ەكولوگيا • 19 قىركۇيەك، 2020

ماۋلەن اشىمباەۆ “World cleanup Day" اكتسياسىنا قاتىستى

بۇگىن پارلامەنت سەناتىنىڭ توراعاسى ماۋلەن اشىمباەۆ "World clean up day" – "بۇكىلالەمدىك تازالىق كۇنى" اكتسياسىنا قاتىستى، دەپ حابارلايدى Egemen.kz.

Egemen Qazaqstan

"پرەزيدەنتىمىز جولداۋدا ەكولوگيالىق دامۋ ەلىمىز ءۇشىن الدىڭعى كەزەكتە تۇرعان باسىمدىق ەكەنىن اتاپ كورسەتتى. سوعان سايكەس مەملەكەتتىك ورگاندارعا، پارلامەنتكە، قوعامدىق ينستيتۋتتارعا ناقتى مىندەتتەر جۇكتەلدى. سونىڭ اياسىندا جىل سوڭىنا دەيىن ەلىمىزدە ەكولوگيالىق كودەكس قابىلدانادى. بۇل قۇجات ەكولوگياعا قاتىستى باسقا دا زاڭدار سياقتى الدىمەن ازاماتتىق قوعام وكىلدەرىنىڭ قاتىسۋىمەن تالقىلانىپ، پىسىقتالادى. وسى اپتادا سەنات ەرەكشە قورعالاتىن تابيعي اۋماقتارعا قاتىستى زاڭ قابىلدادى. بۇل قۇجات پايدالانىلماي بوس جاتقان جەرلەردى ىلە-الاتاۋى تابيعي پاركى مەن بۋراباي ۇلتتىق پاركىنىڭ قۇرامىنا قايتارۋعا مۇمكىندىك بەرەدى. جالپى الداعى بەس جىلدا مەملەكەت باسشىسىنىڭ تاپسىرماسى بويىنشا ەلىمىزدەگى ورمان القاپتارىندا 2 ميلليارد، ەلدىمەكەندەردە 15 ميلليون اعاش وتىرعىزۋ جوسپارلانىپ وتىر"، دەدى ماۋلەن اشىمباەۆ.

وسى رەتتە ول بۇگىنگى اكتسيانى پرەزيدەنت باستاماسىنىڭ العاشقى ناتيجەسى رەتىندە قاراستىرۋعا بولاتىنىن ايتىپ ءوتتى.

"وسىنداي كوگالداندىرۋ جۇمىستارىنىڭ بەرەرى مول. "World clean up day" سياقتى اكتسيالاردىڭ بۇكىل الەم ءۇشىن ماڭىزى زور. قازىرگى تاڭدا ەكولوگيالىق ماسەلە بۇكىل الەمدى الاڭداتىپ وتىر. جەر بەتىندە كوپتەگەن تابيعي ورىندار، ورماندار مەن وزەن-كولدەر ادامداردىڭ سالعىرتتىعىنان زارداپ شەگۋدە. بۇل دابىل قاعارلىق جايت ەكەنىن اتقىم كەلەدى. ءبىزدىڭ ەلىمىزدە دە وسى سالادا ماسەلە از ەمەس. سوندىقتان ءبارىمىز جۇدىرىقتاي جۇمىلىپ، وسىنداي يگى باستامالارعا بەلسەندى تۇردە اتسالىسۋىمىز كەرەك"، – دەدى ول.

ايتا كەتەيىك، جىل سايىن 19 قىركۇيەك كۇنى بۇكىل الەمدە "World cleanup Day" اكتسياسى وتەدى. ميلليونداعان ادام قوعامدىق ورىنداردى قوقىستان تازارتۋ ءۇشىن سەنبىلىككە شىعادى. بىلتىر اكتسيا 169 ەلدىڭ ازاماتتارىن بىرىكتىردى. بيىل اتالعان اكتسيا قازاقستاندا ەكولوگيا، گەولوگيا جانە تابيعي رەسۋرستار مينيسترلىگىنىڭ ۇيىمداستىرۋىمەن ءوتىپ جاتىر. ەلوردادا وتكەن سەنبىلىككە بىرقاتار سەنات جانە ءماجىلىس دەپۋتاتى، ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ، نۇر-سۇلتان قالاسىنىڭ اكىمى التاي كولگىنوۆ، قوعام قايراتكەرلەرى جانە ۆولونتەرلەر قاتىستى.

اتالعان اكتسيا بۇگىن ەلىمىزدىڭ بارلىق وڭىرىندە وتەدى. ەرىكتىلەر، بەلسەندىلەر، قوعام وكىلدەرى تابيعي اۋماقتاردى قوقىستان تازارتىپ، اعاش وتىرعىزادى. قاتىسۋشىلارعا قاجەتتى جابدىقتار بەرىلەدى.