتقاندى قاعىپ الىپ, تۋرا كوڭىلدەن شىعاتىنداي ىستەۋگە تىرىساتىنى ۇنادى. سۇڭعىلا باپكەر ونىڭ ۇستەل تەننيسىنە يكەمدىلىگىن بىردەن بايقاعان. اۋناپ اي, جىلجىپ جىل ءوتىپ جاتتى. زاۋرەشتىڭ بويىندا سپورتشىعا ءتان تاباندىلىق پەن قايسارلىقتان باستاۋ الاتىن مىنەز-ق ۇلىق قالىپتاستى. ءاربىر ويىندا جەڭىسكە جەتىپ, ءبىرىنشى بولۋعا ىنتىق قۇشتارلىق تا بىرتە-بىرتە پايدا بولا باستاعان.
كوپ ۇزاماي العاشقى جەڭىستەر دە توبە كورسەتە باستادى. باسىندا قاراعاندى وبلىسى بويىنشا وزىنەن جاسى الدەقايدا ۇلكەن قارسىلاستارىن بىرىنەن سوڭ ءبىرىن جەڭىپ, رەسپۋبليكا دەڭگەيىندەگى جارىستاردىڭ جەڭىس تۇعىرىنا ءجيى كوتەرىلە باستادى. سونىڭ ناتيجەسىندە جاسوسپىرىمدەر اراسىنداعى ۇلتتىق قۇراما ساپىنا قابىلدانىپ, حالىقارالىق تۋرنيرلەر مەن ازيا چەمپيوناتتارىندا تابىستى ونەر كورسەتىپ ءجۇردى. وسىنىڭ ءبارى جاس قىز ءۇشىن ماڭداي تەر, مەحناتتى ەڭبەكپەن كەلگەن ناتيجە ەدى.
زاۋرەش اقاشەۆانىڭ جۇلدىزى بيىل جارقىراي جاندى. قاڭتار ايىندا قاراعاندى قالاسىندا ۇستەل تەننيسىنەن قازاقستاننىڭ جەكەلەي جانە كوماندالىق چەمپيوناتى وتكەن بولاتىن. مىنە, وسى سىندا زاۋرەش تاماشا ونەر كورسەتىپ, ءۇش بىردەي التىن مەدال الىپ, ەلىمىزدىڭ ءابسوليۋتتى چەمپيونى اتاندى. تاۋەلسىز قازاقستان سپورتىنىڭ تاريحىندا قازاق قىزدارىنىڭ اراسىنان بۇرىن مۇنداي بيىكتى بىردە-ءبىر سپورتشى باعىندىرىپ كورمەگەن ەدى.
وسى تولايىم تابىسىنان سوڭ, زاۋرەش ەرەسەكتەر اراسىنداعى ۇلتتىق قۇراما كوماندا ساپىنداعى ورنىن «شەگەلەپ» قويدى. بۇل دەگەنىڭىز, قازاقتىڭ قارشاداي قىزىنىڭ كەلەر جىل دوداسى باستالادى دەپ جۇرگەن توكيو وليمپياداسىنا قاتىسۋى بەك مۇمكىن دەگەن ءسوز. البەتتە, الدا ليتسەنزيا ءۇشىن جان الىسىپ, جان بەرىسكەن جەكپە-جەكتەردىڭ بولارى ءسوزسىز. ال زاۋرەش بولسا, وزىنە سەنىمدى.
ۇستەل تەننيسىندەگى ءۇردىستى ۇنەمى قاداعالاپ جۇرەتىن زاۋرەش الەمنىڭ بىرنەشە دۇركىن چەمپيونى فان چجەندۋن ەسىمدى قىتاي تەننيسشىسىنىڭ ويىنىن وزىنە ۇلگى ەتەدى ەكەن. «فان چجەندۋن – دۇنيە جۇزىندەگى الەمنىڭ ەڭ جاس چەمپيونى: التىن مەدالدى 17 جاسىندا جەڭىپ العان. ول وڭ قولىمەن وينايدى, راكەتكانى ەۋروپالىق تاسىلمەن ۇستايدى. نەگىزىندە ول شابۋىلداۋشى مانەردىڭ ويىنشىسى», دەيدى زاۋرەش.
قازىر ءوزى قاراعاندى مەملەكەتتىك ۋنيۆەرسيتەتىنىڭ دەنە تاربيەسى جانە سپورت فاكۋلتەتىندە ءبىلىم الىپ ءجۇر. «بوس ۋاقىتىمدا ءتاتتى-ءدامدى توقاش تۇرلەرىن پىسىرگەندى جاقسى كورەمىن», دەيدى سپورتشى قىز. ءوزىنىڭ بولاشاقتاعى ءومىرى سپورتپەن, ونىڭ ىشىندە تەننيسپەن تىعىز بايلانىستى بولاتىنىنا سەنىمدى.
