قىرعيقاباق سوعىستىڭ ءباسى
ستۋدەنت كۇندەرى كاكەن ەكى ساباقتان ازاردا-بەزەر بولاتىن. ءبىرى – «ازاماتتىق قورعانىس», ەكىنشىسى – «اسكەري دايىندىق». كەڭەس وداعى مەن اقش اراسىنداعى جانتالاسا قارۋلانۋ باسەكەسى قىزىپ تۇرعان شاقتا بۇل پاندەردىڭ تۇكىرىگى جەرگە تۇسە مە. «ازاماتتىق قورعانىستى» جۇرگىزەتىن وتستاۆكاداعى پولكوۆنيك ستۋدەنتىنەن سىناق الىپ وتىرىپ:
– اتوم بومباسى جارىلعاندا نە ىستەيسىڭ؟ – دەپ ادەتتەگى سۇراعىن قويادى. سوندا كاكەن:
– ەكى تابىت ساتىپ الامىن, – دەپ جاۋاپ بەرىپتى. مۇنداي وقىستىقتى كۇتپەگەن وقىتۋشى:
– ە-ە, نەگە ەكەۋ؟ – دەپ قالىپتى.
– بىرەۋىن – سىزگە, بىرەۋىن – وزىمە, – دەگەن ەكەن ەكىنشى كۋرستىڭ ستۋدەنتى كاكەن قامزين.
ءازىل - وسپاق, سىن - سىقاق
بىردە...
قىرعيقاباق سوعىستىڭ ءباسى
ستۋدەنت كۇندەرى كاكەن ەكى ساباقتان ازاردا-بەزەر بولاتىن. ءبىرى – «ازاماتتىق قورعانىس», ەكىنشىسى – «اسكەري دايىندىق». كەڭەس وداعى مەن اقش اراسىنداعى جانتالاسا قارۋلانۋ باسەكەسى قىزىپ تۇرعان شاقتا بۇل پاندەردىڭ تۇكىرىگى جەرگە تۇسە مە. «ازاماتتىق قورعانىستى» جۇرگىزەتىن وتستاۆكاداعى پولكوۆنيك ستۋدەنتىنەن سىناق الىپ وتىرىپ:
– اتوم بومباسى جارىلعاندا نە ىستەيسىڭ؟ – دەپ ادەتتەگى سۇراعىن قويادى. سوندا كاكەن:
– ەكى تابىت ساتىپ الامىن, – دەپ جاۋاپ بەرىپتى. مۇنداي وقىستىقتى كۇتپەگەن وقىتۋشى:
– ە-ە, نەگە ەكەۋ؟ – دەپ قالىپتى.
– بىرەۋىن – سىزگە, بىرەۋىن – وزىمە, – دەگەن ەكەن ەكىنشى كۋرستىڭ ستۋدەنتى كاكەن قامزين.
ءبىر جاپىراق قاعاز
1973 جىل. ازيا-افريكا جازۋشىلارىنىڭ الماتىداعى بەسىنشى كونفەرەنتسياسى. قازاقستان جازۋشىلار وداعى باسقارماسىنىڭ ءبىرىنشى حاتشىسى ءانۋار ءالىمجانوۆ كاكەنگە ۇلكەن ماجىلىسكە ارنايى شاقىرۋ بيلەتىن بەرەدى. الدىندا عانا ازات سۇلەەۆ, تولەۋ شاحانوۆ, ەرمۇرات جارمۇحامەدوۆ سياقتى سابازدارمەن تۇسكى توياتتان ورالعان كاكەن راقمەتتىڭ ورنىنا ءانۋار تۇرلىبەك ۇلىنا:
– ولجاس سۇلەيمەنوۆتىڭ كىتابىنا العىسوز سۇيكەپ تاستايسىز, شوقان ءالىمباەۆقا پاتەر الىپ بەرەسىز, مۇقاعالي ماقاتاەۆتى ماسكەۋگە ليتينستيتۋتقا وقۋعا جىبەرەسىز, مۇرات اۋەزوۆتى دەليگە اعىلشىن ءتىلىن ۇيرەنۋگە اتتاندىراسىز, ال مىنا مەنى ءبىر جاپىراق قاعازبەن الداندىراسىز, – دەپ بازىناسىن ايتىپ قالىپتى.
