ەلىمىزدىڭ باس قالاسىندا ساباقتان تىس ۋاقىتىندا قوعامدىق شارالاردان قالمايتىن بەلسەندى جاستار كوپ. نۇر-سۇلتاندا ۆولونتەرلىكتىڭ وزىمەن تۇراقتى اينالىساتىن 1000-نان استام ستۋدەنت بار. جاقىندا ولار حالىقارالىق ىنتىماقتاستىق كۇنىن اتاپ ءوتتى.
«ستاتيستيكاعا سايكەس, نۇر-سۇلتاندا 14 پەن 35 جاس ارالىعىنداعى 250 000-عا جۋىق ادام تۇرادى. ونىڭ ىشىندە 1000-نان استام ستۋدەنت ۆولونتەرلىكپەن تۇراقتى تۇردە اينالىسادى. جاستار ودان وزگە شارالارعا دا بەلسەندى تۇردە قاتىسادى. بۇل وقۋ پروتسەسىمەن قاتار, ولاردىڭ كاسىبي نەمەسە جەكە تۇلعا رەتىندە جەتىلۋىنە كوپ كومەكتەسەدى», دەدى «استانا جاستارى» رەسۋرستىق ورتالىعىنىڭ ۇيىمداستىرۋ ءبولىمىنىڭ باسشىسى ارايلىم ءساپارالى.
ەلوردادا جوعارى وقۋ ورىندارىندا جاستار ءىسى جونىندەگى 16 كوميتەت جانە كوللەدجدەردە 35 جاستار كەڭەسى جۇمىس ىستەيدى. ولار ءبىلىم بەرۋ مەكەمەلەرى قابىرعاسىندا ستۋدەنتتەردىڭ بوس ۋاقىتىن ۇيىمداستىرىپ, پايدالى ىسپەن اينالىسۋىن قاداعالايدى. مىسالى, «تۇران-استانا» ۋنيۆەرسيتەتىنىڭ «ۆولونتەرلەر كلۋبى» جانە ITU جانىنداعى Phoenix سياقتى قوزعالىستار يگى ىستەرىمەن قاتارلاستارىنا ۇلگى. ولاردىڭ قىزمەتى نەگىزىنەن مۇقتاج جاندارعا كومەكتەسۋدەن تۇرادى. «QazMed جاستارى» قۇرامىندا ەرىكتى تۇردە مەديتسينالىق كومەك كورسەتەتىن ستۋدەنتتەر بار.
ستۋدەنتتەر مادەني ومىرگە دە بەلسەندى قاتىسادى. «استانا جاستارى» جاستار رەسۋرستىق ورتالىعى جىل سايىن ءبىرىنشى كۋرس ستۋدەنتتەرىنىڭ رەسمي سالتاناتتى جيىنى مەن «Jana Beles» شىعارماشىلىق فەستيۆالىن ۇيىمداستىرادى. سونىمەن قاتار «Jastar Jalyny Camp» ستۋدەنتتەر لاگەرى بار. «Astana City Quest» ويىنى مەكتەپ وقۋشىلارى مەن ستۋدەنتتەرىنە ەلوردانىڭ كورىكتى جەرلەرىن كورسەتىپ, قالانىڭ تاريحى مەن بۇگىنگى كۇنىنەن سىر شەرتۋدى كوزدەيدى. ودان بولەك ستۋدەنتتەر ءوز يدەيالارىن «Astana Ideas» ستارتاپ بايقاۋىندا ۇسىنا الادى. وسىلايشا يننوۆاتسيالىق جوبالارىن جۇزەگە اسىرىپ, جاس ونەرتاپقىش اتانۋعا مۇمكىندىك الادى. ەلىمىزدىڭ باس شاھارىندا ستۋدەنتتەرگە ارنالعان وزگە دە شارالار قاتارى كوپ. ماسەلەن, كوللەدج ستۋدەنتتەرى «جاس سارباز» اسكەري-پاتريوتتىق قوزعالىسىنا قاتىسىپ, جان-جاقتى دامۋىنا مۇمكىندىك الادى. ال ۆولونتەر بولىپ, قايىرىمدى ىسپەن اينالىسام دەگەن جاستار ۆولونتەرلەر مەكتەبىندە وقيدى. بۇل ارقىلى تاجىريبەسى از ستۋدەنتتەر مۇنداي جاۋاپتى قىزمەتكە تولىق دايىن بولادى. سەبەبى سىرتتان وڭاي بولىپ كورىنگەن ۆولونتەرلىك قىزمەتتىڭ قىزىعىمەن قاتار قيىندىعى دا بار. سونداي-اق بيىل جوو مەن كوللەدج ستۋدەنتتەرى اراسىندا ونلاين-پىكىرسايىس ءتۋرنيرى ءوتتى.
اتالعان شارالار ستۋدەنتتەردىڭ بوس ۋاقىتىن ءتيىمدى وتكىزۋگە ىقپال ەتىپ قانا قويماي, ولاردىڭ قوعامدا ءوز ورنىن تاۋىپ, وزدەرى سەكىلدى بىلىمگە قۇشتار, تاجىريبە جيناۋعا نيەتتى, بەلسەندى جاستاردىڭ ورتا قالىپتاستىرۋىنا مۇمكىندىك بەرەدى.
