ماعزۇم مىرزاعاليەۆ پرەزيدەنتكە ەكولوگيا كودەكسىنىڭ ماجىلىستە قارالىپ جاتقانى تۋرالى ەگجەي-تەگجەيلى باياندادى. مەملەكەت باسشىسى اتالعان قۇجاتقا وڭ باعا بەرىپ, ەلىمىزدەگى ەكولوگيالىق جاعدايدى جاقسارتۋعا باعىتتالعان جاڭالىقتاردى اتاپ ءوتتى. قاسىم-جومارت توقاەۆتىڭ پىكىرىنشە, بۇل قۇجاتتىڭ ايرىقشا ماڭىزدىلىعى قوعامدى تابيعاتتى ايالاۋعا شاقىرۋ جانە اۋانى لاستايتىن زياندى زاتتاردىڭ كولەمىن ازايتۋعا بايلانىستى.
ەكولوگيا, گەولوگيا جانە تابيعي رەسۋرستار ءمينيسترى پرەزيدەنتكە بيىلعى ۆەگەتاتسيالىق كەزەڭنىڭ ءوتۋى جانە سۋ رەسۋرستارىنىڭ جاعدايى تۋرالى مالىمەت بەردى. ونىڭ ايتۋىنشا, بيىل سۋ دەڭگەيىنىڭ تومەن بولۋىنا جانە سۋ تاپشىلىعى قاۋپىنە قاراماستان ۆەگەتاتسيالىق كەزەڭ سالىستىرمالى تۇردە تۇراقتى ءوتتى.
سونىمەن قاتار مەملەكەت باسشىسىنا سۋ سالاسىن تسيفرلاندىرۋ تۋرالى باياندالدى. ماعزۇم مىرزاعاليەۆ تۇركىستان وبلىسى ماقتاارال اۋدانىندا سۋ ارناسىن تسيفرلاندىرۋدىڭ پيلوتتىق جوباسىنىڭ اياقتالعانى تۋرالى ايتتى. بۇل سۋ شىعىنىن ايتارلىقتاي ازايتۋعا مۇمكىندىك بەردى. وسى رەتتە, پرەزيدەنت سۋدى ءتيىمدى پايدالانۋ قاجەتتىگىنە نازار اۋداردى.
بۇدان بولەك قاسىم-جومارت توقاەۆقا بالىق شارۋاشىلىعىنىڭ جاعدايى جانە وسى باعىتتى دامىتۋدىڭ سالالىق باعدارلاماسىنىڭ ازىرلەنۋ بارىسى تۋرالى اقپارات بەرىلدى. ءمينيستردىڭ ايتۋىنشا, قازاقستان سۋ قويمالارىنىڭ الەۋەتى بالىق ءوسىرۋ كولەمىن جىلىنا 7,5 مىڭ توننادان 600 مىڭ تونناعا دەيىن ارتتىرۋعا مۇمكىندىك بەرەدى. بۇل بالىق ەكسپورتىن 300 مىڭ تونناعا دەيىن ۇلعايتۋعا ىقپال ەتەدى.
كەزدەسۋ سوڭىندا قاسىم-جومارت توقاەۆ ماعزۇم مىرزاعاليەۆكە بىرقاتار ناقتى تاپسىرما بەردى.