ەسەكدامە
كاكەننىڭ قازاق كسر تەلەۆيزيا جانە راديو حابارى مەملەكەتتىك كوميتەتىندە قىزمەت اتقارىپ جۇرگەن كەزى. ءبىر كۇنى باسشىلار ونى سول كەزدەگى تسەلينوگرادقا ىسساپارعا اتتاندىرادى. وقيعا ونى اڭدي ما, الدە ول وقيعانىڭ ۇستىنەن تۇسە مە, ايتەۋىر سول ۋاقىتتا قالادا نەمىس اۆتونومياسىنىڭ قۇرىلۋىنا قارسى باس كوتەرۋ بۇرق ەتە تۇسەدى. ساپاردان ورالعان قىزمەتكەردى دەرەۋ كوميتەت توراعاسىنىڭ ورىنباسارى انۋاربەك شمانوۆ شاقىرىپ, جاعداياتتىڭ ەگجەي-تەگجەيىنە قانىعادى دا:
– شەرۋشىلەردىڭ ورتاسىندا ءوزىڭ بولدىڭ با؟ – دەيدى.
– قالاي بولمايىن؟ بولدىم. سولارعا قوسىلىپ, ايعايلاتىپ, ۇرانداتىپ الاڭدى ءۇش رەت اينالىپ شىقتىم. –
كاكەننىڭ مىناداي سوزىنە ءىشى قىلپ ەتە قالعان انەكەڭ:
– بۇنىڭدى مەنەن باسقا ەشكىم ەستىمەسىن! – دەپ شىر-پىر بولادى.
– انەكە, سىزگە سەنگەننەن كەيىن ايتىپ وتىرمىن. الدا-جالدا جيىرما بەس جىلعا ايدالىپ كەتسەم, ارتىمدا ەستەلىك جازار بىرەۋ قالار دەگەن ءۇمىت قوي, – دەپ كاكەن تومەن قارايدى.
الاش ارداقتىلارىنىڭ اجالى
جاس قالامگەردىڭ «جازۋشى» باسپاسىنىڭ پروزا بولىمىنە قىزمەتكە ورنالاسقان كەزى. تولەن قاۋپىنباەۆ, بەرىك شاحانوۆ, الدان سمايىلوۆ سىندى بەلگىلى جازۋشىلار – ءبارى ءبىر بولمەدە وتىرادى. قۇمالاققا سولاي ءتۇستى مە, الدە باسقا سەبەپتەر بولدى ما, ايتەۋىر ونىڭ قولىنا عابيت مۇسىرەپوۆتىڭ «جات قولىندا» رومانى تيەدى. باس رەداكتور مۇحتار ماعاۋين كوپ سوزباۋدى, تەزدەتىپ وندىرىسكە جىبەرۋدى مىقتاپ تاپسىرادى. ءبىر كۇنى جۇمىستىڭ قىزىپ جاتقان شاعىندا باسپا ديرەكتورى سايىن مۇراتبەكوۆ عابەڭنىڭ كەلىپ كەتسىن دەگەن سالەمىن جەتكىزەدى. كاكەننىڭ جۇرەگى زىرق ەتە قالادى. وسىنىڭ الدىندا عانا ليتو قىزمەتكەرلەرى شىعارماداعى تورعاي جانە سەمەي الاشورداسى تۋرالى بەتتەردى الدىرتىپ تاستاعان-دى. عابەڭ «كوسموس» سيگارەتىن بۋداقتاتا وتىرىپ, انا تاراۋشالاردىڭ قايدا كەتكەنىن سۇرايدى. سوندا كاكەن اسپاي-ساسپاي:
– عابە, الاش ارداقتىلارى جات قولىندا وپات بولدى, – دەيدى.
