اعىمداعى جىلعى 21 قاراشا كۇنى حابارسىز كەتكەن كامەلەتكە تولماعان قىزدىڭ دەرەگى بويىنشا اقتوبە قالاسى پب جەدەل باسقارۋ ورتالىعىنا قالا تۇرعىنى حابارلاستى. ونىڭ ايتۋىنشا, 22 قاراشا كۇنى تاڭعى ساعات 07-دە 11-شاعىن اۋدانداعى №112 “ۆ” ءۇيىنىڭ اۋلاسىنان ەكى جاس ادامنىڭ ءمايىتى تابىلعان. تەكسەرۋ كەزىندە جوعالعان 17 جاستاعى قىز جانە ونىڭ 18 جاستاعى دوسى ەكەنى انىقتالدى.
اتاپ ايتقاندا, قىز بەن جىگىت 25 قاباتتى ۇيدە ورنالاسقان كىرەبەرىستىڭ بالكونىنان سەكىرگەن. پوليتسيا قىزمەتكەرلەرى قازا بولعانداردىڭ جەكە زاتتارىن تاركىلەدى. وزىنە-ءوزى قول جۇمساۋدىڭ سەبەپتەرىن انىقتاۋ بويىنشا تەكسەرۋ جۇرگىزىلىپ جاتىر. سوت-مەديتسينالىق ساراپتامالار تاعايىندالدى. اتالعان فاكت قر قك-ءنىڭ 105-بابى 3-بولىگى ء(وزىن-ءوزى ولتىرۋگە دەيىن جەتكىزۋ) بويىنشا تىركەلدى.
اقتوبە وبلىسى پد باستىعى ا.ارىستانوۆ: – جاسوسپىرىمدەر اراسىندا ءوز-وزىنە قول جۇمساۋدىڭ ەڭ كوپ كەزدەسەتىن سەبەپتەرى – ماحاببات ماسەلەسى, قۇرداستارىمەن نەمەسە اتا-انالارىمەن بولاتىن جانجال, بولاشاق ءۇشىن قورقىنىش جانە جالعىزدىق سەزىمى. اتا-انالار بالانىڭ ەموتسيونالدى جاعدايىنا نازار اۋدارۋى كەرەك. ءوزارا اڭگىمەلەسىپ, سويلەسۋ, ماسەلەلەردى تالقىلاۋ, ولاردى شەشۋگە ۇيرەتۋ, بالانىڭ ومىرگە قۇشتارلىعىن وياتۋ كەرەك. ەگەر ءسىزدىڭ قولىڭىزدان كەلمەسە, بالاڭىزدىڭ الەۋمەتتىك نەمەسە ەموتسيونالدى جاعدايىندا ءبىر ماسەلە تۋىنداعاندا كومەك سۇراۋعا قىمسىنباڭىز. ءبارى وزدىگىنەن جاقسارادى دەپ ۇمىتتەنبەڭىز. قىراعىلىق تانىتىڭىز, – دەدى.
