سەگىز جىل بويى كوپشىلىك تاراپىنان كوتەرىلىپ كەلگەن كوگىلدىر وتىن ماسەلەسى بيىل شەشىمىن تاپتى. اتالعان جوبا «جۇمىسپەن قامتۋدىڭ جول كارتاسى» مەملەكەتتىك باعدارلاماسى اياسىندا جۇزەگە اسىپ وتىر. اۋىل تۇرعىندارىنا مەملەكەت تاراپىنان قولداۋ كورسەتىلىپ, مامىر ايىنان باستاپ «گاز-سەرۆيس» جاۋاپكەرشىلىگى شەكتەۋلى سەرىكتەستىگى 182 ميلليون 270 مىڭ تەڭگەگە 13 شاقىرىم 149 مەتر بولاتىن جەراستى قۇبىرلارىن, گاز تارتۋ بويىنشا قۇرىلىس جۇمىستارىن جۇرگىزدى.
بۇگىندە «جامبىل-جىلۋ» جاۋاپكەرشىلىگى شەكتەۋلى سەرىكتەستىگى اۋىلداعى اۋلالاردى قوسىپ, ءۇي ىشىنە گاز تارتۋدا. سەرىكتەستىك ديرەكتورى داستان رساليەۆتىڭ ايتۋىنشا, گاز تارتۋ قۇنى 100 مىڭ تەڭگەنى قۇرايدى. جامبىل اۋدانى اكىمىنىڭ مىندەتىن اتقارۋشى ەرلان قىدىرالى ۇلى, اۋداندىق ءماسليحات حاتشىسى رۇستەم بەگاليەۆ, وبلىستىق ءماسليحاتتىڭ دەپۋتاتى ماسات بەرىك كاراكەمەرلىكتەردىڭ قۋانىشىنا ورتاقتاسىپ, جىلى لەبىزدەرىن جەتكىزدى. اۋىل اقساقالى احاتاي بالقىبەكوۆ كوپشىلىككە اق باتاسىن بەرىپ, اۋىلعا گازدىڭ كىرۋىنە اتسالىسقان بارشا ازاماتتارعا العىس ايتتى. ال, قاراكەمەر اۋىلىنىڭ تۇرعىنى, التىن القا يەگەرى الشاكۇل قالىباەۆا دا كوپشىلىككە ىزگى تىلەگىن ارنادى. «مەن 86 جاستامىن. 10 بالانىڭ اناسىمىن. قاراكەمەرگە كەلىن بولىپ تۇسكەنىمە 70 جىل بولىپتى. سودان بەرى وسى اۋىلدامىن. قۇدايعا شۇكىر, اۋىلىمىز دامىپ كەلەدى. اۋىلعا گاز كەلگەنىنىڭ ءوزى ءبىز ءۇشىن ۇلكەن قۋانىش. وسى جۇمىسقا اتسالىسقان بارشا ازاماتتارعا العىس ايتامىن», دەيدى باتىر انا.
