«الا قويدى بولە قىرىققانى» نەسى؟

• 24 قاراشا، 2020

«الا قويدى بولە قىرىققانى» نەسى؟

10 رەت كورسەتىلدى

بۇگىندە رەسپۋبليكامىزدىڭ بارلىق وڭىرلەرىندە ىندەتكە قارسى ءىس-شارالاردىڭ جۇيەلى جۇرگىزىلۋىن باقىلاۋ، ونىڭ الدىن الۋ جانە تيىمدىلىگىن كوتەرۋ ءۇشىن ارنايى مونيتورينگتىك توپتار قۇرىلعانى بەلگىلى.

تەمىر قۇسايىن

ناقتى ايتقاندا، قازىرگى جاعدايدا بار سەنىم مەن جاۋاپكەرشىلىك اتالعان توپ جەتەكشىلەرى مەن مۇشەلەرىنە جۇكتەلگەن. وسى ورايدا سوڭعى ەكى ايدا ورال وڭىرىندە كۆي-ءدىڭ الدىن الۋ ماقساتىندا 242 مونيتورينگتىك سيپاتتاعى رەيدتەر وتكىزىلىپ، سانيتارلىق-ەپيدەميالىق تالاپتاردىڭ بۇزىلۋىنا جول بەرگەن بىرقاتار نىسان يەلەرى اكىمشىلىك جاۋاپكەرشىلىككە تارتىلىپتى. بۇل – ارينە قولداۋعا تۇرارلىق ماسەلە.

ايتسە دە وسىنداي سىني ساتتەردە مونيتورينگتىك توپ مۇشەلەرى تارازى باسىن تەڭ ۇستاماي، قازاقى ۇعىمعا سالعاندا «الا قويدى بولە قىرقۋعا» جول بەرگەنى باتىس قازاقستان وبلىسىندا وتكىزىلگەن ىندەتكە قارسى كۇرەس جونىندەگى شتاب وتىرىسىندا ايتىلىپ، اتالعان جايت جونىندە وبلىستىق «ورال ءوڭىرى» گازەتىندە «مونيتورينگتىك توپ جۇمىسىنا نارازىلىق بار» دەگەن تاقىرىپتا كولەمدى ماتەريال جاريالاندى. وسى ەسەپتىك ماقالادا گازەت ءتىلشىسى باتىس قازاقستان وبلىسىنىڭ اكىمى عالي ەسقاليەۆ مونيتورينگتىك توپ جۇمىسىنا نارازىلىق بىلدىرۋشىلەر بار دەپ مالىمدەگەنىن العا تارتىپتى. وبلىس باسشىسى مۇنداي توقتامعا مونيتورينگتىك توپتاردىڭ قىزمەتىنە قاتىستى الەۋمەتتىك جەلىدەن تۇسكەن حابارلامانى وقىپ، تانىسقاننان كەيىن كەلگەن ەكەن.

گاپ مىنادا دەۋگە بولادى. بىرقاتار مونيتورينگتىك توپتىڭ مۇشەلەرى توي وتكىزۋگە كەلىسىم بەرىپ، جاعداي جاساعان كەيبىر مەيرامحانا يەلەرىن بۇركەمەلەپ، كەرىسىنشە ەكىنشى ءبىر جاعدايدا ءوتىپ جاتقان باسقوسۋدى توقتاتتىرىپ، ايىپپۇل سالدىراتىن كورىنەدى. ءسوز جوق، مۇنداي كەزگە تەكسەرىسكە ءبىرىنشى تاپ بولعان تويحانا قوجايىندارىنىڭ ورىندى وكپە-رەنىشى مەن نارازىلىعى تۋىندايدى ەمەس پە؟

شتاب وتىرىسىندا مونيتورينگتىك توپتىڭ ۇستىنەن ادىلەتسىزدىككە جانە الا قويدى بولەك قىرقۋعا جول بەرگەنى جونىندەگى حابارلاما دالەلدەنسە، ونىڭ مۇشەلەرى، سونىڭ ىشىندە مەملەكەتتىك قىزمەتكەرلەر جۇمىسىنان بوسايتىنى جونىندە ۇيعارىم جاسالعان.

ورال