بالالارعا ارنالعان ۇلتتىق ءان بايقاۋىن جىلدا ءاليا نازارباەۆانىڭ «جاندانۋ الەمى» قورى مادەنيەت جانە سپورت مينيسترلىگى مەن نۇرسۇلتان نازارباەۆ قورىنىڭ قولداۋىمەن وتكىزىپ ءجۇر. بيىل پاندەميا جاعدايىنا بايلانىستى انشىلەر ونلاين تۇردە ىرىكتەلگەن. ياعني, ولار وزدەرىنىڭ شىعارمالارىن ۇيىمداستىرۋ القاسىنا بەينەجازبا تۇرىندە جولداپتى. ۇيىمداستىرۋشىلاردىڭ ايتۋىنشا, ەلىمىزدىڭ تۇكپىر-تۇكپىرىنەن بايقاۋعا 8 جانە 12 ارالىعىنداعى 4135 بالا قاتىسقان.
ال سونشاما جاس دارىننىڭ ىشىنەن 20-سى تاڭداپ الىنىپ, ولار فينالدا رەسپۋبليكا سارايىنىڭ ساحناسىندا ءان سالدى. بۇل جولى تالىمگەرلەر ساناتىندا دانيار وتەگەن, ەردەن جاقسىمبەكوۆ, ءالي وقاپوۆ, بەيبىت قۇشقاليەۆ, ءادىلجان وماروۆ سىندى ونەرپازدار بالاۋسا تالانتتاردىڭ جانىنان تابىلدى.
ەلىمىزدىڭ ءار وبلىسىنان تاڭداپ الىنعان جيىرما بالا فينالدىق كونتسەرتكە دايىندالۋ ءۇشىن الماتىعا ءبىر جارىم اي بۇرىن ۇشىپ جەتكەن. ولار وزدەرىنىڭ تالىمگەرلەرىمەن, قويۋشى-رەجيسسەرلەر توبىمەن, كونتسەرتتىك كوستيۋمدەردىڭ ديزاينەرلەرىمەن, پروديۋسەرلەرمەن تانىسىپ, ساحناعا شىعۋدىڭ قىر-سىرىنا قانىق بولادى.
فينالدىق كونتسەرتتە قاتىسۋشىلاردىڭ ارقايسىسى وزدەرىنە ارنايى جازىلعان اۆتورلىق اندەردى ايتتى. سونداي-اق ءاربىر انگە لايىقتى قويىلىم جاسالدى. سۇلۋ حورەوگرافيا مەن ءستيلدى كيىمدەر ءاربىر ۇمىتكەردىڭ ءوزىن قالىپتاسقان ءارتىس رەتىندە سەزىنۋىنە مۇمكىندىك بەردى. ولاردىڭ شىعارماشىلىعىنا مارجان اراپباەۆا, رەنات گايسين, ديانا سنەگينا, اقەركە بۇركىتباي, رومان كيم, زارينا التىنباەۆا جانە ايان بىرباەۆ سىندى وتاندىق تانىمال ونەر يەلەرى قازىلىق ەتتى. ال «ەل تاڭداۋى» ارنايى جۇلدەسىن كورەرمەندەر notka.kz سايتى ارقىلى داۋىس بەرىپ, وزدەرى تاعايىندادى. بىزدىڭشە, وسى جولعى «بالا داۋىسىنىڭ» جاڭالىعى – اقتوبە وبلىسىنان كەلگەن ايدار اققۇلوۆ بولعان سياقتى. ول «ەل تاڭداۋىندا» جەڭىمپاز اتانىپ قويماي, بايقاۋدىڭ ءبىرىنشى جۇلدەسىن دە ۇتىپ الدى. ونىڭ فينالدا ورىنداعان «عاجايىپ الەم» ءانى بۇكىل كورەرمەننىڭ كوڭىلىنەن شىققانى داۋسىز.
بايقاۋدىڭ باس جۇلدەسى ماڭعىستاۋ وبلىسىنان كەلگەن ارمەن سااكيانعا بۇيىردى. ول كورەرمەندەر مەن قازىلار القاسىن «سامعا» انىمەن ءتانتى ەتتى. وسى جەردە ايتا كەتۋ كەرەك, بايقاۋدىڭ باس جۇلدەسىن العان جەڭىمپاز ديسنەيلەندكە جولدامامەن قوسا, قازاق ۇلتتىق ونەر ۋنيۆەرسيتەتىنىڭ گرانتىن دا ۇتىپ الدى.
«بالا داۋىسىنىڭ» ەكىنشى ورنىن جامبىل وبلىسىنان كەلگەن بەكمۇحامەد عازيزجان ۇلى مەن پاۆلودار وبلىسىنىڭ قاتىسۋشىسى لەيلا تسەچوەۆا تەڭ بولىسسە, ءۇشىنشى ورىنعا ءتورت تالاپكەر لايىق دەپ تانىلدى. ولار – الماتىلىق رۋسلان اميراسلانوۆ پەن ابىلقايىر جۇماباي, اتىراۋلىق ولەسيا كۋزمينا مەن ماڭعىستاۋ وبلىسىنان كەلگەن ايارۋ قيماعامبەت.
وسى جىلى ەلىمىزدىڭ ءاربىر وبلىسىنىڭ جانە ءىرى مەگاپوليستەردىڭ اتىنان شىققان قاتىسۋشىلارعا ءۇمىت سىيلاپ, ءتۇرلى سەزىم-كۇيلەرگە بولەگەن «بالا داۋىسىنىڭ» بەسىنشى كەزەڭى وسىلاي قورىتىندىلاندى. بىراق «بالا داۋىسى» بايقاۋى مۇنىمەن بىتپەيدى. كەلەر جىلى تاعى دا جالعاسىن تابارى ءسوزسىز.
