اۋداندىق ءبىلىم بولىمىنە قاراستى ساۋداكەنت اۋىلىنداعى تەحنيكالىق شىعارماشىلىق ورتالىعىنىڭ ديرەكتورى مۇحتار مەلدەەۆتىڭ ايتۋىنشا, مەكتەپتەردەگى «اۆتو-21» ۇيىرمەسىنە 10-11 سىنىپتىڭ وقۋشىلارى قاتىسادى ەكەن. ناتيجەسىندە ايتەكە بي اتىنداعى مەكتەپتىڭ 11-سىنىپ وقۋشىسى باقتيار تۇرعانباەۆ «اۋىلشارۋاشىلىق تەحنيكالار مەن جابدىقتار سالاسىنداعى تەحنيكالىق قۇراستىرۋ» اتالىمى بويىنشا «شاعىن تراكتور» تاقىرىبىنداعى جۇمىسىن ءساتتى قورعاپ شىققان. سونىمەن قاتار جاس ونەرتاپقىشتىڭ جۇمىسىنا ساپارعالي بايۋليەۆ جەتەكشىلىك ەتىپ, وقۋشىعا ناقتى باعىت, باعدار بەرىپ وتىرعان.
بۇگىندە اتالعان اۋىلداعى تەحنيكالىق شىعارماشىلىق ورتالىعىندا وقۋشىلاردى ينجەنەرلىك ماماندىققا باۋلۋ جۇمىستارى جۇرگىزىلۋدە. مۇنداعى جۇمىس ءوزىنىڭ ناتيجەسىن بەرىپ تە ۇلگەردى. ال باقتياردىڭ قۇراستىرعان بۇل تراكتورى ارىق قازىپ, جەر جىرتۋعا قولايلى ەكەن. سونداي-اق ول جانارمايدى دا اسا كوپ قاجەت ەتپەيتىن تەحنيكا. بۇگىندە ءارتۇرلى تەحنيكانىڭ بولشەكتەرىنەن قۇراستىرىلعان شاعىن تراكتورعا اۋدانداعى ديقاندار دا قىزىعۋشىلىق تانىتىپ وتىر. الداعى ۋاقىتتا ءوزى شاعىن, ءوزى ۇنەمشىل تەحنيكا جەرگىلىكتى شارۋالاردىڭ كادەسىنە جاراۋى مۇمكىن.
جامبىل وبلىسى
