ەرەجەلەردى ەلەمەيتىندەردى پوليتسەيلەر, ەرىكتىلەر, تاۋارلار مەن كورسەتىلگەن قىزمەتتەردىڭ ساپاسى مەن قاۋىپسىزدىگىن باقىلاۋ باسقارماسىنىڭ, اۋداندىق اكىمدىكتەردىڭ وكىلدەرى انىقتايدى.
26 قازان مەن 1 قاراشا ارالىعىندا موبيلدىك توپتار الماتى اۋدانىندا – 61, بايقوڭىر اۋدانىندا – 49, ەسىل اۋدانىندا – 57, سارىارقا اۋدانىندا 33 بۇزۋشىلىقتى تىركەدى.
تەكسەرۋشىلەر اتاپ وتكەندەي, بۇعان دەيىن اكىمشىلىك جاۋاپكەرشىلىككە تارتىلعان بىرقاتار شوب سۋبەكتىلەرى بۇزۋشىلىقتاردى قايتالاعان. ءجيى كەزدەسەتىندەرى: ۇجىمدىق جانە وتباسىلىق مەرەكەلەردى وتكىزۋ, جۇمىس رەجيمىن ساقتاماۋ. ماسەلەن, 30 قازاندا ساعات 23:37-دە "بحب" تۇنگى كلۋبىنا پوليتسەيلەر جۇرگىزگەن تەكسەرىستە 500-گە جۋىق ادام بولعان.
"كەلگەن كليەنتتەر مەن قىزمەتكەرلەر جاسىرىن قالامىز دەپ ۇمىتتەنىپ, ءىشتى جاۋىپ العان. كلۋبتا جارتى مىڭداي ادام كوڭىل كوتەرگەن جانە ەشكىم بەتپەردە مەن الەۋمەتتىك قاشىقتىقتى ساقتاماعان", دەيدى پوليتسيا قىزمەتكەرلەرى.
31 قازان كۇنى "شاڭىراق" مەيرامحاناسىندا توي وتكىزىلدى. مەرەكەدە 60 ادام بولعان. سول كۇنى ساعات 23:41-دە ءموبيلدى توپ سانيتارلىق نورمالاردى بۇزا وتىرىپ, جۇمىس ىستەگەن "Quartet" كاراوكە-كلۋبىن انىقتادى. كلۋبقا 80-گە جۋىق ادام كەلگەن. سونداي-اق, ءموبيلدى توپتار "سالەم" بازارىنا قاتىستى ماتەريالدار جينادى. باس سانيتارلىق دارىگەردىڭ بۇيرىعىنا قاراماستان, اكىمشىلىك دەمالىس كۇنى بازاردى اشىپ قويعان.
اۆتوكولىك جۋ ورىندارىنا,تىگىن شەبەرحانالارىنا جانە باسقالارعا دا ەسكەرتۋلەر جاسالدى. بارلىق دەرەكتەر بويىنشا ماتەريالدار نۇر-سۇلتان قالاسىنىڭ تاۋارلار مەن كورسەتىلگەن قىزمەتتەردىڭ ساپاسى مەن قاۋىپسىزدىگىن باقىلاۋ باسقارماسىنا جولداندى.
1 قاراشاداعى جاعداي بويىنشا اۋداندىق پوليتسيا باسقارمالارىنان 1781 ماتەريال كەلىپ ءتۇستى. 779 جەكە جانە زاڭدى تۇلعالار جالپى سوماسى 161 727 378 تەڭگە بولاتىن اكىمشىلىك جاۋاپكەرشىلىككە تارتىلدى. بۇگىندە جالپى سوماسى 129 781 525 تەڭگە بولاتىن 613 اكىمشىلىك ايىپپۇل تولەندى.
