بىزدە دارىگەر ءبىر قىز بار...

تالدىقورعان قالالىق اۋرۋحاناسى – دياگنوس­تيكالىق ورتالىعىنا وبلىستىق دەنساۋل­ىق ساقتاۋ باسقارماسىنىڭ باستىعى مارالبەك مەيىربەكوۆتىڭ اتالعان ەمدەۋ ورتالىعىنداعى ۇيىمداستىرۋ-ادىستەمەلىك ءبولىمىنىڭ مەڭگەرۋشىسى, جوعارعى ساناتتاعى تەراپەۆت-دارىگەر باقىت مولداحانوۆا جايلى لەبىزىنەن سوڭ بۇرىلعان ەدىك. الماتى مەديتسينا ينستيتۋتىنىڭ ەمدەۋ ءىسى فا­كۋلتەتىن ءبىتىر­گەن سوڭ ءوزى تۋىپ-وسكەن ءۇشارال قالا­سىنداعى اۋ­داندىق اۋرۋ­حانادا تەرا­پەۆت-دارىگەر بولىپ ەڭبەك جولىن باستا­عان جاس قىز ما­مان­دىعىنا دە­گەن ىنتا-ىقى­لاسى, كى­شى­پەيىل مىنەزى ارقىلى بەدەلى ءوسىپ, باس­­شى قى­ز­مەت­تەرگە سا­تى­لاپ كوتەرىلىپتى. – قيىندىعى مەن قىزىعى بىرگە جۇرەتىن ماماندىقتى تاڭداۋىما جاسىمنان اۋرۋشاڭ بولىپ, دارىگەرلەردىڭ كومە­گىنە جۇگىنۋىم سەبەپ بولدى دەپ ويلايمىن, دەپ باستادى ءسوزىن. – تابالدىرىق اتتاعان ناۋقاستارعا جىلى ءسوزى, شيپالى ەمىن ۇسىنعاندارعا كوڭىلىم اۋدى. جۇرەك تۇكپىرىندە “دارىگەر بول­سام” دەگەن وي ۇش­قىندادى. اكەم حامەت: “بالام تاڭ­داۋىڭ دۇرىس. بىراق, ادامنىڭ كوڭىلى, جانى نازىك. ونىڭ ۇستىنە اۋرۋحانا ەسىگىن ەشكىم ەرىككەننەن اشپايدى. ءبىر ءۇمىت, ءبىر كۇدىكپەن كەلگەندەردىڭ سەنىمىن اقتاي الساڭ بولعانى” دەگەنى دە جانام دەگەن جۇرەككە وت بەرگەنىن ءالى كۇنگە ۇمىت­پايدى. قالاداعى ەمدەۋ مەكەمەسى 2002 جىلى اشىلىپ, مۇندا 120 توسەكتىك ناۋقاستارعا ارنالعان حيرۋرگيالىق, تەراپيا­لىق بولىمدە 38 جوعارى ءبىلىمدى مامان ەڭبەك ەتۋدە. بىلىكتى دارىگەرلەردىڭ شيپالى ەمىن قابىلداعاندار قاتارى جىلىنا 4800 ادامعا دەيىن جەتەدى. ەڭبەگىنىڭ وتەۋىندەي باقىت حامەتقىزى قازاقستان رەسپۋبليكاسى دەنساۋلىق ساقتاۋ ءىسىنىڭ ۇزدىگى, جوعارى ساناتتاعى دارىگەر رەتىندەگى كوپشىلىكتەن العان العىستارى ونىڭ قالتقىسىز ەڭبەگىنە بەرىلگەن باعا. ول تەراپەۆت ماماندى­عىنا قوسا قىرىمداعى نەۆرولوگيا ينستي­تۋتىندا ارنايى دايىندىقتان ءوتىپ, قوسىمشا جۇيكە اۋرۋلارىن ەمدەيتىن مامان كۋالىگىن الىپتى. عالىمداردىڭ زەرتتەۋىنە سۇيەنسەك, ادام ومىرىنە قاجەتتى 30 مىڭنان استام ماماندىق بار. وسىلاردىڭ اراسىنداعى ادام ومىرىنە ەڭ قاجەتتىسى, جانىنا جاقىنى دارىگەر ماماندىعى دەسەك جاڭىلمايمىز. وسى جولدى تاڭداعان باقىتتىڭ اتىنا ايتىلعان العىستار ونىڭ وتكەن ءومىر بەلەسىن بيىكتەتە تۇسەدى. “بىزدە دارىگەر ءبىر قىز بار...” دەگەن ءان بۇرىندارى توي-دۋماننىڭ ءسانىن كەلتىرىپ, ونىڭ سازىمەن تالاي شاڭىراق كوتەرىلگەن ەدى. ادەمى ءان ءالى دە اق جەلەڭدى قىز-كەلىنشەكتەرگە دەگەن جۇرتتىڭ ىستىق ىقىلاسىن ورۋدە. ءان اۋەزىنە بۇگىنگى تىرلىگى لايىق باقىت جولداسى باۋىرجان ەكەۋى ۇل-قىز ءوسىرىپ, سولاردىڭ قۋانىشىنا بولەنگەن ۇلگىلى وتباسى. كۇمىسجان بايجان, الماتى وبلىسى.