ءىس-شاراعا قازاقستاننىڭ مادەنيەت جانە سپورت ۆيتسە-ءمينيسترى وركەن بيساقاەۆ, فرانتسيانىڭ ەۋروپا جانە سىرتقى ىستەر ءمينيسترى جانىنداعى تۋريزم, شەتەلدەگى فرانتسۋز ازاماتتارى مەن فرانكوفونيا ماسەلەلەرى بويىنشا مەملەكەتتىك حاتشى جان-باتيست لەمۋان, فرانتسياداعى قازاقستان ەلشىسى جان عاليەۆ, لۋارا جەرلەرى ءوڭىرى پرەفەكتىسىنىڭ ديپلوماتيالىق كەڭەسشىسى جان-يۆ رۋ, حالىقارالىق تۋريزم جانە مەيماندوستىق ۋنيۆەرسيتەتىنىڭ رەكتورى ماينيۋرا مىرزاماديەۆا, انجە ۋنيۆەرسيتەتىنىڭ رەكتورى كريستيان روبلەدو, سونداي-اق, انجە قالاسىنىڭ باسشىلىعى, ەكى ەلدىڭ سىرتقى ساياسي ۆەدومستۆولارى مەن ەلشىلىكتەرىنىڭ قىزمەتكەرلەرى قاتىستى.
ءىس-شارانى اشقان ەلشى ج. عاليەۆ ەكى ەل اراسىنداعى تۋريزم مەن ءبىلىم بەرۋ سالاسىنداعى ىنتىماقتاستىق – ستراتەگيالىق سەرىكتەستىگىمىزدىڭ باسىمدىقتارىنىڭ ءبىرى بولىپ تابىلاتىنىن اتاپ ءوتتى.
ۆيتسە-مينيستر ءو. بيساقاەۆ قازاقستاننىڭ تۋريستىك سالاسىن دامىتۋ مەملەكەتتىك باعدارلاماسىنىڭ باستى باعىتتارىنىڭ ءبىرى – سالا ماماندارىن دايارلاۋ بولىپ تابىلاتىنىن حابارلادى. وسى ورايدا, جوعارى بىلىكتى كادرلاردى دايىنداۋدىڭ جەتى عاسىرلىق تاريحى بار انجە ۋنيۆەرسيتەتىنىڭ تاجىريبەسى تۇركىستانداعى جاڭا وقۋ ورنى ءۇشىن وتە ماڭىزدى بولىپ تابىلادى.
ءوز كەزەگىندە, ج. لەمۋان ەلشىگە كوتەرگەن باستاماسى ءۇشىن العىسىن ءبىلدىرىپ, قول قويىلعان كەلىسىم ەكى ەل اراسىنداعى ستراتەگيالىق سەرىكتەستىكتىڭ ودان ءارى جاقىنداسىپ, كەڭەيۋىنە ىقپال ەتەتىنىنە سەنىم ءبىلدىردى.
كەلىسىمگە حالىقارالىق تۋريزم جانە مەيماندوستىق ۋنيۆەرسيتەتىنىڭ رەكتورى - باسقارما ءتورايىمى م. مىرزاماديەۆا مەن انجە ۋنيۆەرسيتەتىنىڭ رەكتورى ك. روبلەدو قول قويدى.
قۇجات ءبىلىم بەرۋ, تاجىريبە الماسۋ جانە زەرتتەۋلەر جۇرگىزۋ ماقساتىندا ستۋدەنتتەرمەن, پروفەسسورلىق-وقىتۋشىلىق قۇراممەن الماسۋدى, سونداي-اق تۋريزم يندۋسترياسى مەن قوناقجايلىلىقتى دامىتۋ سالاسىندا بىرلەسكەن كونفەرەنتسيالار مەن سەمينارلار وتكىزۋدى كوزدەيدى. بولاشاق ماماندار ءۇشىن تىلدىك كۋرستار وتكىزۋ ماسەلەسىنە دە ەرەكشە نازار اۋدارىلدى.
ءىس-شارا اياسىندا «ورتالىقسىزداندىرىلعان سەرىكتەستىك» اياسىندا قارقىندى دامىپ كەلە جاتقان ەكى ايماق – تۇركىستان وبلىسى مەن لۋارا جەرلەرى – اراسىنداعى ىنتىماقتاستىقتىڭ كەڭ اۋقىمىن تالقىلاۋ تۋرالى ۋاعدالاستىق قايتا راستالدى.