ايدارىنان جەل ەسكەن
توقسانىنشى جىلدارى ءبىرىنشى كۋرستىڭ ءبىر قىزى دوتسەنت كاكەن قامزيننىڭ تاڭەرتەڭگى سەگىز جارىمداعى ساباعىنا كۇندە كەشىگەدى. ۇستازدىڭ الدىن الا كەلىسىلگەن قاتاڭ ءتارتىبى – ءبىر مينۋت قازا قىلساڭ, اۋديتورياعا كىرمەيسىڭ. الگى شاكىرتتىڭ ادەتتەگى سىلتاۋى – اۆتوبۋس كەپتەلىسى, قوڭىراۋ ساعاتىنىڭ شىرىلداماي قالۋى. كۇندەردىڭ كۇنى ابدەن شىدامى تاۋسىلعان وقىتۋشى كوپشىلىك كوزىنشە سول ۇيقىلى-وياۋ سىلقىمعا كەسەك اقشا ۇسىنادى. انا شاكىرتى مايىسىپ:
– اعاي, مۇنى قايتەمىن؟ – دەيدى. سوندا كاكەن مىرزا ونىڭ الەم-جالەم ماكياجىنا قاراپ تۇرىپ:
– اينالايىن, وسىعان ايدارىنان جەل ەسكەن, داۋىسى, زور وزىڭە لايىق ءبىر اتەش ساتىپ الشى, – دەيدى.
كورگەن بىلگەنوۆ.
الماتى.
________
«سىبايلاس جەمقورعا» قارعىس
ءبىر كەيۋانا جىلاپ وتىر,
قۇدايدان ساۋعا سۇراپ وتىر,
«سىبايلاس جەمقور» قارعاعانى,
ءبىردى-بىرگە جالعاعانى:
– و, باستان اق «زلوي» قاسقىر ەدىڭ,
قاس الباستى باسقىر ەدىڭ.
ۇرلىقپەن-اق بايىپ كەتىپ,
وزگەلەردى ۇستاتىپ, ايىپتى ەتىپ,
ءوزىڭ بىلاي تايىپ كەتىپ,
سوسىن لاۋازىمعا يە بولدىڭ.
بىردە تۇيە بولدىڭ, بىردە بيە بولدىڭ,
قىزىل سوزگە ماشىقتاندىڭ,
اۋىزدى كەڭگە اشىپ قالدىڭ.
سەن سايراپ تۇرعاندا,
كوزىڭ ويناقشىپ قايناپ تۇرعاندا,
جۇرتى قۇرعىر سيقىرلاندى,
تەندىر بولسا جەڭىستى ەدىڭ,
ءتىرى جانعا بەرىسپەدىڭ.
ەڭبەگىن جەپ تالايدىڭ,
ىشىندە تالتاڭدايسىڭ,
التىن كۇمبەز سارايدىڭ.
سەن «سىبايلاس جەمقوردىڭ»
جەتى مۇشەڭە قۇرت ءتۇسىپ,
بەس بۇكتەلىپ بۇك ءتۇسىپ,
قول ارباعا تاڭىلىپ قال.
ەلدەن ىشكەن-جەگەنىڭ,
مۇرنىڭنان شىقسىن,
جەر استىنداعى قۇردىمنان شىقسىن.
ىشكەنىڭ ءىرىڭ, جەگەنىڭ جەلىم بولسىن,
كيگەنىڭ تىرىلەي كەبىن بولسىن.
سوتقا تارتىلىپ, تۇرمەگە ءتۇس,
كاندالا بيت پەن بۇرگەگە ءتۇس,
بىراق, زاڭعا دا سەنىم جوق,
«وبششەم» جەمقور يتكە ءولىم جوق.
