"22 ادام باس تارتتى, اۆتوبۋستا وتىردى جانە كىرگىسى كەلمەدى. ءبىز كوندىرۋگە تىرىستىق, ولار جانجال شىعارىپ باعىنبادى. سەبەپتەرى ءارتۇرلى بولدى. تۇنگە دەيىن تۇسىندىرگەن سوڭ, كارانتيندىك ستاتسيونارعا ءبىر-بىردەن كىرە باستادى", دەيدى "رامادا پلازا" كارانتيندىك ستاتسيونارىنىڭ ديرەكتورى جۇلدىز دانباەۆا.
نارازىلىق بىلدىرۋشىلەردىڭ ءبىرى - 42 جاستاعى قالا تۇرعىنى. ول سىناق ناتيجەلەرىن كۇتكىسى كەلمەيتىنىن ايتىپ, مەكەمەدەن كەتۋگە تىرىسقان. پوليتسەيلەر ەر ادامعا قاتىستى شارالار قابىلدادى.
"ەر ادام ايەلىمەن جانە بالاسىمەن تۇركيادان ۇشىپ كەلدى. ونىڭ وتباسى بارلىق پروتسەدۋرالاردان وتسە دە, ول تالداۋ ناتيجەلەرىن كۇتپەيتىنىن مالىمدەدى جانە قاشىپ كەتۋگە تىرىستى. پوليتسەيلەر شارا قولداندى", دەپ ءتۇسىندىردى جۇلدىز دانباەۆا.
دارىگەرلەر مۇنداي جاۋاپسىز ازاماتتار تەك جاقىندارىنىڭ عانا ەمەس, جالپى ەلدىڭ دەنساۋلىعىنا قاۋىپ توندىرەدى دەپ ەسكەرتەدى. سونداي-اق, سانيتارلىق نورمالاردى ساقتاماعانى ءۇشىن, ماسكا تاقپاعانى ءۇشىن ءتارتىپ بۇزۋشىلار اكىمشىلىك جاۋاپكەرشىلىككە تارتىلادى.
"كوكتەمدە ءبارى وسىلاي باستالدى, ەلدىڭ تۇكپىر-تۇكپىرىنەن كەلگەندەر ارقىلى ينفەكتسيا كەڭىنەن تاراپ كەتتى. وسىنداي قارسىلىق تانىتقاندار باسقا ازاماتتارعا, جاقىندارىنا, تۋىستارىنا قاۋىپ توندىرەدى", دەيدى دارىگەر.
ەستەرىڭىزگە سالا كەتەيىك, 5 قازاننان باستاپ قازاقستاندا جاڭا شەكتەۋلەر ەنگىزىلدى. ەكىنشى ساناتتاعى ەلدەردەن كەلەتىن ادامدار ءۇشىن تەرمومەتريا, ساۋالناما جۇرگىزۋ, ءۇش تاۋلىكتەن اسپايتىن كوروناۆيرۋس تەستى تۋرالى انىقتامانىڭ بولۋى سياقتى مىندەتتى تالاپتار بەلگىلەنگەن. انىقتاما بولماعان جاعدايدا, شەتەلدەن كەلگەندەر COVID-19-عا زەرتحانالىق تەكسەرۋ جۇرگىزۋ ءۇشىن ستاتسيوناردا ەكى تاۋلىككە دەيىن وقشاۋلانادى.
