"مادەنيەت جانە سپورت مينيسترلىگى وسىمەن قاتارىنان ءۇشىنشى جىل رەسپۋبليكالىق "رۋحاني قازىنا" فەستيۆالىن ۇيىمداستىرىپ كەلەدى.
جاھاندانۋ زامانىندا رۋحاني قۇندىلىقتاردىڭ ماڭىزى مەن ءمانى بۇرىنعىدان دا ارتا ءتۇستى. ويتكەنى, بۇكىل الەم زاماناۋي نانوتەحنولوگيالاردىڭ ءتىلىن مەڭگەرۋدە. ءبىزدىڭ ەل دە بۇل ۇردىستەن قالىس قالىپ جاتقان جوق. وسىنداي كەزەڭدەردە مادەنيەت پەن ونەر سالاسى دا تىس قالماۋى ءتيىس. سەبەبى, رۋحاني ازىقتىڭ قاينار بۇلاعى ءبىلىم مەن ادەبيەتتە, ونەر مەن مادەنيەتتە جاتىر.
ءدال وسى ماقساتپەن ەلدەگى ەپيدەميولوگيالىق جاعدايدى ەسكەرە وتىرىپ تۇڭعىش رەت ونلاين فورماتتا فەستيۆال وتكىزدىك. ناتيجەسى دە جامان ەمەس. ياعني, بەلسەندىلىك, قاتىسۋشىلار جاعىنان قىزىعۋشىلىق باسىم. بيىل نوميناتسيا سانى دا ءبىرشاما ارتتى. جەڭىمپازداردى ىنتالاندىراتىن قارجىلاي جۇلدە قورى دا از ەمەس.
الايدا, ەڭ باستى ماقسات بۇل ەمەس. فەستيۆالگە ەلىمىزدىڭ تۇكپىر-تۇكپىرىنەن مادەنيەت جاناشىرلارى اتسالىستى. الىس اۋىل, اۋدان, مونوقالالار مەن ءىرى قالالارداعى مادەني ويىن-ساۋىق وشاقتارى, كىتاپحانا, مۋزەي قىزمەتكەرلەرى قاتىستى. ياعني, ءبارى ءبىر ورتاعا, ءبىر الاڭعا جينالىپ پىكىر الماسىپ, بىرەۋى بىلمەگەنىن ەكىنشىسىنەن سۇراپ, تاجىريبە جيناقتادى. مينيسترلىكتىڭ ەڭ باستى كوزدەگەنى دە وسى بولاتىن.
قازىلار القاسى ءۇش كۇن قاتارىنان ونلاين فورماتتا جىبەرىلگەن جۇمىستاردى قارادى. ۇزدىگىن ساراپتادى. بۇگىن سونىڭ ناتيجەسىن جاريالار ءسات تۋدى.
"ەل ءىشى – ونەر كەنىشى" دەيدى دانا حالقىمىز. ۇلتتىق مۇرالارىمىزدىڭ ۇمىت بولماۋى جولىندا, بار سالماق وزدەرىڭىزگە تۇسەدى. سوندىقتان ەلىمىزدىڭ ءار وڭىرىنەن كەلگەن مادەنيەت جاناشىرلارىنا مىڭ العىس!", دەدى اقتوتى رايىمقۇلوۆا.
ايتا كەتەيىك, وسىمەن ءۇشىنشى رەت وتكەن بايقاۋعا مەملەكەتتىك مۋزەي, كىتاپحانا, مادەنيەت ۇيلەرى مەن اۋىل كلۋبتارىنان جالپى سانى 259 ءوتىنىم ءتۇستى. ونىڭ ىشىندە 119 – كىتاپحانا, 90 – مادەني ويىن-ساۋىق وشاعى مەن 50 مۋزەي بار.
ءار نوميناتسيا بويىنشا جەڭىمپاز ۇجىمعا 1 000 000 تەڭگە, ءار نوميناتسيا بويىنشا جەڭگەن جەكەلەي ازاماتقا 500 000 تەڭگە تابىستالدى. جالپى نوميناتسيا سانى 50.
سونداي-اق ۇزدىك دەپ تانىلعان وزگە دە ونەرپازدارعا "ارنايى جۇلدەلەر" قاراستىرىلعان. ماراپاتتاۋ راسىمىنە وڭىرلەردەن بارلىق جەڭىمپاز قاتىستى.
