ەكىنشى رەت وتكىزىلىپ وتىرعان ءىس-شاراعا قالاداعى تۋريزم سالاسىنا قىزمەت ەتىپ جۇرگەن 16 ءدامحانا قاتىستى. ولار ءوز مازىرىندەگى تاعامدارىن قالا اكىمىنىڭ ورىنباسارى تاجىبەك قالمان ۇلى باستاعان كوميسسيا مۇشەلەرى مەن قوناقتارعا ۇسىندى. ءدامدى تاعامداردىڭ ساپاسى مەن قۇنارلىعى, بەزەندىرىلۋى سىندى تالاپتار سارالانىپ, ناتيجەسىندە, "ديادورا" كافەسى باس جۇلدەگە, "ەدەم", "شاڭىراق", "ۋاق", "ينديرا", "مانساردا" سىندى ءدامحانالار جۇلدەلى ورىندارعا يە بولدى. سايكەسىنشە ولارعا سىي-سياپاتتار بەرىلدى. سونىمەن قاتار, تۇركىستان قالاسىنىڭ تۋريزم الەۋەتىن دامىتىپ جۇرگەن تۋروپەراتورلار مەن تۋراگەنتتىكتەر دە ماراپاتتالدى. اتالعان شارانى, جىل سايىن مەرەكە قارساڭىندا وتكىزۋ جوسپارلانعان.
تاعامدار فەستيۆالى كەسەنە اۋماعىندا بوي كوتەرگەن ەتنواۋىلدا جالعاسىپ, كەلۋشىلەر ورناتىلعان كيىز ۇيلەر مەن كونتسەرتتىك شارانى تاماشالادى. تاجىبەك قالمان ۇلى ەلىمىزدىڭ الماتى, اتىراۋ, اقتاۋ, تاراز سىندى قالالارىنان كەلگەن تۋروپەراتورلار مەن تۋراگەنتتىك وكىلدەرىنە تۋريستەر كەلگەن جاعدايدا, كۇتىپ الۋعا دايىن ەكەنىن جەتكىزدى. سونىمەن قاتار, "Amazing Turkistan" تۋريستەرگە ارنالعان جۇيەسى تۋرالى كەڭىنەن اقپارات بەرىلىپ, قولداۋ كورسەتىلەتىنى ايتىلدى.
تۇركىستان وبلىسى
