ايماقتار • 24 قىركۇيەك، 2020

اقسايدا سپورت مۋزەيى بار

112 رەت كورسەتىلدى

باتىس قازاقستان وبلىسىنداعى ءبورلى اۋدانىنىڭ ورتالىعى اقساي قالاسىندا جاقىندا سپورت مۋزەيى اشىلعان ەدى. قازىردىڭ وزىندە جاڭا مۋزەيدىڭ حابارى سپورتسۇيەر قاۋىمدى ەلەڭدەتىپ، وزىنە تارتىپ جاتىر، - دەپ حابارلايدى Egemen.kz.

"مۋزەي اشۋ يدەياسى العاش رەت 2018 جىلى اۋداندىق بالالار-جاسوسپىرىمدەر سپورت مەكتەبىنىڭ 50 جىلدىق مەرەيتويىن وتكىزگەن ۋاقىتتا تۋعان بولاتىن. سودان بەرى قولدا بار اقپاراتپەن قاتار، سپورت ارداگەرلەرى، سالا ماماندارىمەن اقىلداسىپ، قۇندى جادىگەر، قۇجاتتار جيناقتاي باستادىق. سپورت مۋزەيى اشىلماس بۇرىن ءبورلى اۋداندىق ولكەتانۋ مۇراجايىندا 2 اپتا بويى سپورت اپتالىعى ءوتتى. جاس سپورتشىلار ءۇشىن سپورت سالاسىن قامتيتىن مۋزەيدىڭ قاجەت ەكەندىگىن سول كەزدە تۇسىنگەن ەدىك"، - دەيدى ءبورلى اۋداندىق دەنە شىنىقتىرۋ جانە سپورت ءبولىمىنىڭ باسشىسى ارمات يسانوۆ.

قاراشىعاناق سپورت كەشەنىندە ورنالاسقان مۋزەي بولمەسىندە قازىردىڭ وزىندە 7 ەكسپوزيتسيا بار. مۇندا ەرەكشە قۇندى جادىگەرلەر اراسىندا ايەلدەر كۇرەسىنەن ريو وليمپياداسىنىڭ قولا جۇلدەگەرى، اقسايلىق ەكاتەرينا لاريونوۆانىڭ كۇرەس كوستيۋمى، سامبودان ازيا چەمپيونى تەمىرلان كولباەۆتىڭ "سامبوۆكاسى"، پارا-تاەكۆوندودان ەۆروپا چەمپيونى، ازيانىڭ 3 دۇركىن قولا جۇلدەگەرى مالىك مۇقاشەۆتىڭ كيمونوسى، ت.ب. زاتتار قويىلعان. ءبىر قىزىعى، "اقسايدا سپورت مۋزەيى اشىلدى" دەگەن حاباردى ەستىگەلى الىس-جاقىننان حابارلاسىپ، اۋداننىڭ سپورت تاريحىنا قاتىستى قىزىقتى اقپاراتپەن بولىسكەندەر، كونە جادىگەرلەردى تابىس ەتكىسى كەلەتىندەر كوبەيىپتى.

ءيا، اۋداننىڭ سپورت سالاسىنداعى جەتىستىكتەرى از ەمەس. مۋزەيدە جەرگىلىكتى سپورتشىلارىنىڭ جەتىستىكتەرى، وسى وڭىردە دۇنيەگە كەلىپ، سپورت جولىن وسى جەردە باستاعان، كەيىن وزگە جاققا، ءتىپتى شەتەلگە قونىس اۋدارىپ كەتكەن سپورتشىلار تۋرالى، سپورت سالاسىندا ەڭبەك ەتكەن سالا ماماندارى، سپورت ارداگەرلەرى مەن سپورت سالاسىنداعى ەلەۋلى وقيعالارى قامتىلعان. 1968 جىلى اشىلعان سپورت مەكتەبىنىڭ العاشقى جاتتىقتىرۋشىلارى، سپورتشىلاردىڭ جەتىستىكتەرى، اۋداندا وتكەن ءىرى سپورتتىق جارىستار، اۋدان قۇراما كومانداسىنىڭ جەتىستىكتەرى، اۋدانعا كەلگەن وليمپيادا جەڭىمپازدارى تۋرالى جانە سپورت ءبولىمىنىڭ، سپورت مەكتەبىنىڭ باسشىلارى تۋرالى اقپاراتتار كوز تارتادى.

"سپورت – بالالار مەن جاسوسپىرىمدەردى پاتريوتتىق تاربيەگە، سالاۋاتتى ومىرگە شاقىراتىن ەرەكشە الەم عوي. سوندىقتان وسى مۋزەيدىڭ الەۋەتىن ءبىز اۋدانداعى بالالار تاربيەسىندە، ءبىلىم جۇيەسىندە تولىق پايدالانعىمىز كەلەدى. كارانتين جويىلىپ، ءداستۇرلى ءبىلىم جۇيەسى قالىپقا كەلسە، اۋدان مەكتەپتەرىنىڭ وقۋشىلارى ءۇشىن مۋزەيگە تۇراقتى ەكسكۋرسيا ۇيىمداستىرعىمىز كەلەدى"، - دەيدى ارمات يسانوۆ.

 

سوڭعى جاڭالىقتار

ۇقساس جاڭالىقتار