قوعام • 23 قازان، 2020

سۋديالارعا اقپاراتتىق قىسىم كۇن وتكەن سايىن كوبەيىپ كەلەدى

579 رەت كورسەتىلدى

سۋديالارعا اقپاراتتىق قىسىم كۇن وتكەن سايىن كوبەيىپ كەلەدى. بۇل تۋرالى بۇگىن ورتالىق كوممۋنيكاتسيالار قىزمەتىندەگى ءباسپاسوز ءماسليحاتىندا قر جوعارعى سوتىنىڭ ءباسپاسوز حاتشىسى ايدوس سادۋاقاسوۆ مالىمدەدى، دەپ حابارلايدى Egemen.kz

"بۇل، بۇگىنگى كۇن تارتىبىندەگى وتە وزەكتى ماسەلە. ونى پرەزيدەنتتىڭ ءوز اۋىزىنان ەستىگەنىمىزگە قۋانىشتىمىز. شىن مانىندە، سۋديالارعا اقپاراتتىق قىسىم كۇن وتكەن سايىن كوبەيىپ كەلەدى. اسىرەسە، زاڭدى بىلمەيتىن، "تۇيمەدەيدى تۇيەدەي قىلاتىن" بلوگەرلەر تاراپىنان بار. وكىنىشكە قاراي، كەيبىر كاسىبي ادۆوكاتتاردىڭ ءوزى سوت ۇكىمى شىقپاي، پروتسەسس اياقتالماي جاتىپ شەشىمدەرىن حالىققا تاڭىپ جاتادى. سۋديانىكى دۇرىس دەپ شىعاتىنداردى دا بايقاپ وتىرمىز. ارينە، مۇنىڭ ءبارى زاڭعا قايشى"، دەدى ول.

ايدوس سادۋاقاسوۆ مالىمدەگەندەي، ەلىمىزدىڭ كونستيتۋتسياسىندا ناقتى ىستەردى قاراۋ كەزىندە سۋديا تاۋەلسىز جانە وعان ەشكىمنىڭ قۇقىعى جوق ەكەندىگى جازىلعان.

"مۇنداي ارالاسۋ بولعان جاعدايدا زاڭىمىزدا شارا قولدانىلاتىندىعى كورسەتىلگەن. بىراق، بۇل زاڭ ازىرگە ءالسىز بولىپ تۇرعان سياقتى. ازاماتتاردىڭ ءسوز بوستاندىعىن جاقسى تۇسىنەمىز. الايدا، ءسوز بوستاندىعىن جەلەۋ قىلىپ، سۋديالاردىڭ تاۋەلسىزدىگىنە قول سۇعۋعا بولمايدى"، دەدى ايدوس سادۋاقاسوۆ.

قر سۋديالارىنىڭ VIII سەزىندە مەملەكەت باسشىسى قاسىم-جومارت توقاەۆ سۋديالار بۇقارالىق اقپارات قۇرالدارى تاراپىنان ءجيى قىسىمعا ۇشىرايتىندىعىن ايتقان ەدى.

سوڭعى جاڭالىقتار

ۇقساس جاڭالىقتار