دەنساۋلىق ساقتاۋ ءمينيسترى اتاپ وتكەندەي, كوروناۆيرۋس ينفەكتسياسى بۇكىل الەمدەگى دەنساۋلىق ساقتاۋ جۇيەسىنە ۇلكەن اۋىرتپالىق ءتۇسىردى. قالىپتاسقان جاعدايعا بايلانىستى وڭىرلەردە ۆولونتەرلەر قوعامدىق باقىلاۋ توبىن قۇرىپ, بىرنەشە اي دەنساۋلىق ساقتاۋ, ءبىلىم بەرۋ وبەكتىلەرىنىڭ جانە قوعامدىق ورىندارداعى سانيتارلىق نورمانىڭ ساقتالۋىنا مونيتورينگ جۇرگىزىپ, كومەكتەسىپ كەلەدى. سونداي-اق وڭىرلىك ۇيلەستىرۋشىلەر گۋمانيتارلىق جۇكتەردى قابىلداۋعا, ونى بولۋگە بەلسەندى قاتىسادى.
383 ۆولونتەر 3 اي ىشىندە قازاقستاننىڭ 17 وڭىرىندە 4 300-دەن استام مونيتورينگتىك ءىس-شارا وتكىزدى. ولار گۋمانيتارلىق جۇكتەردى قابىلداۋعا كومەكتەستى, ادام كوپ جينالاتىن ورىنداردا مونيتورينگ جۇرگىزدى, سانيتارلىق نورمالاردى بۇزعاندارعا قاتىستى ازاماتتاردان تۇسكەن شاعىمدارعا جاۋاپ بەردى, دەنساۋلىق ساقتاۋ جانە ءبىلىم بەرۋ وبەكتىلەرىنە مونيتورينگ جاسادى.
«الەۋمەتتىك جەلىلەردەگى مونيتورينگ قوعامدىق باقىلاۋ ۆولونتەرلەرى حالىق اراسىندا جوعارى بەدەلگە يە ەكەنىن جانە جۇرت ولاردىڭ قىزمەتىنە سەنىم ارتاتىنىن كورسەتەدى», دەدى ا.تسوي.
سونىمەن قاتار بۇگىندە قوعامدىق باقىلاۋدى ۇيلەستىرۋشىلەردىڭ مەملەكەتتىك ورگان وكىلدەرىمەن, اسىرەسە وڭىرلەرمەن بايلانىستا بىرقاتار قيىندىق بار. قوعامدىق, اكىمدىك, سانيتارلىق-ەپيدەميالىق قىزمەت پەن ءىىد اراسىندا ناقتى ورتاق ۇيلەستىرۋ جوق. كەيبىر وبلىستاردا جەرگىلىكتى اتقارۋشى ورگاندارمەن قوعامدىق باقىلاۋ توبىنىڭ ءوزارا ءىس-قيمىلى فورمالدى تۇردە عانا.
«وسىعان بايلانىستى ءبىز قوعام وكىلدەرى مەن مەملەكەتتىك جانە جەرگىلىكتى اتقارۋشى ورگاندار اراسىنداعى ءوزارا ىنتىماقتاستىق پەن ۇيلەستىرۋدى رەتتەۋىمىز قاجەت», دەدى مينيستر.
كەزدەسۋ بارىسىندا قاتىسۋشىلار جوعارىدا اتالعان ماسەلەلەردىڭ شەشىمىنە قاتىستى پىكىر الماستى. دەنساۋلىق ساقتاۋ ءمينيسترى وڭىرلەردەگى دەنساۋلىق ساقتاۋ باسقارمالارىنىڭ باسشىلارىنا قوعامدىق باقىلاۋ مۇشەلەرىن قولداۋدى جانە ولارعا قاجەتتى كومەك كورسەتۋدى تاپسىردى.