وسى قارعىسىمنىڭ ءبىرى بولماسا
ءبىرى كەلىپ,
«سىبايلاس جەمقور» بىتكەن,
جانازاڭا كەلسىن كۇڭىرەنىپ.
ءازىربايجان قونارباەۆ.
ماڭعىستاۋ وبلىسى.
_________________
مۇنداي دا بولادى
ادەمى «فەرراريمەن» جۇيتكىپ كەلەدى ەكەنمىن, ءبىر كەزدە... ساعاتتىڭ قوڭىراۋى شىرىلداپ وياتىپ جىبەردى!
* * *
كۇندەلىكتەگى جازبا:
«التى جىل سىرا ىشكەن جوقپىن, شىلىم شەككەن جوقپىن, قىزدارعا بارمادىم. سودان كەيىن انام مەنى مەكتەپكە اپاردى».
* * *
كوشە بويىندا وتىرعان قايىرشىنىڭ موينىنداعى جازۋ:
«1, 2, 5, 10, 20 تەڭگەلىكتەردى قابىلدامايمىن!»
* * *
سايلاۋ جاقىنداعاسىن ايەلدەر دە ءوز پارتياسىن قۇرسا كەرەك. قۇرىلتايدا ولار «ەڭ جاسى ۇلكەنىمىز پارتيا ءتورايىمى بولسىن دا, ەڭ كىشىمىز ونىڭ حاتشىسى بولسىن» دەپ كەلىسەدى. سوندا «قانە, كىمنىڭ جاسى ۇلكەن؟» دەگەندە, ەشكىم ورنىنان تۇرماپتى. ال, «جاسى ەڭ كىشىڭ قايسى؟» دەگەندە, قاتىسىپ وتىرعان ەكى مىڭ ايەل تۇگەلدەي اتىپ تۇرسا كەرەك.
ءازىلىڭ جاراسسا...
ايەلدەر «ءالديى»
– كۇيەۋىم ماعان كۇن كورسەتپەيدى.
– قول جۇمساي ما؟
– جوق, ۇيدەن شىعارمايدى...
* * *
– مەن قارتايىپ بارا جاتىرمىن.
– كىم ايتتى؟
–بۇرىن ءبارى «تۇرمىسقا قاشان شىعاسىڭ؟» دەيتىن. قازىر «تۇرمىسقا نەگە شىقپادىڭ؟» دەيتىن بولدى...
* * *
قۇربىلار ۇيدە شۇيىركەلەسىپ وتىر:
– مىنا بالاڭ تۋرا اكەسىنەن اۋماي قالىپتى...
– اقىرىن, مىنا ءسوزىڭدى كۇيەۋىم ەستىپ قويماسىن...
* * *
– سەنىڭ كۇيەۋىڭە نە بولدى؟
– قايتىس بولعان, كوپ ىشەتىن ەدى...
– جۇرت نە دەگەن باقىتتى, بايلارى ءولىپ قالادى, بىزدىكى تاستاپ كەتىپ تايراڭداپ ءجۇر...
قۇرداسىڭىزبەن قالجىڭداسا بىلەسىز بە؟
قۇرداستاردىڭ قالجىڭى دەگەندە ەسىمە سلامباي اتام تۇسەدى. ءبىزدىڭ مايبۇلاق اۋىلى ەكى قۇرداس, سلامباي مەن سەيفوللا اتالارىمىزدىڭ قالجىڭىن ءالى كۇنگە جىر قىپ ايتادى. سلامباي توقبەرگەن ۇلى 1989 جىلى قايتىس بولىپ كەتتى. سەيفوللا اشىربەك ۇلىنىڭ و دۇنيەلىك بولعانىنا ەكى-ءۇش جىلدىڭ ءجۇزى بولدى. جاتقان جەرلەرى ءجاننات بولسىن. وسى ەكى اتامنىڭ قىزىق ۋاقيعالارىن ەستىگەن سايىن قۇرداس بولىپ قالجىڭداي ءبىلۋ دە ءبىر ونەر ەكەنىن سەزەمىن.
