بريفينگ بارىسىندا وبلىس مەكتەپتەرىندە وقۋ پروتسەسىن ۇيىمداستىرۋ ءۇشىن كومپيۋتەرلىك تەحنيكانى ساتىپ الۋدىڭ اشىقتىعى مەن ايقىندىعىن قامتاماسىز ەتۋ ماسەلەلەرى قارالدى.
2020-2021 وقۋ جىلىنىڭ باسىندا 647 مەملەكەتتىك مەكتەپتىڭ 271-ءى قاشىقتىقتان وقىتۋ فورماتىنا كوشىرىلدى. سانيتارلىق تالاپتاردى قاتاڭ ساقتاي وتىرىپ شتاتتىق رەجيمدە 373 مەكتەپ ءبىلىم الۋدا. قاشىقتىقتان وقىتۋدى ۇيىمداستىرۋ ماقساتىندا بيىل قازاقستان رەسپۋبليكاسى ۇكىمەتىنىڭ رەزەرۆى ەسەبىنەن ءبىزدىڭ وبلىسىمىزعا 4 ملرد 105 ملن 381 مىڭ تەڭگە ءبولىندى.
ۇكىمەت رەزەرۆىنىڭ قاراجاتى ەسەبىنەن كومپيۋتەرلىك تەحنيكانى ساتىپ الۋ "شىعىس – ادالدىق الاڭى" جوبالىق كەڭسەسىنىڭ, جەرگىلىكتى اتقارۋشى ورگانداردىڭ, اتا-انالار قوعامداستىعىنىڭ وكىلدەرى, دەپۋتاتتار, تاۋەلسىز بايقاۋشىلار كىرگەن جۇمىس توبىنىڭ قاتىسۋىمەن اشىق وتكىزىلدى. بۇگىنگى كۇنى كومپيۋتەرلىك تەحنيكانىڭ كەزەكتى پارتياسى كەلدى جانە ول تەحنيكالىق ەرەكشەلىككە سايكەستىگى, زاقىمدانۋدىڭ بار-جوعى تەكسەرىلدى.
قازىرگى تاڭدا 3754 دانا پلانشەت, 880 كومپيۋتەر تولىق كولەمدە بەرۋگە دايىن. الداعى ۋاقىتتا 1879 دانا كومپيۋتەرلەردىڭ قالعان بولىگىن جانە اپتانىڭ سوڭىنا دەيىن نوۋتبۋكتەردىڭ قالعان بولىگىن جەتكىزۋ جوسپارلانىپ وتىر.
بۇل ۇدەرىستىڭ اشىقتىعىن ايماقتىق سىبايلاس جەمقورلىققا قارسى ءىس-قيمىل دەپارتامەنتى مەن "شىعىس – ادالدىق الاڭى" جوبالىق كەڭسەسىنىڭ وكىلدەرى كىرەتىن ارنايى جۇمىس كوميسسياسى قاداعالايتىن بولادى.
