جيىندا ءبىرىنشى بولىپ ءسوز العان ءبىلىم جانە عىلىم ۆيتسە-ءمينيسترى رۇستەم بيعاري 16 قاراشادا مەكتەپتەردە ءىى توقساننىڭ باستالعانىن ايتا كەلىپ, الدىمەن ءى توقساننىڭ ناتيجەلەرىنە قىسقاشا توقتالدى.
ء«ى توقساندا ميلليوننان اسا بالا ارالاس فورماتتا ءبىلىم الدى. 2,3 ملن بالا قاشىقتان وقىدى. ايتا كەتەيىن, 82 ملن-نان اسا باعا ونلاين رەجىمدە قويىلدى, 40 ملن-عا جۋىق ءۇي تاپسىرماسى مەن باقىلاۋ جۇمىسى بەرىلگەن. ءبىلىم بەرۋ جۇيەسىندە 2 ملن-نان اسا اتا-انا, 3 ملن ءبىلىم الۋشى جۇمىس ىستەدى. سونىمەن قاتار ساباقتى وتكىزۋدىڭ قوسىمشا تاسىلدەرىنىڭ ءبىرى رەتىندە ۆيدەو ساباقتار قولدانىلدى», دەدى ر.بيعاري.
بريفينگتە بەلگىلى بولعانداي, قازاقستان اۋماعىندا كوروناۆيرۋس ينفەكتسياسىنىڭ الدىن الۋ مەن تارالۋىنا جول بەرمەۋ جونىندەگى ۆەدومستۆوارالىق كوميسسياسى, سونداي-اق باس مەملەكەتتىك سانيتارلىق دارىگەردىڭ قاۋلىسى نەگىزىندە وقىتۋ فورماتى انىقتالدى. بىرىنشىدەن, مەكتەپالدى, 1-4 سىنىپ وقۋشىلارىنىڭ كەزەكشى سىنىپتارىنا 5-سىنىپ قوسىلدى. ەكىنشىدەن, كونتينگەنتى 5-300 وقۋشىنى قۇرايتىن مەكتەپتەرگە شتاتتىق رەجىمدە وقىتۋعا رۇقسات بەرىلدى. ۇشىنشىدەن, حالىقارالىق مەكتەپتەردە 1-7 سىنىپتار ءداستۇرلى فورماتتا وقىتۋعا كوشىرىلدى.
«جاسىل ايماقتاعى وڭىرلەردە نەلىكتەن وقىتۋدى ءداستۇرلى فورماتقا كوشىرمەسكە؟» دەگەن ساۋالعا اتالعان ءباسپاسوز جيىنىندا قازاقستاننىڭ باس سانيتار دارىگەرى ايجان ەسماعامبەتوۆا:
«نورماتيۆتىك-قۇقىقتىق اكتىلەردە جازىلعان جانە كۆي تارالۋىنىڭ الدىن الۋعا باعىتتالعان ەرەجەلەر مەكتەپتەردە ساقتالماسا, ءبارى بەكەر. مەكتەپتەگى بالالار وسى تالاپتاردىڭ بارلىعىن ورىندايتىنىنا سەنۋ وتە قيىن دەسەم, بارلىعى كەلىسەتىن شىعار. كليماتتىق جاعدايلارعا قاراي جەلدەتۋ ءۇشىن بارلىق جاعدايلاردى جاساۋ دا كەيدە مۇمكىن ەمەس. كوپ جەردە تەرەزەلەر اشىلمايدى. بۇل جاعدايدا ۆەنتيلياتسيا جۇمىسى قاۋىپسىز اۋا الماسۋدى قامتاماسىز ەتە الادى. جەلدەتۋ – الدىن الۋ شارالارىنىڭ ءبىرى, الايدا ونى جىلىتۋ ماۋسىمىنا بايلانىستى ساقتاۋ قيىننىڭ قيىنى. وسى شارالاردىڭ بارلىعىن جانە كورسەتكىشتەردى ەسكەرە وتىرىپ, ءداستۇرلى وقىتۋعا اۋىسۋ نەمەسە اۋىسپاۋ تۋرالى شەشىم قابىلدانادى. سونىمەن قاتار ناقتى ەلدى مەكەندەگى ەپيدەميالىق جاعدايعا بايلانىستى دا ءوڭىردىڭ باس سانيتارلىق دارىگەرى رۇقسات بەرۋى مۇمكىن», دەپ جاۋاپ بەردى.
ال ءۇشىنشى سپيكەر, مەكتەپكە دەيىنگى جانە ورتا ءبىلىم كوميتەتىنىڭ ءتورايىمى مايرا مەلدەبەكوۆا اتا-انالاردان تۇسكەن توقساندىق جيىنتىق باعالاۋ (تجب) ءبولىم بويىنشا جيىنتىق باعالاۋدىڭ (بجب) قيىندىعىنا قاتىستى شاعىمدارعا:
«تەحنيكالىق ەرەكشەلىكتەر بويىنشا باعالاۋ جۇيەسىن تىكەلەي ءپان مۇعالىمى دايىندايدى. جالپى, ءبىز ادىستەمەلىك ۇسىنىستاردا كوپ تاپسىرما بولماس ءۇشىن ناقتى ۋاقىت پەن كۇردەلىلىكتى بەلگىلەدىك. باستاۋىش سىنىپتاردا 1-2 تاپسىرما بەرىلەدى. ەگەر بۇل مەكتەپ قاشىقتان وقيتىن بولسا, وندا بجب مەن تجب اقپاراتتىق جۇيەلەر نەمەسە «كۇندەلىك.كز», سونداي-اق «دارىن ونلاين» نەمەسە «Bilim Land» سەكىلدى باسقا دا پلاتفورمالار ارقىلى وتكىزىلۋى مۇمكىن. كەرى بايلانىس ءۇشىن قانداي اقپاراتتىق جۇيەنى قولدانسا, سونى بجب جانە تجب ءۇشىن دە پايدالانۋعا بولادى. ال تاپسىرمالاردىڭ ناقتى كولەمى كورسەتىلگەن. سوندىقتان مۇعالىمدەر بۇل كولەمدى تىكەلەي ۇستانۋى كەرەك جانە تاپسىرما كۇردەلى بولماۋى ءتيىس», دەدى.
قوسا كەتەيىك, ءىى توقسانداعى ءبولىم مەن توقسان ءۇشىن جيىنتىق باعالاۋدى وتكىزۋ مەرزىمىن مينيسترلىك بەلگىلەپ, بەكىتكەننەن كەيىن مەكتەپتەرگە جىبەرەدى.