قويشى مەن دۇكەنشى
اۋىلدىڭ قاق ورتاسىندا جاپىرەيىپ, ىرگەتاسى جەرگە كىرىپ كەتكەن جامان دۇكەن بولاتىن. سلامباي اتام سول دۇكەندە ساتۋشى. دۇكەننىڭ ءىشى تار بولعاندىقتان جاشىكتەر, تاي-تاي ماتا, ماي قۇيىلعان تەمىر بوشكە, تەمىر-تەرسەك, باسقا دا تاۋارلار ارالاسىپ, سىعىلىسىپ تۇرۋشى ەدى. ال, سەيفوللا اتامىز تاۋدا قوي باعادى. قويدى اۋىسىممەن باعادى. ياعني, ەكى كۇن تاۋدا, ەكى كۇن ۇيىندە بولادى. كىم ويلاپ تاپقانىن قايدام, ايتەۋىر, تاۋدا ەكى قويشى كەزەك اۋىستىراتىن كەزدە مىندەتتى تۇردە ءبىر شيشا اراق ءىشۋ داستۇرگە ەنىپ كەتىپتى. ياعني, اۋىلدان بارعان قويشى قورجىنعا ەكى شيشا اراق سالا بارادى, بىرەۋىن ەكەۋى قاق ءبولىپ ىشەدى, قالعان بىرەۋىن تاۋدا قالعان قويشى ەكى كۇن بويى «تالعاجاۋ» ەتەدى. ءار ەكى كۇن سايىن اراققا اقشا تابا بەرۋ وڭاي ەمەس. سودان سەيفوللا اتامىز توعايدان سارى جىلان ۇستاپ الىپ, دۇكەنگە كەلەدى ەكەن. جاراتىلىسىنان جورعالاعان نارسەدەن قاتتى قورقاتىن سلامباي اتامىز ىسىلداپ, يرەلەڭدەگەن جىلاندى كورگەندە كوزى باقىرايىپ, قابىرعاعا جابىسىپ قالاتىن كورىنەدى. سەيفوللا ءبىر قولىندا جىلان, ەكىنشى قولىمەن جاقىن تۇرعان جاشىكتەن ەكى شيشا اراقتى ءىلىپ الىپ, قارق-قارق كۇلگەن كۇيى شىعىپ كەتەدى ەكەن. وسى جاعداي بىرنەشە مارتە قايتالانىپتى.
بىردە تاعى دا اراققا اقشا تاپپاي قالعان قويشى اتامىز جىلان ۇستاپ دۇكەنگە كىرەدى عوي. جايلاپ جاشىككە قول سوزىپ جاتسا, سلامباي اتامىز «ءاي, سەيفوللا سەن ءوزى بالا بولىپ كەتكەنسىڭ بە؟ ءبىز قۇرداس ەمەسپىز بە, سۇراساڭ, ەكى شيشا اراقتى اشەيىن-اق بەرەمىن عوي», دەپتى. «ويپىرماي, سەنىڭ اقىلىڭ كىرەيىن دەپتى عوي. وسى ءسوزدى قاشان ايتار ەكەن دەپ ءجۇر ەدىم. اكەل, اراعىڭدى...», دەيدى مىناۋ ەلپ ەتىپ. دۇكەنشى ەكى شيشا اراقتى الدىنا قويا سالادى. «ە, باسە, وسىلاي بولۋى كەرەك قوي, مالادەس...», دەپ سەيفوللا اتامىز اراقتى كۇشاقتاعان كۇيى قارق-قارق ك ۇلىپ دۇكەننەن شىعا بەرەدى.
