ەلدىڭ دەنساۋلىق ساقتاۋ مينيسترلىگىنىڭ مالىمەتى بويىنشا وتكەن تاۋلىكتە ىندەت 1039 ۇندىستاندىقتىڭ ءومىرىن جالمادى. پاندەميا باستالعالى
95 542 ازاماتىنان ايرىلعان بۇل ەل اۋرۋ جۇقتىرۋدان اقش-تان كەيىنگى ورىندا تۇر.
ءۇندىستان بيلىگى كۆي-مەن كۇرەسكە بارىن سالعانىمەن, تىنىش زاماننىڭ وزىندە كەدەيى كوپ, سانيتارلىق نورمالار ساقتالا بەرمەيتىن ەل اۋرۋدان كوز اشار ەمەس. وسى كۇنگە دەيىن جالپى 6 074 702 ادام ىندەت جۇقتىرعان.
* * *
ارگەنتينانىڭ دەنساۋلىق ساقتاۋ مينيسترلىگى ءبىر تاۋلىكتە 8 مىڭنان اسا ادامنىڭ اۋرۋ جۇقتىرعانىن حابارلادى.
دالىرەك ايتقاندا, 8 841 ادام دىمكاس. وسىلايشا, ەلدە ىندەتتىڭ ىلمەگىنە ىلىككەندەردىڭ جالپى سانى 711 325 جاندى قۇراپ وتىر. ءبىر تاۋلىكتە 206 پاتسيەنتتىڭ دەمى تاۋسىلىپ, قۇرباندار سانى 15 479 ادامعا جەتتى. بۇرىن ارگەنتينادا ءبىر كۇندە 11 مىڭ ۆيرۋس جۇقتىرۋ جاعدايى تىركەلگەن كۇن دە بولعان.
جالپى, لاتىن امەريكاسىندا COVID-19 قارقىنى وتە قاتتى. بىرنەشە ايدىڭ جۇزىندە پاندەميا كورسەتكىشى بويىنشا الەمدە ەكىنشى ورىندا كەلگەن برازيليانىڭ دا وسى قۇرلىقتان ەكەنىن ەسكە سالا كەتەيىك.
* * *
كولۋمبيا COVID-19-بەن كۇرەستە ءدىڭ جاسۋشالارىن قولدانباقشى.
ەلدىڭ دەنساۋلىق ساقتاۋ مينيسترلىگى كۆي-مەن كۇرەسكە ءدىڭ جاسۋشالارىن پايدالانۋ تاجىريبەسىن قولعا العانىن جازدى. ەپيدەميولوگ سانتياگو سالداررياگي «پاتسيەنتتەر اراسىنان 40 ناۋقاستى ىرىكتەپ الىپ, ولاردىڭ 20-سىنا ءدىڭ جاسۋشالارىن قولدانۋ ارقىلى ەم جۇرگىزىلىپ, قالعان 20-سىندا ادەتتەگى تەراپيا قولدانىلدى. ەكەۋىن سالىستىرا كەلە, ءدىڭ جاسۋشالارىنىڭ اجالمەن ايقاستا قانداي كۇشى بارلىعىن بىلەتىن بولامىز», دەدى.
كولۋمبيادا ءبىر كۇندە 7 018 ادام ۆيرۋس جۇقتىرعان. ىندەت باستالعالى 813 056 كولۋمبيالىقتان كوروناۆيرۋس ينفەكتسياسى انىقتالدى. كەشە 192 ادام كوز جۇمىپ, جالپى قۇرباندار سانى 25 488 جاندى قۇرادى.
* * *
ماسكەۋ مەرى سەرگەي سوبيانين مەن ماسكەۋ وبلىسىنىڭ گۋبەرناتورى اندرەي ۆوروبەۆ سوڭعى ۋاقىتتا ۆيرۋستىڭ ورشۋىنە بايلانىستى ازاماتتارعا شەكتەۋ شارالارىنىڭ ماڭىزدىلىعىن مالىمدەدى.
ماسكەۋدە دۇيسەنبىدەن باستاپ مەترو ستانسالارىندا اۋىز-مۇرىندى جاۋىپ ءجۇرۋ رەجىمىن قاداعالاۋ باستالعان. ەندى جولاۋشىلار مىندەتتى تۇردە قىزۋىن ولشەۋگە قارسىلىق تانىتپاۋى ءتيىس. 65 جاستان اسقان جانە سوزىلمالى اۋرۋلارى بار ادامدارعا ۇيلەرىندە قالىپ, بولەك تۇراتىن تۋىسقاندارمەن دە ارالاسۋدى شەكتەۋگە كەڭەس بەرىلدى. الايدا تازا اۋاعا شىعىپ تۇرۋعا ەشقانداي تىيىم جوقتىعى ايتىلعان. ال ازىق-ت ۇلىك, قاجەتتى تاۋارلار الۋدى وتباسىنىڭ جاسى كىشى مۇشەسى اتقارعانى ءجون. ءدارى-دارمەكتى, قاجەتتىلىك تۋعاندا ازىق-ت ۇلىكتى دە «قاۋىرت جەلىلەر» ارقىلى تاپسىرىسپەن الۋعا بولادى.
سوبيانين جۇمىس بەرۋشىلەرگە مۇمكىندىگىنشە ازاماتتاردى قاشىقتان جۇمىس ىستەيتىن ەتىپ, ال ولاي ەتە الماعان كۇندە بارلىق ساقتىق شارالارىن مۇقيات قاداعالاۋ قاجەتتىگىن قاداپ ايتقان. مەر سوڭعى تاۋلىكتەردە اۋرۋدىڭ ورشۋىنە الاڭداپ, جەكسەنبى كۇنى جاڭادان 2 016 اۋرۋ تىركەلگەنىن, مۇنداي جاعدايدىڭ 2 ماۋسىمنان كەيىن بولماعانىن جەتكىزگەن.
* * *
Le Monde گازەتى فرانتسۋزداردى كاتوليكتىك روجدەستۆو مەيرامى ۋاقىتىندا اۋرۋدان ساقتاۋ ءۇشىن بيلىك شەكتەۋ ەنگىزۋى ءتيىس دەپ جازدى.
باسپاسوزدەگى باعاندا 2019 جىلعى نوبەل سىيلىعىنىڭ لاۋرەاتى ەستەر ديۋفلو مەن ءۇندى-امەريكالىق زەرتتەۋشى ابحيدجيت بانەردجي وسىنداي پايىمدارىن جازعان. اسىرەسە بۇل شەكتەۋ جاسى ۇلعايعان جاندار ءۇشىن قاتاڭ ساقتالۋى ءتيىس, مۇنى بيلىكتىڭ ەسكەرگەنى ءجون دەگەن.
