"قازاق ونكولوگيا جانە راديولوگيا عىلىمي-زەرتتەۋ ينستيتۋتىنىڭ" ديرەكتورى, مەديتسينا عىلىمدارىنىڭ دوكتورى, پروفەسسور, ۇعا اكادەميگى ديليارا قايداروۆانىڭ ايتۋىنشا, سوڭعى ءتورت جىلدا ونكولوگيالىق اۋرۋدىڭ تىركەلۋ ديناميكاسىندا باسەڭدەۋ بار. بۇل تۋرالى ول وبلىس اكىمىنىڭ ورىنباسارى باقىتگۇل حامەنوۆانىڭ قاتىسۋىمەن وتكەن ۇيلەستىرۋ كەڭەسىنىڭ وتىرىسىندا ءمالىم ەتتى.
"سوڭعى جىلدارى وڭىردەگى ونكولوگيا ديسپانسەرى 26 مامانمەن تولىقتى. بۇرىن ناۋقاستار ەم الۋ ءۇشىن الماتىعا بارىپ قارالاتىن ەدى. قازىرگى ونكولوگيالىق اۋرۋعا شالدىققاندارعا جوعارى ساپالى كومەك جەرگىلىكتى مەديتسينالىق مەكەمەدە كورسەتىلىپ وتىر. اتىراۋدىڭ مەديتسينا مەكەمەلەرى سوڭعى ۇلگىدەگى قۇرىلعىلارمەن جابدىقتالعان. مۇندا كۇردەلى وتا جاساۋعا دا مۇمكىندىك بار", دەيدى ديليارا قايداروۆا.
وبلىستىق دەنساۋلىق ساقتاۋ باسقارماسىنىڭ باسشىسى اسحان بايدۋاليەۆتىڭ مالىمەتىنشە, اتىراۋدا ءسۇت بەزى, وكپە وبىرى, اسقازاننىڭ قاتەرلى ىسىگى اۋرۋلارى ءجيى كەزدەسەدى.
"سول سەبەپتەن مەديتسينالىق مەكەمەلەر ەرتە مەرزىمدە دياگنوستيكادان وتكىزىپ, زەرتتەۋگە مۇمكىندىك بەرەتىن, كۇردەلى وتا جاساۋعا قاجەت قۇرىلعىلارمەن جابدىقتالدى. بىراق, وبلىستاعى ونكولوگيالىق ديسپانسەردىڭ عيماراتىنىڭ ەسكىرگەنى راس. وسىعان بايلانىستى ايماق باسشىسىنا ۇسىنىس دايىندالۋدا", دەدى باسقارما باسشىسى اسحان بايدۋاليەۆ.
جاقىندا وڭىردەگى مەديتسينالىق مەكەمەلەر ورتاق جۇيەگە قوسىلدى. بۇل جۇيە قالا-اۋداندارداعى توموگرافيا, رەنتگەن زەرتتەۋىنىڭ قورىتىندىلارىن ورتاق بازادا جيناقتاپ, زەردەلەۋگە مۇمكىندىك بەرەدى. ال, قاتەرلى ىسىكتىڭ بەلگىلەرىن جاساندى ينتەللەكت كومەگىمەن انىقتاۋعا مۇمكىندىك جاسالىپ وتىر.
"جاساندى ينتەللەكت قاتەرلى ىسىكتەردى مەيىلىنشە ەرتە مەرزىمدە انىقتاۋعا مۇمكىندىك بەرەدى. ءبىز وبىرعا شالدىققان ناۋقاستىڭ ءومىر ءسۇرۋ ۇزاقتىعىن كەمىندە 5-6 جىلعا سوزا الساق, مۇنىڭ ءوزى ۇلكەن جەتىستىك", دەدى اسحان بايدۋاليەۆ.
اكادەميك ديليارا قايداروۆانىڭ ايتۋىنشا, ونكولوگيالىق اۋرۋلاردى انىقتاۋدىڭ ەڭ ءتيىمدى جولى – مەديتسينالىق سكرينينگ. قاتەرلى ىسىك ەرتە انىقتالعان جاعدايدا ماماندار ناۋقاسقا 70-80 پايىزعا دەيىن كومەك كورسەتە الادى. ونىڭ مالىمەتىنشە, قازاقستاندا قاتەرلى سىرقاتقا قارسى سكرينينگتىك تەكسەرۋلەر 25 جاستان باستالادى.
ايەلدەر اراسىندا جاتىر مويىنى وبىرىنا قارسى تەكسەرۋ 30-35 جاستان, ءسۇت بەزى وبىرىنا قارسى تەكسەرۋ 50-60, ەرلەر اراسىندا قۋىق بەزى وبىرىنا قارسى مەديتسينالىق سكرينينگ 50-54, 58-62 جاس ارالىعىندا وتكىزىلەدى. اسقازان, وڭەش وبىرىنا قارسى تەكسەرۋ ەر, ايەل ادامدار ءۇشىن 50 جاستان باستالادى. ال, باۋىر وبىرىنا قارسى تەكسەرۋدەن پاتسيەنت كەز كەلگەن جاستا وتە الادى. قازىر اتىراۋ وبلىسىندا ونكولوگيالىق ەسەپتە 4500 ناۋقاس تۇر. سوڭعى ءبىر جىلدا قاتەرلى ىسىك 1150 ادامنان انىقتالعان.
