ايماقتار • 24 قىركۇيەك، 2020

اقتوبە وبلىسىندا كاسىپ اشقىسى كەلگەندەر 140 ميلليون تەڭگەگە قايتارىمسىز گرانت الدى

264 رەت كورسەتىلدى

جەكە كاسىپتەرىن اشۋعا ىقىلاستى بولعانىمەن، اينالىمعا جىبەرەتىن قارجىسى جوق  اقتوبەلىك ءبىر توپ ازامات "بيزنەستىڭ جول كارتاسى-2025" باعدارلاماسى اياسىندا 140 ميلليون تەڭگە سوماسىندا قايتارىمسىز گرانت الدى، دەپ حابارلايدى Egemen.kz.

شىلدە ايىندا  وبلىستىق كاسىپكەرلىك باسقارماسى جەرگىلىكتى اقپارات قۇرالدارى مەن الەۋمەتتىك جەلىلەردە  كونكۋرس شارتىن جاريالاعان كۇننەن باستاپ، كوميسسياعا  قىركۇيەكتىڭ ورتاسىنا دەيىن  204 بيزنەس-جوبا ۇسىنىلدى. وتكەن اپتادا  قۇرامىنا   جوعارى وقۋ ورىندارى وقىتۋشىلارى،  اقپارات قۇرالدارى وكىلدەرى، كاسىپكەرلەر كىرگەن 11 ادامنان تۇراتىن كونكۋرستىق كوميسسيا  جوبا اۆتورلارى ۇسىنعان بەينەروليكتەرمەن تانىستى. سودان كەيىن كوميسسيا مۇشەلەرى الدىندا جوبالارىن  ونلاين رەجيمدە قورعاپ شىقتى.  

اقتوبە وبلىستىق كاسىپكەرلىك باسقارماسىنىڭ باسشىسى نۇرحان تىلەۋمۇراتوۆتىڭ  حابارلاۋىنشا،  «بيزنەستىڭ جول كارتاسى-2025»  باعدارلاماسى بويىنشا بەرىلەتىن   گرانت سوماسى بيىل ەكى ەسەگە ۇلعايعان. ماسەلەن، بىلتىر وسى باعدارلاماعا اقتوبە وبلىسىندا  63 ميلليون تەڭگە بولىنسە، بيىل كاسىپكەرلىكتى قولداۋ 140 ميلليون تەڭگەگە  ارتا تۇسكەن.

كوميسسيا قاراۋىنا كەلىپ تۇسكەن  بيىلعى 204 جوبانىڭ 85 پايىزىن اۋىل تۇرعىندارى ۇسىندى.  ونىڭ ىشىندە جيھاز جاساۋ،  اۋىل شارۋاشىلىعى ونىمدەرىن وڭدەۋ، جىلىجاي سالۋ، اۆتوكولىك جوندەۋ، قۇرىلىس شەگەسىن جاسايتىن ءوندىرىس اشۋ، تىگىن شەبەرحاناسىن قۇرۋ، تاماق ونىمدەرىن جاساۋ، تۇرمىستىق قالدىقتاردى كومەتىن پوليگون سالۋ  جوبالارى  ماقۇلداندى. اۋىل كاسىپكەرلىگىن دامىتۋعا نيەت بىلدىرگەن 6 كوپ بالالى انا، 29 جاسقا دەيىنگى 12 ازامات  جوبالارىن ءساتتى قورعاپ شىقتى. وسى جولى  ۇسىنىلعان جوبا سانى مەن  كاسىپكەرلىكپەن اينالىسۋعا بەلسەندىلىك تانىتۋى جاعىنان  ايتەكە بي، شالقار اۋداندارىنىڭ تۇرعىندارى ەرەكشەلەندى. ماقۇلدانعان ءاربىر  جوباعا بولىنگەن بيىلعى  گرانت سوماسى ءارتۇرلى.  ەڭ تومەنگىسى  1 ميلليون 200 مىڭ تەڭگەدەن باستالىپ، جوبانىڭ  اۋقىمدىلىعىنا قاراي  2 ميلليوننان  5 ميلليون تەڭگەگە دەيىن وسكەن.

بۇل جولى  كاسىپكەرلىكپەن اينالىسۋعا نيەت بىلدىرگەن 170 تۇرعىن قايتارىمسىز گرانتقا قول جەتكىزە المادى. ال،  ماقۇلدانعان ءاربىر جوبا بويىنشا بولىنگەن قارجىنىڭ ماقساتتى جۇمسالۋىن  قاداعالايتىن جانە كاسىپكەرلەرگە جۇمىستى ۇيىمداستىرۋعا كومەكتەسەتىن بيزنەس-جەتەكشى بەكىتىلدى.

 

سوڭعى جاڭالىقتار

ۇقساس جاڭالىقتار