2026 جىلعى 4 اقپاندا استانا قالاسىندا قازاقستان زاڭگەرلەر وداعىنىڭ ۇيىمداستىرۋىمەن قازاقستان رەسپۋبليكاسى جاڭا كونستيتۋتسياسى جوباسىنىڭ ساراپتامالىق تالقىلاۋى ءوتتى. ءىس-شاراعا زاڭگەرلەر قاۋىمداستىعىنىڭ وكىلدەرىمەن قاتار مەملەكەتتىك ورگاندار, سۋديالار كورپۋسى, نوتاريات پەن جەكە سوت ورىنداۋشىلار, عىلىمي ورتا, زاڭ كونسۋلتانتتارى پالاتالارى, سونداي-اق Respublica ساياسي پارتياسىنىڭ وكىلدەرى قاتىستى. سونىمەن بىرگە استانا, الماتى, شىمكەنت قالالارى مەن بىرقاتار وبلىستارداعى وڭىرلىك فيليالداردىڭ باسشىلارى مەن مۇشەلەرى باس قوستى.
كەزدەسۋدى قازاقستان زاڭگەرلەر وداعىنىڭ اتقارۋشى ديرەكتورى ارعىن يسكاكبەكوۆ جۇرگىزدى. نەگىزگى باياندامانى كونستيتۋتسيالىق كوميسسيانىڭ مۇشەسى, قازاقستان زاڭگەرلەر وداعىنىڭ جانە رەسپۋبليكالىق زاڭ كونسۋلتانتتارى القاسىنىڭ توراعاسى سەرىك اقىلباي جاسادى.
بايانداماسىندا ول جاڭا كونستيتۋتسيا جوباسى جەكەلەگەن تۇزەتۋلەردىڭ جيىنتىعى ەمەس, قوعامنىڭ زاماناۋي سۇرانىستارى مەن مەملەكەتتىڭ ۇزاقمەرزىمدى دامۋ باعدارىن ايقىندايتىن نەگىزگى زاڭنىڭ جاڭارتىلعان تۇجىرىمداماسى ەكەنىن اتاپ ءوتتى. جوبادا ادام قۇقىقتارى مەن بوستاندىقتارىن مەملەكەتتىك ساياساتتىڭ باستى باسىمدىعى رەتىندە بەكىتۋگە, ولاردى قورعاۋدىڭ قوسىمشا قۇقىقتىق كەپىلدىكتەرىن قالىپتاستىرۋعا ەرەكشە ءمان بەرىلگەن.
قحپ ايماقتاردا جاڭا كونستيتۋتسيا جوباسىن تالقىلاۋدى جانداندىردى
سەرىك اقىلباي العاش رەت ازاماتتاردىڭ تسيفرلىق كەڭىستىكتەگى قۇقىقتارىن قورعاۋ, سونىڭ ىشىندە دەربەس دەرەكتەردىڭ قاۋىپسىزدىگىن قامتاماسىز ەتۋ ماسەلەلەرى كونستيتۋتسيالىق دەڭگەيدە ايقىندالاتىنىن ايتتى. سونداي-اق ءبىلىم بەرۋ, عىلىم, مادەنيەت پەن يننوۆاتسيالاردى دامىتۋ مەملەكەتتىڭ نەگىزگى باعىتى ءارى ادامي كاپيتالدى نىعايتۋدىڭ تىرەگى رەتىندە بەلگىلەنگەن.
قۇجاتتا مەملەكەتتىڭ جانە ءبىلىم بەرۋ جۇيەسىنىڭ زايىرلى سيپاتىن ساقتاۋ, قوعامدىق كەلىسىمدى نىعايتۋ, ادىلەتتىلىك, زاڭدىلىق پەن قۇقىقتىق ءتارتىپتى كونستيتۋتسيالىق قۇندىلىق رەتىندە بەكىتۋ دە قاعيداتتى ەرەجەلەردىڭ قاتارىنان ورىن العان.
ساراپتامالىق پىكىرلەردى بەيىندى ينستيتۋتتاردىڭ باسشىلارى مەن وكىلدەرى ورتاعا سالدى. ولاردىڭ قاتارىندا رەسپۋبليكالىق نوتارياتتىق پالاتا, قازاقستان رەسپۋبليكاسى سۋديالار وداعى, جەكە سوت ورىنداۋشىلارىنىڭ رەسپۋبليكالىق پالاتاسى, ساياسي پارتيالار جانە وڭىرلىك زاڭگەرلەر ۇيىمدارىنىڭ جەتەكشىلەرى بار.
«اق جول» دەموكراتيالىق پارتياسى ۇلتتىق كەڭەسىنىڭ پلەنۋمى جاڭا كونستيتۋتسيا جوباسىن قولدادى
تالقىلاۋ بارىسىندا بيلىك تارماقتارىنىڭ ءوزارا ءىس-قيمىلىن كۇشەيتۋ, ازاماتتاردىڭ قۇقىقتارىن قورعاۋدىڭ كونستيتۋتسيالىق تەتىكتەرىن جەتىلدىرۋ, سونداي-اق قازىرگى سىن-قاتەرلەردى ەسكەرە وتىرىپ قۇقىقتىق جۇيەنى جاڭعىرتۋعا باعىتتالعان ينستيتۋتسيونالدىق وزگەرىستەر ءسوز بولدى.
جيىن قورىتىندىسىندا كاسىبي قاۋىمداستىق جاڭا كونستيتۋتسيا جوباسىنىڭ تۇجىرىمدامالىق تاسىلدەرىن جالپى قولدايتىنىن ءبىلدىرىپ, ونى ودان ءارى جەتىلدىرۋگە ارنالعان ناقتى ۇسىنىستاردى ۋاكىلەتتى ورگاندارعا جولداۋعا دايىن ەكەنىن جەتكىزدى.
