"جاراتىلىستانۋ عىلىمدارى سالاسىنداعى عىلىمي زەرتتەۋلەر باسىم باعىتى بويىنشا 2020-2022 جىلدارعا ارنالعان عىلىمي جانە عىلىمي-تەحنيكالىق جوبالار" گرانتتىق قارجىلاندىرۋ كونكۋرسىنا ماحامبەت ۋنيۆەرسيتەتىنىڭ جاراتىلىستانۋ-گەوگرافيا فاكۋلتەتى عالىمدارى ۇسىنعان جوبا جەڭىمپاز اتاندى.
"باتىس قازاقستان سۋ قويمالارىنىڭ گيدروبيونتتارى مەن ميكروبيومدارى جاعدايىن باعالاۋ جانە ولاردىڭ وزگەرىسىن بولجاۋ» اتتى بۇل جوبا ءوڭىر ءۇشىن وتە وزەكتى بولاتىن. ۇلتتىق عىلىمي كەڭەس ماقۇلداعان عىلىمي جوبانىڭ جالپى سوماسى 56,5 ملن. تەڭگە. ەندى ۋنيۆەرسيتەت رەكتورى, بيولوگيا عىلىمدارىنىڭ كانديداتى, قاۋىمداستىرىلىعان پروفەسسور نۇرلان سەرعاليەۆتىڭ عىلىمي جەتەكشىلىگىمەن ورالدىق بيولوگ, گەوگراف عالىمدار 27 اي بويى باتىس قازاقستان سۋ قويمالارىنىڭ گيدروبيونتتارى مەن ميكروبيومدارىنىڭ قازىرگى جاعدايىن زەرتتەيدى. بۇل جوباعا رەسەي فەدەراتسياسىندا وقىپ جاتقان جاس عالىمدار ا.سارمانوۆ پەن ە.سۇلتانوۆ تا قاتىسپاق. ولار بيولوگيالىق باعىت بويىنشا عىلىمي مەكتەپتى دامىتۋ شەڭبەرىندە ۋنيۆەرسيتەت قارجىسى ەسەبىنەن قازان فەدەرالدى ۋنيۆەرسيتەتىنىڭ اسپيرانتۋراسىندا ءبىلىم الىپ جاتقان بولاتىن.
سونىمەن قاتار زەرتتەۋ جۇمىسىن جۇرگىزۋگە ۋنيۆەرسيتەتتىڭ ماگيسترانتتارى مەن ستۋدەنتتەرى دە تارتىلادى.
ء"بىز وسى ۋاقىتقا دەيىن ومىرلىك قاجەتتى ءۇش تىرەۋدىڭ باسىن بىرىكتىرە الماي جۇردىك. مىنە, ەندى ءبىلىم – عىلىم – ءوندىرىس ۇشتىگىنىڭ باسىن قوساتىن ناقتى زاڭ قابىلدانىپ, ناتيجەلى جۇمىس ىستەي باستادى. ءوندىرىستى دامىتۋشى عىلىمدى ينۆەستيتسيالاۋدىڭ حالىقارالىق قالىپتاعى جۇيەسى ەندى ءبىزدىڭ ەل ومىرىنە دە ەنە باستادى. بۇعان دەيىن عىلىم قاراجاتقا ءزارۋ بولىپ, عالىمدار اشقان جاڭالىقتار وندىرىسكە جولداما الماي كەلسە, ەندى ونداي توقىراۋ بولمايدى", دەيدى جوبا جەتەكشىسى, ۋنيۆەرسيتەت رەكتورى نۇرلان سەرعاليەۆ.
رەكتوردىڭ ايتۋىنشا, ەلىمىزدە عىلىمدى ينۆەستيتسيالاۋدىڭ بىرنەشە ارناسى جۇمىس ىستەي باستاعان. ماسەلەن عىلىمي-زەرتتەۋلەر ءۇشىن ارنايى مەملەكەتتىك ماقساتتى گرانتتار ءبولۋ, مەملەكەتتىك تاپسىرىستار بويىنشا عىلىمي-زەرتتەۋ جوبالارىن جۇزەگە اسىرۋ, عىلىمعا بولىنەتىن قارجىنى عالىمداردىڭ ءوز ەكشەۋىنەن وتكىزە وتىرىپ ءبولۋ, اقىر اياعىندا جەكە كاپيتالدى ينۆەستيتسيا رەتىندە تارتۋ ارنالارى پايدا بولدى. اشىلعان جاڭالىقتاردى وندىرىسكە ەنگىزۋ ءىسى جەڭىلدەي ءتۇستى. قازىر ۇكىمەت دەڭگەيىندە جوعارى عىلىمي-تەحنولوگيالىق كەڭەس جۇمىس ىستەيدى. بۇل كەڭەس سالالىق عىلىمي كەڭەستەردىڭ ۇسىنىستارىن ەكشەۋدەن وتكىزەدى.
"سايىپ كەلگەندە, ءبارىنىڭ دە مۇددەسى عىلىمدى ينۆەستيتسيالاۋ, جاڭالىقتى وندىرىسكە كىدىرىسسىز ەنگىزۋ جۇمىستارىن جۇيەگە تۇسىرگەن, جەمىستى ەتەتىن ءبىر جاڭا ارنا بولعانىن ايتا كەتۋ كەرەك. وتكەن جىلى جاس عالىمدار ءۇشىن بەرىلەتىن گرانتقا 3 ملرد تەڭگە قارجى بولىنگەن. ال بيىل "جاس عالىم" جوباسى قولعا الىنىپ, جاس عالىمدار ءۇشىن 1000 زەرتتەۋ گرانتى بولىنگەلى وتىر. بۇل جاس عالىمداردىڭ يننوۆاتسيالىق يدەيالارى مەن ستارت-اپ جوبالارىن جۇزەگە اسىرۋعا زور مۇمكىندىك", دەيدى نۇرلان حابيبوللا ۇلى.
