ءبىز ءومىردى ويىن دەپ قاراستىرعان كۇننەن باستاپ ونىڭ ماڭىزى كەميدى. كوزىمىزدىڭ الدىندا كىشىرەيەدى. ويتكەنى ويىننىڭ جەڭىسپەن اياقتالعانى نەمەسە جەڭىلىسپەن اياقتالعانى ونىڭ ەش كەيىپكەرىنىڭ جۇرەگىنە اناۋ ايتقان سالماق تۇسىرمەيدى. نەمەسە جاقسى ويىن بولسا دا, جامان ويىن بولسا دا, ول – تەك قانا ويىن. ءبىز ونى كينو دەپ قاراستىرعان كۇننەن باستاپ قىزىعۋشىلىعىمىز ارتقانىمەن, جاۋاپكەرشىلىگىمىز ازايادى. ويتكەنى ءبىز – ءارتىسپىز. سپەكتاكل دە وسى شامالاس. سىرتتاي جاسانىپ ءجۇرۋ عانا ماڭىزدى بولعاندىقتان, ءبىز ءبارىمىز ارتىسكە اينالىپ الىپ, ءوز ءرولىمىزدى ويناپ شىعۋعا قۇلشىناتىن بولامىز.
سوندا ءومىردى قالاي قابىلداساق, سولاي سۇرەمىز. ماسەلەن, كوپشىلىك بىرەۋلەردىڭ پىكىرى ارقىلى قابىلدايدى. ءومىر ولار ءۇشىن سوزدەر مەن سويلەمدەردىڭ جيىنتىعى. وي-پىكىرلەردىڭ اياسىندا ءومىر سۇرەتىن كوپشىلىك بەلگىلى شەڭبەردىڭ ىشىندە, بەلگىلى ءبىر تاماقتارمەن قورەكتەنىپ, بەلگىلى ءبىر ادامداردىڭ جانىندا جانتايىپ, بەلگىلى ءبىر سوزدەردى ايتىپ, بەلگىلى ءبىر جاسقا دەيىن كورەسىسىن كورەدى.
ەسىم كىرە باستاعاننان جاتتاندىلىقتان, جاساندىلىقتان قاشتىم. بىرەۋدىڭ ءبىر نارسە, نە ءبىر ادام تۋرالى ايتقان پىكىرىنە تەكسەرمەي, جۇرەك سۇزگىسىنەن وتكىزبەي تۇرىپ, ەشقاشان كەلىسە سالعان ەمەسپىن. كىتاپتان وقىعان سويلەمدەردىڭ جانىما جاققانىن عانا ەستە ساقتادىم. قالعانى «قوقىس جاشىككە» كەتتى... ارينە, وق بويى وزىق بولۋعا تالپىنعانىمدى جاسىرمايمىن. ءبىر مەزەتتە اقىلدى بولىپ تا كورىنەتىنىم راس شىعار. سويتە تۇرا مەنىڭ ماق ۇلىقتان ايىرماشىلىعىم از. ماق ۇلىق قالاي تابيعي بولسا, مەن دە سونداي تابيعي جاراتىلىستىڭ ءبىرىمىن.
ءومىردى ويىن دەپ تۇسىنگىم كەلگەن كەزدەرگە كۇلە قارايمىن. وزىمشە ءبىر فورما جاساعىم كەلگەن شىعار؟ تاعدىرىمدى ەكسپەريمەنت الاڭىنا اينالدىرۋدان قاشپاي, نە وتسە دە باسىمدى كوتەرىپ ءجۇردىم. قورىقپاعانىم, تورىقپاعانىم, جابىقپاعانىم ەسىمدە. اللانى مويىنداماۋدىڭ الەگى دەپ باعالايمىن قازىر. قورىقپاعانىمنان قورقامىن. وتكەن كۇن وزەككە قۇرت تۇسىرەدى. قۇرت وسە بەرەدى ەكەن. جانىڭدى جەيدى... ابدەن تيتىقتاعان كەزدە ءومىردىڭ سۇمدىعىنان قابىر ازابى جەڭىل سياقتى كورىنەدى. ءوزىڭدى ولەردەي ءسۇيۋدىڭ, سويتە تۇرا سىنىپ تۇسەر زاتتاي اياۋدىڭ ەڭ شىنايى كورىنىسى وسى. تىرلىككە كوندىگۋ دەگەنىمىز – ءبىر رەت شوشىنعان جانىڭدى قايتا-قايتا شوشىتىپ, اقىر سوڭىندا تۇك اسەر ەتپەي قالاتىن بولمىسىڭدى سىناپ قانا ءتىرى ءجۇرۋ...
جالپى, ارتىستەردەن گورى ويىنپازداردى ءتۇسىنۋ قيىن. ويتكەنى ولار ويىننىڭ ەرەجەسىن وزدەرى ويلاپ تابادى. ال ارتىستەر قوعامدىق پىكىردىڭ اۋانىمەن ءومىر سۇرەدى. قوعام ولاردى ءارتىس دەپ قابىلداسا عانا ءارتىس بولا الادى. ءارتىس پەن ويىنپازدىڭ ارەكەتى ۇقساس بولعانىمەن, مازمۇندارى ءارتۇرلى. ءارتىس وزىنە نازار اۋدارتۋ ارقىلى ەركىندىگىن جوعالتادى. بولمىسى ءارتىس ادام اسەرشىل, قىزىققىش, جالپى ءوز ارەكەتىنىڭ تۇتقىنى. جاسانىپ جۇرەتىن, جارقىلداپ كۇلەتىن, جالپىلداپ سويلەيتىن ادامداردىڭ ءبارى ءارتىس. ولارعا ەڭ ماڭىزدىسى – سىرتقى فاكتور. ءىشتىڭ ءىرىپ-ءشىرۋى ءسوز ەمەس. تاعدىردىڭ بىت-شىتى شىعۋى دا قورقىتپايدى. ەڭ سۇمدىعى – ولارعا ەشكىمنىڭ كوڭىل اۋدارماي قويۋى. وسى تۇستا سىنۋى مۇمكىن. ەرەجە ويلاپ تاپقىشتار بولسا مىسىق سەكىلدى اقىلدى. ءوز باسىم وتكەن كۇننىڭ وزەككە تۇسكەن قۇرتىن ەمدەپ العانشا ءتىرى جۇرگىم كەلەدى. ارينە ويىنپاز ادام وسىلاي ايتسا, سەنىمسىزدەۋ ەستىلگەنىمەن, ومىرگە سالماقتىراق قاراي باستاعانىنا كۇدىك كەلتىرۋگە بولمايدى.
بىزگە باقىتتى بولۋ ماڭىزدى.
