بيىل سپورتشىلاردى كيىممەن قامتاماسىز ەتۋ سپورت ماۋسىمى بويىنداعى بارلىق قاجەتتىلىكتەردى تولىق قامتيتىن جاڭارتىلعان تاسىلدەر نەگىزىندە جۇزەگە اسىرىلۋدا. اتاپ ايتقاندا, جارىسقا ارنالعان فورمامەن قاتار, سپورتشىلارعا جاتتىعۋ ۇدەرىسى مەن جارىسقا دايىندىققا قاجەتتى كيىمدەر دە بەرىلەدى.
بۇعان دەيىن قامتاماسىز ەتۋ ءىشىنارا سيپاتتا بولعان. مىسالى, جازعى سپورت تۇرلەرى تەك جازعى كيىممەن عانا قامتىلاتىن. ال بيىل ءاربىر سپورتشىعا قىسقى جانە جازعى جيىنتىقتى قامتيتىن تولىق كيىم كەشەنى ۇسىنىلدى.
ەكيپيروۆكا حالىقارالىق Under Armour برەندىمەن جاسالعان كەلىسىم اياسىندا جەتكىزىلۋدە. جيىنتىق قۇرامىنا سپورتتىق كيىمنىڭ نەگىزگى ەلەمەنتتەرىن قامتيتىن 18 ءتۇرلى اتاۋ كىرەدى. اتاپ ايتقاندا, ءۇش اياق كيىم, ءتورت سپورتتىق كوستيۋم, ءۇش جەيدە, قىستىق سىرتقى كيىم, كەۋدەشە جانە تاعى باسقا سپورتشىعا ەڭ قاجەتتى كيىمدەر بار.
«مەملەكەتىمىزدىڭ ۇلكەن قولداۋىنىڭ ارقاسىندا سپورتشىلارعا الەمدىك برەندتىڭ ساپالى سپورت كيىمدەرى بەرىلىپ جاتىر. بۇل ءبىز ءۇشىن ۇلكەن قۋانىش ءارى ماقتانىش. بۇرىن جازعى سپورت تۇرلەرىنە تەك جازدىق, ال قىسقى سپورت تۇرلەرىنە تەك قىستىق كيىم عانا بەرىلەتىن. قازىرگى تاڭدا سپورت تۇرلەرىنە بولمەي, بارلىعىمىزعا بىردەي جازدىق تا, قىستىق تا كيىمدەر ۇسىنىلۋدا. بۇل باستاما, ءبىر جاعىنان, ءبىزدى بىرىكتىرىپ, ورتاق رۋح قالىپتاستىرۋعا ىقپال ەتەدى. ەندى قازاقستاننىڭ بارلىق سپورتشىلارى بىرىڭعاي فورمادا ونەر كورسەتىپ, ەل نامىسىن ابىرويمەن قورعاۋعا تىرىسادى», دەيدى دزيۋدودان پاريج وليمپياداسىنىڭ قولا جۇلدەگەرى عۇسمان قىرعىزباەۆ.
ەربول حاميتوۆقا «قازاقستاننىڭ ەڭبەك سىڭىرگەن سپورت شەبەرى» اتاعى بەرىلدى
قازىرگى تاڭدا فورما جەڭىل اتلەتيكا, بوكس, دزيۋدو, سەمسەرلەسۋ, شورت-ترەك جانە وزگە دە سپورت تۇرلەرى بويىنشا ۇلتتىق قۇرامالاردىڭ بىرقاتارىنا تابىستالدى.
ەكيپيروۆكا بيۋدجەتتەن تىس قاراجات ەسەبىنەن ساتىپ الىندى.
اتالعان ءتاسىلدى ەنگىزۋ ۇلتتىق قۇرامالار سپورتشىلارىنا دايىندىق ءۇشىن تەڭ ءارى ساپالى جاعداي جاساۋعا جانە ولاردىڭ حالىقارالىق ارەناداعى ناتيجەلىلىگىن ارتتىرۋعا باعىتتالعان.
