ايماقتار • 28 قىركۇيەك، 2020

باتىس قازاقستاندا تۇماۋعا قارسى جاپپاي ەكپە جۇرۋدە

10 رەت كورسەتىلدى

باتىس قازاقستان وبلىستىق دەنساۋلىق ساقتاۋ باسقارماسى تۇماۋعا قارسى 67 مىڭ دوزا ۆاكتسينا ساتىپ الدى. جەرگىلىكتى بيۋدجەتتىڭ ۇنەمدەلگەن قاراجاتىنان تۇماۋعا قارسى تاعى دا 59 500 دوزا ۆاكتسينا ساتىپ الۋعا قوسىمشا ءوتىنىم بەرىلدى. بۇل شارالار وبلىس تۇرعىندارىنىڭ 20 پايىزىن ەكپەمەن قامتۋعا جەتەدى، دەپ حابارلايدى Egemen.kz.

بيىلعى 25 قىركۇيەككە دەيىن وڭىردە 33 301 ادام تۇماۋعا قارسى ۆاكتسينا الىپ ۇلگەرگەن. ولاردىڭ 80 پايىزعا جۋىعى، ياعني 5420 ادام – دەنساۋلىق ساقتاۋ سالاسىنىڭ قىزمەتكەرلەرى. سونداي-اق، ديسپانسەرلىك ەسەپتە تۇرعان 4519 بالا، سوڭعى 6 اي ىشىندە ءجيى اۋىرعان 1765 ءسابي، بالالار ۇيلەرى مەن ءتۇرلى ينتەرناتتا تاربيەلەنۋشى 270 بارا دا ەكپە العان. بۇعان قوسا قارتتار مەن مۇگەدەكتەر ۇيلەرىنىڭ 806 كليەنتى، جۇرەك-تامىر جانە تىنىس الۋ ورگاندارىنىڭ سوزىلمالى اۋرۋلارى بار 22954 ادام، ايى-كۇنى جاقىنداعان 973 جۇكتى ايەل جانە مەكتەپ وقۋشىلارى مەن مۇعالىمدەر اراسىنان 3054 ادام الدىن الا ۆاكتسينا سالدىرعان ەكەن.

- تۇماۋدىڭ ەپيدەميالىق ماۋسىمى كەزىندە وبلىس تۇرعىندارىن سانيتارلىق-ەپيدەميولوگيالىق شارالارمەن قامتاماسىز ەتۋ ماقساتىندا دەنساۋلىق ساقتاۋ باسقارماسى وبلىستىق تاۋارلار مەن قىزمەتتەرىنىڭ ساپاسىن باقىلاۋ دەپارتامەنتىمەن بىرلەسىپ "2020-2021 جج ەپيدەميولوگيالىق ماۋسىمدا تۇماۋدىڭ جانە باسقا جەدەل رەسپيراتورلى اۋرۋلاردىڭ الدىن الۋ تۋرالى" بۇيرىق شىعاردى. وسى بۇيرىققا سايكەس ەپيدەميالىق ماۋسىمدا تۇماۋدىڭ جانە باسقا جەدەل رەسپيراتورلىق اۋرۋلاردىڭ تارالۋىن بولدىرماۋ ءۇشىن ارنايى جۇمىس توبى قۇرىلدى. ەپيدەمياعا قارسى پروفيلاكتيكالىق شارالاردى قامتاماسىز ەتۋ جانە مەديتسينالىق ۇيىمداردا تۇماۋعا جانە اۋىر جەدەل رەسپيراتورلىق ينفەكتسيالارعا قاداعالاۋدى ۇيىمداستىرۋ الگوريتمدەرى بەكىتىلدى. اسىرەسە پەرزەنتحانالار مەن ءبىلىم بەرۋ مەكەمەلەرى باستى نازاردا، دەيدى وبلىستىق تاۋارلار مەن قىزمەتتەرىنىڭ ساپاسىن باقىلاۋ دەپارتامەنتىنىڭ ءباسپاسوز حاتشىسى ادەمى عيبراتقىزى.

حالىقتىڭ وسال توپتارىن تۇماۋعا قارسى ەكپەمەن قامتۋ بيىلعى 15 قىركۇيەك پەن 15 قازان ارالىعىندا جۇرگىزىلەدى. بيىل بۇل پروتسەدۋرا جىلداعىداي 1 قازاننان ەمەس، قىركۇيەكتىڭ ورتاسىنان باستالىپ وتىر. ويتكەنى ماماندار اعزانىڭ ماۋسىمدىق اۋرۋى كەزىندە دايىندالۋعا ۋاقىتى بولۋى ءۇشىن ەرتەرەك باستاۋعا شەشىم قابىلداعان. اكتسيا كوروناۆيرۋستىق ينفەكتسيانىڭ جاڭا تولقىنىنىڭ پايدا بولۋىن بولدىرماۋعا باعىتتالعان.

ايتا كەتەيىك، باتىس قازاقستان وبلىستىق دەنساۋلىق ساقتاۋ باسقارماسىنىڭ باستىعى بولاتبەك كايۋپوۆ ورالدا العاشقىلاردىڭ ءبىرى بولىپ ەكپە الدى.

 

باتىس قازاقستان

سوڭعى جاڭالىقتار

ۇقساس جاڭالىقتار