تاۋ الىس. جول بويى دۇكەندەگى الگى جاعدايدى قايتا-قايتا ەسىنە الىپ, ىشتەي مىرس-مىرس كۇلگەن سەيفوللا قويعا ءتۇس اۋا جەتىپتى. سونادايدان ونى كورگەن قويشى الدىنان جۇگىرىپ شىعادى. ساكەڭ اتتان ءتۇسىپ, امانداسىپ بولعان سوڭ, قورجىنداعى اراقتىڭ بىرەۋىن قويشىعا ۇستاتىپ, «اشىپ, ستاكانعا قۇيا بەر» دەيدى عوي. ەكى كۇن تاۋدا جاتقان قويشى دا وسى ءساتتى قاتتى كۇتسە كەرەك, اپىل-عۇپىل تىسىمەن اراقتى اشىپ جىبەرىپ, ستاكانعا تولتىرا كۇيادى. اتتىڭ تارتپاسىن بوساتىپ جاتقان سەيفوللا اتامىز اناعان «الدىمەن ءوزىڭ تارتىپ جىبەر» دەيدى. ستاكاندى باسىنا ءبىر-اق كوتەرگەن قويشى كوزى باقىرايىپ تۇرىپ قالىپتى. سويتسە, شيشانىڭ ىشىندەگى اراق ەمەس, كادىمگى سۋ ەكەن. جاپاتارماعاي ەكىنشى شيشانى اشادى. ول دا سۋ. «ءاپ, بالەم, سلامباي... باسە, ەكى شيشا اراقتى قالاي عانا تەگىن بەرە سالدى دەپ ەدىم, قاتىرعان ەكەن عوي» دەگەن سەيفوللا اتامىز سىلق ەتىپ وتىرا كەتىپتى. سويتسە سەيفوللانىڭ جىلان ۇستاپ ايتەۋىر, دۇكەنگە ءبىر باس سۇعاتىنىن سەزگەن سلامباي اتامىز ەكى شيشاعا سۋ قۇيىپ, اۋزىن قولمەن بەكىتىپ, ارنايى دايىنداپ قويعان ەكەن. «ءسويتىپ, سلامباي اتاڭ مەنى قاتىرعان, ەكى كۇن بويى تاۋدا بوقتاپ جاتتىم», دەپ سەيفوللا اتامىز مەنى كورگەن سايىن جىر قىپ ايتىپ بەرەتىن.
ول قاي ناتاشا؟!
ءبىر جاڭا جىل مەرەكەسىنىڭ قارساڭىندا سلامباي اتا, ول كىسىنىڭ جۇبايى ءماريا اپا جانە مەنىڭ اكەم ءابدىراش ۇشەۋى تورعاي جاققا ساپارلاپ بارادى. ول كەزدە ءىنىسى ەسىلدىڭ بويىندا تۇراتىن. شۋ ستانساسىنان تۇسكەن بۇلار ءارى قاراي باسقا پويىزعا وتىرۋى كەرەك. پەرروندا پويىز كۇتىپ وتىرعاندا ءماريا اپامنىڭ ويىنا ءبىر قۋلىق كەلە قالادى. ماريا اپامىز ورىس مەكتەبىن بىتىرگەن, ءبىر كىسىدەي ورىسشا ساۋاتى بار. سول جەردەن ءبىر «وتكرىتكا» ساتىپ الىپ, ناتاشا دەگەن قىزدىڭ اتىنان سەيفوللاعا قۇتتىقتاۋ جىبەرەدى. جاڭا جىلمەن قۇتتىقتاي وتىرىپ, سەيفوللادان بالاسى بار ەكەنىن, بالاسى تۋرا وزىنە ۇقسايتىنىن, جاسى جەتىگە كەلىپ قالعانىن جۇقالاپ جەتكىزەدى عوي. ول جىلدارى سەيفوللا اتامىز اۋىلدان قالاعا قاتىناپ, ۇلكەن زاۋىتتا جۇمىس ىستەيتىن.
