تۇركىستان وبلىسىندا كارانتين تالاپتارىنىڭ ساقتالۋى ءتيىستى ورگانداردىڭ قاتاڭ باقىلاۋىندا. ونىڭ ىشىندە تۇركىستان وبلىسى پوليتسيا دەپارتامەنتىنىڭ قىزمەتكەرلەرى ارنايى قۇرىلعان موبيلدىك توپتارمەن جۇيەلى تۇردە جۇمىستار جۇرگىزۋدە. ماسەلەن, وتىرار اۋدانىنىڭ پوليتسەيلەرى كارانتيندىك رەجيم مەن سانيتارلىق-ەپيدەميولوگيالىق نورمالاردى بۇزىپ, كوكپار ۇيىمداستىرعان تۇرعىندى انىقتادى.
ناقتىراق ايتساق, قارعالى اۋىلدىق وكرۋگىنە قاراستى قانتتوعاي اۋماعىندا جەرگىلىكتى تۇرعىن “باتا كوكپار” جاساعان. موبيلدىك توپ بىردەن شوعىرلانعان ادامدار توبىن تارقاتتى. ءتارتىپ ساقشىلارى ءىس-شاراعا قاتىسۋشىلارعا كارانتين تالاپتارىنا جول بەرمەۋ تۋرالى ءتۇسىندىرۋ اڭگىمەلەرىن وتكىزدى.
سونداي-اق شەكتەۋ شارالارىن بۇزا وتىرىپ, 60-تان استام ادامدى جيناعان “كوكپار” ۇيىمداستىرۋشىسىن جاۋاپقا تارتتى. وعان قاتىستى قر اقبتك-ءنىڭ 425-بابى (حالىقتىڭ سانيتاريالىق-ەپيدەميولوگيالىق سالاماتتىلىعى سالاسىنداعى زاڭناما تالاپتارىن, سونداي-اق گيگيەنالىق نورماتيۆتەردى بۇزۋ) بويىنشا اكىمشىلىك حاتتاما تولتىردى.
جينالعان ماتەريالدار ءتيىستى زاڭدى شەشىم قابىلداۋ ءۇشىن قۇزىرەتتى ورگاندارعا جىبەرىلدى.
ەستەرىڭىزگە سالا كەتەيىك, باس مەملەكەتتىك سانيتارلىق دارىگەردىڭ قاۋلىسىنا سايكەس تۇركىستان وبلىسىنىڭ اۋماعىندا حالىق اراسىندا كوروناۆيرۋستىق ينفەكتسيانىڭ تارالۋىنىڭ الدىن الۋعا جانە جولىن كەسۋگە باعىتتالعان كارانتيندىك رەجيم ەنگىزىلگەن.