«مەنىڭ العاشقى جانە قازىرگى جاتتىقتىرۋشىم – ەلميرا قايىرقىزى اليەۆا. ول كىسى جاتتىعۋدا ءتارتىپتى قاتاڭ ساقتايتىن باپكەر. ءتارتىپ بولعان جەردە ناتيجە دە بولادى دەگەن قاعيداتتى ۇستانادى», دەيدى زاۋرەش ءوزىنىڭ باپكەرى تۋرالى.
ەلميرا اليەۆا كەزىندە ۇستەل تەننيسىنەن ۇلكەن تابىسقا جەتكەن سپورتشى بولدى. كسرو-نىڭ سپورت شەبەرى اتاعىن يەمدەنۋدىڭ ءوزى ونىڭ قانداي تەننيسشى بولعانىن اڭعارتسا كەرەك. ەلميرا قايىرقىزى ءوزىنىڭ سپورتتىق مانسابىندا بەس جىلداي قازاقستان قۇراما كومانداسىنىڭ ساپىندا ونەر كورسەتكەن. ەلىمىزدىڭ بىرنەشە دۇركىن چەمپيونى اتاندى. كەڭەس وداعى كۋبوگى سىنىندا جۇلدەگەر بولسا, كسرو بىرىنشىلىگىندە توپ جارعان تاماشا جەتىستىگى دە بار.
«زاۋرەشتىڭ باسقا تەننيسشىلەردەن باسىم ءتۇسىپ تۇراتىن قاسيەتتەرىنىڭ ءبىرى – شاپشاڭدىعى مەن كۇشتىلىگى. شاردى شىرقىراتىپ تۇرىپ ۇرعاندا, وقشا زۋلاتادى. قورعانىسى مىعىم, كوبىنە شابۋىلداپ ويناعاندى جاقسى كورەدى», دەيدى قازاقستاننىڭ ەڭبەك سىڭىرگەن جاتتىقتىرۋشىسى ەلميرا اليەۆا شاكىرتى تۋرالى سىر اقتارىپ.
زاۋرەشتىڭ وتباسىن تازا سپورتشىلار شاڭىراعى دەپ ايتۋعا كەلمەس. اكەسى رامازان دۇيسەنتاي ۇلى ەكونوميست ماماندىعى بويىنشا ەڭبەك ەتەدى ەكەن. ال اناسى تاتيانا بوريسوۆنا سين زاڭگەر بولىپ جۇمىس ىستەيدى. دەگەنمەن اناسى جاس كەزىندە سپورتقا قاتتى اۋەس بولعان ەكەن: باسكەتبول, ۆولەيبول, شاڭعىمەن اينالىسىپتى. ال زاۋرەشتىڭ ءوزى ۇيدەگى بەس بالانىڭ كەنجەسى.
تالانتتى تەننيسشى قاراعاندى وبلىستىق دەنە تاربيەسى جانە سپورت باسقارماسى تاراپىنان جاسالىپ جاتقان جاعدايعا ريزا ەكەنىن ايتادى. «قازىر جوعارى دەڭگەيدە ناتيجە كورسەتىپ جۇرگەن سپورتشىلاردىڭ ستيپەندياسى كوتەرىلگەن, باسقا دا تۇرمىستىق دەڭگەيدەگى ماسەلەلەر شەشىمىن تولىقتاي تاپقان. باسشىلىق جاعىنان جان-جاقتى قامقورلىقتى سەزىنگەن سايىن جانكۇيەردى ۇياتقا قالدىرماۋعا, نامىستى قولدان بەرمەۋگە تىرىساسىڭ. مۇنىڭ ءوزى كەز كەلگەن سپورتشىعا ۇلكەن جاۋاپكەرشىلىك جۇكتەيدى», دەيدى ساڭلاق سپورتشى.
قازىر زاۋرەش قۇراما ساپىندا تالعاردىڭ ماڭىنداعى «اقبۇلاق» وليمپيالىق ورتالىعىندا وقۋ-جاتتىعۋ جيىنىندا ءجۇر. ءساتىن سالسا, الدىمىزداعى قاڭتار ايىندا قاراعاندىدا توكيو وليمپياداسىنىڭ جولدامالارى ساراپقا سالىناتىن حالىقارالىق تۋرنير وتپەكشى. وسى سىندا ءبىز زاۋرەشتەي قازاق قىزى ءۇشىن تاقىم قىسىپ, تالانتتى تەننيسشىنىڭ تىلەۋىن تىلەيتىن بولامىز.
قاراعاندى
