2018-2019 وقۋ جىلىندا ەلىمىزدەگى وقۋ ورىندارى اراسىنداعى باسەكەگە قابىلەتتىلىك بويىنشا جەتىسۋ ۋنيۆەرسيتەتى 10-ورىننان كورىنسە, 2019-2020 وقۋ جىلىندا بۇل كورسەتكىش وڭ باعىتتا وزگەرىپ, ءبىر ساتىعا جوعارىلاعان ەكەن. ياعني IQAA-Ranking تاۋەلسىز زەرتتەۋلەر اگەنتتىگىنىڭ دەرەگى بويىنشا جەتىسۋلىق ءبىلىم ورداسى وتاندىق 18 ۋنيۆەرسيتەتتىڭ اراسىندا سەگىزىنشى ورىندا تۇر. سونىمەن قاتار جەتىسۋ ۋنيۆەرسيتەتى Academic Ranking of World Universities – European Standard حالىقارالىق جوعارى وقۋ ورىندارى رەيتينگىنە دە قاتىسىپ, وقىتۋ ساپاسى بويىنشا «ا» كاتەگورياسىن يەلەنگەن. ياعني ءدال وسى ولشەم بويىنشا قازاقستانداعى 94 جوعارى وقۋ ورنى قاتىسقان حالىقارالىق باسەكەدە تالدىقورعانداعى ۋنيۆەرسيتەتتىڭ 7-ورىنعا كوتەرىلگەنىن ايتا كەتكەن ءجون. جالپى, ۋنيۆەرسيتەت تۇلەكتەرىنىڭ جۇمىسپەن قامتىلۋى دا جولعا قويىلعان. ماسەلەن, وتكەن جىلدارى ۋنيۆەرسيتەتتى بىتىرگەن 781 تۇلەكتىڭ 78 پايىزى تۇراقتى جۇمىسقا ورنالاسقان.
جاقىندا ءى.جانسۇگىروۆ اتىنداعى جەتىسۋ ۋنيۆەرسيتەتى وقۋ پروتسەسىن جەتىلدىرۋ جولىندا وقىتۋشىلار مەن ستۋدەنتتەرگە قولايلى جاعداي جاساۋ ءۇشىن الماتى وبلىسىنداعى ءىرى كاسىپورىندارمەن ءتورت تاراپتى كونسورتسيالدى كەلىسىم جاسادى. قول قويىلعان كەلىسىمنىڭ نەگىزىندە الماتى وبلىسىنىڭ وڭىرلىك كاسىپكەرلەر پالاتاسى ۋنيۆەرسيتەت قىزمەتكەرلەرىنىڭ جالپى ءبىلىمى مەن بىلىكتىلىك دەڭگەيىن ارتتىرۋعا ارنالعان تەوريالىق جانە پراكتيكالىق شەبەرلىك سىنىپتارىن, سەمينار, ترەنينگتەردى بىرلەسىپ ۇيىمداستىرۋدى ىسكە اسىراتىن بولادى.
سونداي-اق ۋنيۆەرسيتەتتىڭ جاس عالىمدارى مەن ستۋدەنتتەرىنىڭ ستارتاپتار مەن عىلىمي جوبالارىن قولداۋ ءۇشىن ينۆەستورلاردى, ياعني دەمەۋشىلەردى ىزدەيدى. مۇنان بولەك, الماتى وبلىسىنىڭ وڭىرلىك دامىتۋ ورتالىعى عىلىمي ءىس-شارالاردى ۇيىمداستىرۋعا كومەكتەسىپ, عىلىمي-زەرتتەۋ جۇمىستارىن جۇرگىزۋدە كەڭەس بەرەدى. ال «الاتاۋ» تەحنوپاركى جشس – «يننوۆاتسيالىق تەحنولوگيالار پاركى» ارنايى ەكونوميكالىق ايماعىنىڭ باسقارۋشى كومپانياسى» كەلىسىمگە قاتىسۋشى مامانداردى دايارلاۋدى, قايتا دايارلاۋدى جانە ولاردىڭ بىلىكتىلىگىن ارتتىرۋدى ۇيىمداستىرۋعا جاردەمدەسۋگە, مامانداردى ءارتۇرلى فورماتتا وقىتۋعا كومەكتەسۋدى مىندەتىنە الىپ وتىر.
– جالپى, ءبىلىم ساپاسىن ارتتىرۋ مەن تۇلەكتەردى جۇمىسپەن قامتۋ ماقساتىندا ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتى كەشەندى جۇمىس اتقارىپ كەلەدى. الماتى وبلىسى اگرارلىق ايماق بولعاندىقتان, وڭىرگە قاجەتتى ماماندىقتاردى زەردەلەپ, الداعى 4 جىلدا قانداي ماماندار دايارلاۋ قاجەت, قانداي ءبىلىم باعدارلامالارىنا باسىمدىق بەرۋ كەرەك ەكەنىن انىقتاپ, سول بويىنشا وقۋ باعدارلاماسىن جاساۋدى قولعا الدىق. سونىمەن قاتار جىل بويى وبلىستاعى بارلىق مەكەمەمەن تىعىز بايلانىس جاساپ, بوس ورىنداردى انىقتايمىز. بۇل بويىنشا تۇلەكتەرگە ماعلۇمات بەرىپ, مەكەمە باسشىلارىمەن كەزدەسۋ ۇيىمداستىرامىز. ءوز بىلىمگەرلەرىن تۇراقتى جۇمىسپەن قامتۋ ماقساتىندا جەتىسۋ ۋنيۆەرسيتەتى جاڭا باستامانى قولعا الدى. بۇل باستاما بويىنشا, ەگەر ستۋدەنت وندىرىستىك تاجىريبەدەن وتۋگە بارعان مەكەمەدە ءوزىنىڭ ءبىلىمى مەن قابىلەتىن دالەلدەپ, جۇمىسقا ورنالاسۋعا مۇمكىندىك تۋسا, بىلىمگەرگە سوڭعى كۋرستى قاشىقتان وقۋعا مۇمكىندىك بەرەمىز. بۇل ءادىس ءوز كەزەگىندە, تۇلەكتى جۇمىسپەن قامتىپ قانا قويماي, ءوز كاسىبى بويىنشا تاجىريبە جيناۋىنا جول اشادى, – دەيدى ءى.جانسۇگىروۆ اتىنداعى جەتىسۋ ۋنيۆەرسيتەتىنىڭ رەكتورى قۋات بايمىرزاەۆ.
الماتى وبلىسى
