شىعارمانىڭ قويۋشى ديريجەرى – ابزال مۇحيتدين, ليبرەتتو اۆتورى – تانىمال قازاقستاندىق كينورەجيسسەر, ستسەناريست, اقىن باقىت قايىربەكوۆ, حورەوگرافيالىق ليبرەتتو اداپتاتسياسىنىڭ اۆتورى – جان فرانسۋا ۆازەل.
– ءبىز بۇل ماۋسىمدا وسىمەن ەكىنشى پرەمەرانى دايىنداۋدامىز, سونداي-اق جىل سوڭىنا دەيىن جاڭا تولىق اۋقىمدى وپەرالىق سپەكتاكل قويۋ جوسپارىمىزدا بار. قازىرگى جاعدايعا سايكەس تەاتردىڭ قارقىنى جامان ەمەس دەپ ەسەپتەيمىن. «دالا ءۇنى» ۇلتتىق بالەتى – بۇل قازاقستاندىق جانە شەتەلدىك شەبەر مامانداردىڭ تىڭ ويلارىنىڭ تاندەمى. ادەتتە, پىكىرلەستەر جينالعان جەردە شىعارماشىلىق تۋىندايدى, ال ءبىز وراسان زور ويلاردى ومىرگە اكەلىپ جۇرگەن جوعارى دەڭگەيلى كاسىپقويلاردى تاڭداپ الدىق دەگەن ويدامىن. زالداردا دايىندىق جۇمىستارى باستالىپ كەتتى, ترۋپپا تولىقتاي جۇمىسقا كىرىسكەن, تەاتر تسەحتارىندا كوستيۋمدەر تىگىلۋدە, دەكوراتسيالار مەن بۋتوفوريالار جاسالۋدا. پرەمەرا وتە قىزىقتى وتەتىنىنە سەنىمدىمىن, – دەپ اتاپ ءوتتى قازاقستاننىڭ ەڭبەك سىڭىرگەن قايراتكەرى, «استانا وپەرا» تەاترىنىڭ ديرەكتورى عالىم احمەدياروۆ.
شىعارما بارىسىندا ەرجۇرەك ساۋلەتشىگە قانات بىتىرگەن ارماندارى زاماناۋي حورەوگرافيا تىلىمەن جەتكىزىلەتىن بولادى.
– بۇل بالەتتىڭ ءبىرىنشى ءبولىمى ۇلتتىق بي ەلەمەنتتەرىنەن قۇرالعان ءداستۇرلى بولىپ كەلەدى, ال ەكىنشى ءبولىمى ستيلگە باعىندىرىلعان ءارى اسەم قالا ءومىرىن كورسەتەدى. ۇلتتىق قيمىل-قوزعالىستار ماعان شابىت بەرەدى, مەن ولاردى زەردەلەيمىن دە, ءوز الەمىمە ەنگىزەمىن, كەيىن ءوزىمنىڭ يكەمىمە ساي ءسال وزگەرتىپ, بەيىمدەيمىن. حورەوگرافيا جاساعان كەزدە مەن ءۇشىن مۋزىكا ءاردايىم ءبىرىنشى ورىندا تۇرادى. اتالعان سپەكتاكلدە ءبىز ت.قاجىعاليەۆتىڭ مۋزىكاسىن پايدالاندىق, ول وتە ىڭعايلى, سەبەبى اۋەل باستا بالەتكە ارناپ جازىلعان – دەدى قويۋشى حورەوگراف پاتريك دە بانا.
قويىلىم توبىنا اسقاق ونەر الەمىنىڭ حاس شەبەرلەرى ەنگەن: ريكاردو سانچەس كۋەردا – دەكوراتسيالار بويىنشا سۋرەتشى, ستەفاني باۋەرلە – كوستيۋمدەر بويىنشا سۋرەتشى, كارلوس پينو-كانتانا – كومپوزيتور-ارلەۋشى, دجەيمس انگوت – جارىق بويىنشا سۋرەتشى. داريعا تايشىقوۆا – كوستيۋمدەر بويىنشا سۋرەتشىنىڭ كەڭەسشىسى, ۇلتاي ەردەنبەكوۆا – جارىق بويىنشا سۋرەتشىنىڭ كەڭەسشىسى, الينا ۇسەنباەۆا – ستسەنوگرافيانى باسقارۋشى, سەرىك باسباەۆ, زارينا ايمۇحانوۆا – گريم بويىنشا سۋرەتشىلەر.