ارادا ءبىر اپتا وتكەندە كوكەمدەر تورعايدان ورالادى. ول كەزدە كوكەم كولحوزدا ساناقشى, جۇمىس بابىمەن ءار ۇيگە كىرەدى. سودان تاڭەرتەڭ سەيفوللا اتامىزدىڭ ۇيىنە باس سۇعادى. بالاسى, كەمپىرى ۇشەۋى شاي ءىشىپ وتىر ەكەن, «كەل-كەل, جوعارى شىق» دەپ ساكەڭ بايەك بولا كەتەدى. شاي ۇستىندە بايقايدى, ۇشەۋىنىڭ دە كوڭىل كۇيلەرى جوق, ءبىر-ءبىرىن جاقتىرماي وتىر. ءتىپتى, كەمپىرى اتامىزعا تەرىس قاراپ وتىرعان كورىنەدى. سوعان قاراعاندا ۇيدە ءبىر ۇرىس-كەرىس بولعانى انىق. شايدان كەيىن اپامىز ساماۋرىندى كوتەرىپ سىرتقا, بالاسى باسقا بولمەگە كەتەدى. وسى كەزدە سەيفوللا اتامىز تەرەڭ ءبىر كۇرسىنگەن كورىنەدى. سوندا اكەم تۇك بىلمەگەنسىپ «كوكە, نە بولدى, قاتتى كۇرسىندىڭىز عوي؟..», دەپ سۇرايدى عوي. سوندا سەيفوللا اتامىز «مىنا ءبىر ناتاشا دەگەن بىرەۋ بالە بولدى, بالاڭ بار دەپ حات جازىپتى. قاي ناتاشا ەكەنىن ەسىمە ەش تۇسىرە المادىم. جۇمىستاعى اناۋ قىز با دەپ قويامىن... سودان بەرى ۇيدە بەرەكە جوق, كۇندە ۇرىس-كەرىس. بالا ءجۇر قىرىن قاراپ, اپاڭ ءجۇر تەرىس قاراپ... اتاڭا نالەت, ول قاي ناتاشا بولدى ەكەن, ءا؟» دەپ بۇرقىلداي جونەلىپتى.
«سەيفوللا كوكەمنىڭ ۇيىنەن كۇلكىدەن جارىلاتىن بولىپ ارەڭ شىقتىم» دەپ ايتىپ ءجۇرۋشى ەدى وسى وقيعانى كوكەم مارقۇم.
ورالحان ءداۋىت.
وڭتۇستىك قازاقستان وبلىسى.
شىمشىما شۋماقتار
جوققا جۇيرىك جەتپەيدى,
بار جوعالىپ كەتپەيدى.
كيىمدەرى قىتايدىڭ
بازاردا تۇر, وتپەيدى.
* * *
قالادان دا, دالادان,
دۇڭك-دۇڭك دابىل قاعادى.
ەستىسە دە ەستىمەي,
ەمەكسىتتى جوعارى.
ءباتۋاسىز باعانى,
تارتىپكە كىم سالادى!؟
انتيمونوپولياڭىزدىڭ,
تاۋسىلعان با, امالى.
اكىمدەرگە ايتقانمەن,
شاراپاتى شامالى.
ولاردىڭ دا بار دەيدى
بىلەتىندەر تاماعى.
* * *
قاتقان قاقپىش,
تابىس تاپقىش.
ءوزى مەرگەن,
ءوزى اتقىش.
جامان جەرى,
جالا جاپقىش.
* * *
كۇنى تۇسسە ق ۇلىڭ,
كۇنىڭ تۇسسە ءپىرىڭ.
جەتكەرگەن ابدىرەي ۇلى.
قىزىلوردا وبلىسى.
_______________
ءمۇيىستى جۇرگىزەتىن
بەرىك سادىر
