قامار مولدابەكوۆا دەكرەتتە جۇرگەندە ەشكى ءسۇتىن ساتۋمەن اينالىسۋدى شەشىپتى. «باستاۋ بيزنەس» جوباسى بويىنشا وقۋدان وتكەن جاس ازاماتشا 7 باس ەشكى ساتىپ الادى.
ء«بىز بالامىزعا ەشكى ءسۇتىن بەرمەك بولدىق. بىراق ءبىزدىڭ قالامىزدا ونى الۋ قيىنعا سوقتى: 1 بوتەلكەسىن 15 مىڭعا ساتىپ الاسىڭ نەمەسە باسقا جاققا بارۋعا تۋرا كەلدى. بۇل, بىرىنشىدەن, ىڭعايسىز, ەكىنشىدەن, ءونىمنىڭ جوعارى ساپاسىنا كەپىلدىك بەرمەيدى. سوندىقتان ءبىز ءوزىمىز ءۇشىن ءبىر ەشكى الدىق. سوسىن نەگە وسى نارسەمەن اينالىسىپ كورمەسكە دەپ ويلاندىم. مىنە, مامىر ايىندا ماعان گرانت بەردى, شىلدە ايىندا ساتا باستادىق. ازىرگە ادامدار ءبىز تۋرالى ءبىر-بىرىنەن ەستىپ-ءبىلىپ جاتىر, بىراق ءىسىمىزدى ودان ءارى كەڭەيتۋدى جانە ءونىم جەتكىزۋدى قولعا الۋدى جوسپارلاپ وتىرمىز», دەدى كەلىنشەك.
«باستاۋ بيزنەس» جوباسىنىڭ تاعى ءبىر قاتىسۋشىسى تەك گرانتپەن شەكتەلمەۋگە شەشىم قابىلدادى. امانجول سابدانبەكوۆ ۇلكەن جوسپارلار قۇرا وتىرىپ, الدىمەن گرانت ەسەبىنەن تبس اشىپ, نارىقتا ورنىعىپ الدى. سودان كەيىن بيزنەستى كەڭەيتۋ قاجەتتىلىگىن نەگىزدەپ, «ەڭبەك» مەملەكەتتىك باعدارلاماسى شەڭبەرىندە ءوز جوباسىن ىسكە اسىرۋعا جەڭىلدەتىلگەن كرەديت الدى.
الماتى وبلىسىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ اقپاراتى بويىنشا, بيىل وڭىردە «ەڭبەك» مەملەكەتتىك باعدارلاماسىنا 48,7 مىڭ ادام قاتىستى. 33,2 مىڭ ادام جۇمىسقا ورنالاستىرىلدى, ونىڭ ىشىندە 16,7 مىڭ ادام تۇراقتى جۇمىسقا تۇردى. 1 659 ادام گرانت, ال 815 ادام ءوز ءىسىن دامىتۋعا ميكروكرەديت الدى. كاسىپكەرلىك نەگىزدەرىنە وقىتۋ ماقساتىندا «باستاۋ بيزنەس» جوباسىنا 3 639 ادام قاتىستى.
مەملەكەتتىك باعدارلامانىڭ ءۇشىنشى باعىتى اياسىندا 1 343 ادام سۋبسيديالاناتىن جۇمىس ورىندارىنا, 1 793 تۇلەك جاستار پراكتيكاسىنا جىبەرىلدى, 18 717 ادام قوعامدىق جۇمىستارعا تارتىلدى. سونىمەن قاتار 2 458 ادام قىسقا مەرزىمدى كاسىپتىك وقۋعا جانە 1 535 ادام تەحنيكالىق جانە كاسىپتىك وقۋعا جىبەرىلدى.
بۇدان بۇرىن حابارلاعانداي, بيىل قازاقستان بويىنشا «ەڭبەك» باعدارلاماسىنا 526 مىڭنان استام ادام قاتىسىپ, ءتۇرلى قولداۋ تۇرلەرىن الدى. 338,2 مىڭ ادام جۇمىسقا ورنالاستىرىلدى, ونىڭ ىشىندە تۇراقتى جۇمىسقا 189,4 مىڭ ادام, مەملەكەت سۋبسيديالايتىن جۇمىس ورىندارىنا 187,3 مىڭ ادام جۇمىسقا ورنالاستىرىلدى. 9,6 مىڭ جەڭىلدەتىلگەن كرەديت جانە 38 مىڭ قايتارىمسىز گرانت بەرىلدى. «باستاۋ بيزنەس» جوباسى بويىنشا كاسىپكەرلىك نەگىزدەرىنە قىسقا مەرزىمدى وقىتۋدان 33,2 مىڭ ادام ءوتتى.
