ءۇيدىڭ اۋلاسىندا ويناپ جۇرگەن توپ بالانىڭ ءبىرى بايقاماي بەتى ەسكى كورپەمەن جابىلعان, تەرەڭدىگى التى مەترگە جەتەتىن اشىق قۇدىققا ءتۇسىپ كەتەدى. اتا-اناسى بولعان جايدى بالانىڭ قاسىندا جۇرگەن اپكەسىنەن ءبىلىپتى. «ۆوۆا قۇلاپ كەتتى! ۆوۆا قۇلاپ كەتتى!» دەپ قايتالاي بەرگەن كورىنەدى. قۇدىقتىڭ ىشىنەن ۇزدىگە شىققان داۋىستان بالانىڭ كەپتەلىپ قالعانى بەلگىلى بولادى. الايدا اتا-انا قانشا جانتالاسقانىمەن بالانى ءوز كۇشىمەن قۇتقارا المايدى. ۋاقىت بولسا زىمىراپ ءوتىپ جاتىر. تەك كەشكە قاراي عانا ءورت ءسوندىرۋ بولىمىنە حابار بەرىپ, كەزەكشىلىكتەگى جىگىتتەر دەرەۋ قۇتقارۋعا اتتانادى. ولار اۋىلعا اۋدان ورتالىعىنان نەبارى 20 مينۋتتا جەتىپ, جاعدايدى كوزبەن كورگەن سوڭ تەز ارادا شۇڭقىردى قازا باستايدى. ەكسكاۆاتور مەن كراندى كومەككە الدىرادى. ۇزاق ۋاقىت بويى توزىمدىلىك تانىتقان بالاقايدى باتىر دەپ باعالاپ, ۆوۆاعا جىگەر بەرەدى.
ءسويتىپ شۇڭقىر دا قازىلادى. ەندى بالانى شىعارۋ كەزىندە ونىڭ ودان ءارى ءتۇسىپ كەتپەۋى ءۇشىن قۇدىقتىڭ ناقتى قاي دەڭگەيىندە تۇرعانىن انىقتاۋ قاجەت بولىپتى. ءورت سوندىرۋشىلەر شۇڭقىرعا ءتۇسىپ, كوزگە كورىنبەيتىن جەردە ارنايى قۇرالمەن تەسىك جاساپ, ارماتۋرانى وتكىزەدى. بولدى! تۇراقتىلىق بار! بولىمشە كومانديرى, ازاماتتىق قورعاۋ ستارشيناسى ەرجان وسپانوۆ ارىپتەستەرىنىڭ كومەگىمەن بالاعا كومەك كورسەتۋ ءۇشىن قۇدىققا ءوزى ءتۇسىپ, دەرەۋ بالاعا جارماسادى. بالاقايدى وزىنە قىسىپ ۇستاپ العان سوڭ وزگە قۇتقارۋشىلار ەكەۋىن جوعارىعا كوتەرە باستايدى. اۋىلدىڭ بارلىق تۇرعىنى ءورت سوندىرۋشىلەر جۇرگىزگەن وسى قۇتقارۋ وپەراتسياسىنىڭ كۋاگەرلەرى بولدى.
ەرلىك ەسكەرۋسىز قالعان جوق. ەلباسى نۇرسۇلتان نازارباەۆتىڭ 2012 جىلعى 5 جەلتوقسانداعى جارلىعىمەن اسكەري جانە قىزمەتتىك بورىشىن ورىنداۋ كەزىندە كورسەتكەن ەرلىگى مەن جانقيارلىعى ءۇشىن جەلەزين اۋدانىن كۇزەتۋ بويىنشا №16 ءورت ءسوندىرۋ بەكەتىنىڭ ازاماتتىق قورعاۋ ستارشيناسى ەرجان وسپانوۆ ءۇشىنشى دارەجەلى «ايبىن» وردەنىمەن ماراپاتتالدى.
ەرجان وسپانوۆ ءوزى قۇتقارعان بالامەن كۇنى بۇگىنگە دەيىن ارالاسىپ جۇرەدى. وسى كۇنى ۆلاديمير شتۋتس ەسىمدى الگى بالاقاي وسى اۋىلداعى جالپى ءبىلىم بەرەتىن ورتا مەكتەپتىڭ 4-سىنىبىندا وقيدى. «مەن ونى كورگەن سايىن ءىشىم جىليدى. ونى ءوز ۇلىمداي كورەمىن. 2012 جىلى ءبارى ويداعىداي وتكەنىنە قۋانىشتىمىن», دەپ اعىنان جارىلدى ە.وسپانوۆ.
ايدانا جاقىپوۆا
پاۆلودار وبلىسى
