مىسالى, "اباي مەكتەبى" مەن جازۋشىلار قاۋىمى ارقا سۇيەيتىن تىرەك بولاتىن وردا اشىلۋى كەرەك. سونداي-اق سانسىز بابتار مەكەنى سايرامنىڭ تىڭ قۇپيالارىن اشىپ, تىلسىم تاريحىن زەرتتەۋ ۇسىنىلدى. تۇركىستاندى ۋاقىت تالابى قاجەت ەتەتىن ۇلتتىق كودتان اۋىتقىماي وتىرىپ دامىتۋ ەسكە سالىندى.
ءوڭىردىڭ جاي-كۇيى, مادەنيەت, رۋحانيات, ءبىلىم, تۋريزم سالالارى, ونەر مەن ءتىلدىڭ احۋالى اڭگىمە ارقاۋىنا اينالىپ, كەلەلى كەڭەسكە ۇلاسقان باسقوسۋ بارىسىندا زيالىلار ءوز ۇسىنىس-تىلەكتەرى مەن ويلارىن بۇكپەسىز ورتاعا سالدى. ال تاريح عىلىمدارىنىڭ دوكتورى, پروفەسسور جامبىل ارتىقباەۆ ساۋرانداعى كونەدەن قالعان كارىز جولدارى جايلى ءسوز ەتتى. ءالى كۇنگە دەيىن ساقتالعان اۋماقتى قايتا جانداندىرىپ, ادەمى دۇنيەگە اينالدىرۋدى ۇسىندى. بۇل كارىزدى ءۇندىستاننان اكەلىنگەن قۇلدار نەمەسە يراندىقتار جاساعان, دەگەن بولجام بار. "ىستىق ولكەلەردە قاشان دا كارىز قۇدىقتارى پايدالانىلعان. كارىزدەن شىققاندا الاڭبۇلاق دەگەن بۇلاق بار. الاڭبۇلاقتان تۇركىستانعا دەيىن ونشاقتى قۇدىقتىڭ ءىزى جاتىر. سۋ الاڭبۇلاققا دەيىن كەلىپ تۇركىستانعا جەراستى جولدارىمەن جەتكەن. "تۇركىستان جاۋگەرشىلىك زاماندا قالاي قورعاندى" دەسەك, وسى سۋدىڭ ارقاسىندا قورعانىپ وتىرعان. اۋىلدىڭ كارىز اتانىپ كەتكەنى دە سودان بولعان. جەر استى سۋلارىن ءبىر ورىنعا جيناپ, ونى جەر بەتىنە شىعارىپ, شارۋاشىلىققا پايدالانۋ ءۇشىن كولبەي قازىلعان قۋىس ارنا – كارىزگە جاۋاپتى ادامدار دا بولعان. مىنە بۇل دا ءبىر تۇركىستاننىڭ ەرەكشە قۇپيالارىنىڭ ءبىرى, دەدى جامبىل ومار ۇلى.
ساكەن قالقامانوۆ كەزدەسۋدە ايتىلعان بارلىق ۇسىنىستاردى نازارعا الدى. زيالى قاۋىم وكىلدەرىنە قۇرمەت كورسەتىپ, سىي-سياپات جاسادى. سونداي-اق "الاتاۋ مەديا-ورتالىعىن" ارالاپ, تۇركىستان تورىندە ورناتىلعان حاكىم ابايدىڭ جاڭا ەسكەرتكىشىنە بارعان زيالىلار ۇلى اقىن ءمۇسىنىنىڭ ەرەكشەلىگىنە جوعارى باعاسىن بەردى.
