مەملەكەتتىك كىرىستەر كوميتەتىنىڭ بەرەشەكپەن جۇمىس باسقارماسىنىڭ باسشىسى قايسار ارىن Instagram جەلىسىندەگى تىكەلەي ەفير بارىسىندا تۇسىندىرگەندەي, ەگەر سالىقتىق بەرەشەك 20 ايلىق ەسەپتىك كورسەتكىشتەن (86 500 تەڭگە) اسسا, الدىمەن ءوسىمپۇل ەسەپتەلىپ, سالىق تولەۋشىگە حابارلاما جولدانادى. بەلگىلەنگەن مەرزىمدە قارىز وتەلمەگەن جاعدايدا عانا بانكتىك شوتتار بويىنشا شىعىس وپەراتسيالارى ۋاقىتشا توقتاتىلادى, سونداي-اق كاسسا مەن ينكاسسولىق وكىمدەرگە شەكتەۋ قويىلادى.
ال 20 اەك-كە دەيىنگى بەرەشەك كەزىندە قاتاڭ شارالار قولدانىلمايدى. بۇل جاعدايدا تەك حابارلاما جىبەرىلىپ, ءوسىمپۇل ەسەپتەلەدى.
كوميتەت دەرەگىنە سۇيەنسەك, 2025 جىلعى 1 جەلتوقسانداعى جاعداي بويىنشا 20 اەك-كە دەيىنگى قارىزى بار شامامەن 100 مىڭ ادام تىركەلگەن. ولاردىڭ جالپى بەرەشەك سوماسى 1,4 ملرد تەڭگەنى قۇرايدى.
ال 20-دان 45 اەك-كە دەيىنگى (194,6 مىڭ تەڭگەگە دەيىن) بەرەشەك كەزىندە سالىق ورگاندارى بانكتىك شوتتار مەن كاسساداعى شىعىس وپەراتسيالارىن توقتاتىپ, ينكاسسولىق وكىمدەر رەسىمدەيدى. مۇنداي قارىزى بار 14 313 سالىق تولەۋشى انىقتالعان, جالپى سوما – 1,8 ملرد تەڭگە.
بەرەشەك 45 اەك-تەن اسقان جاعدايدا, م ۇلىكتى ساتۋ, دەبيتورلار ارقىلى ءوندىرىپ الۋ تەتىكتەرى ىسكە قوسىلادى. بۇل ساناتقا 56 784 تۇلعا جاتادى, ولاردىڭ جيىنتىق قارىزى 276,5 ملرد تەڭگە.
ال ەڭ قاتاڭ شارا – ەلدەن شىعۋعا تىيىم سالۋ – بەرەشەك 27 مىڭ اەك-تەن (116,8 ملن تەڭگە) اسقاندا قولدانىلادى. قازىر مۇنداي ءىرى قارىزى بار 637 سالىق تولەۋشى بار, ولاردىڭ جالپى بەرەشەگى 827,2 ملرد تەڭگەنى قۇرايدى.
تاكسي قىزمەتى: سالىق كودەكسى جۇرگىزۋشىلەرگە قالاي اسەر ەتەدى؟
مەملەكەتتىك كىرىستەر كوميتەتى جاڭا جۇيە شاعىن سالىق بەرەشەگى ءۇشىن بۇكىل كاسىپكەرلىك قىزمەتتىڭ توقتاپ قالۋىنا جول بەرمەۋدى كوزدەيتىنىن بىرنەشە رەت اتاپ وتكەن. جاڭا ءتاسىل سالىقتىق ءتارتىپتى كۇشەيتە وتىرىپ, ەكونوميكالىق بەلسەندىلىككە ارتىق قىسىم جاساماۋعا باعىتتالعان.
