بيزنەس • 16 قىركۇيەك، 2020

جاس كاسىپكەرلەر قايتارىمسىز گرانتتار يەلەندى

164 رەت كورسەتىلدى

ۇلتتىق ناقىشتاعى تۇرمىستىق بۇيىمدار جاساۋ، مال شارۋاشىلىعىن دامىتۋ، مۇمكىندىگى شەكتەۋلى بالالاردى ساۋىقتىرۋ،  ىشكى ءتۋريزمدى دامىتۋ، قولونەر – ساندىك بۇيىمى،  ەلىمىزدىڭ كيەلى جەرلەرىنە  تۋريستىك مارشرۋتتار ۇيىمداستىرۋ جوبالارىن ۇسىنعان اقتوبەلىك 16 جاس كاسىپكەر اقتوبە وبلىسى اكىمىنىڭ گرانتىنا يە بولدى، دەپ حابارلايدى Egemen.kz

بيىلعى كوكتەمدە وبلىستىق كاسىپكەرلىك باسقارماسى ءوز ءىسىن اشۋعا قۇلشىنىسى بار  جاستاردى قولداۋعا باعىتتالعان جوبانى قارجىلاندىرۋعا كونكۋرس جاريالاعاندا،  جارتى جىلدىڭ ىشىندە اقتوبە قالاسى مەن اۋداندارىنان 78 جوبا كەلىپ تۇسكەن.  تۇسكەن جۇمىستاردى  كاسىپكەرلەر، دەپۋتاتتار مەن اقپارات قۇرالدارى وكىلدەرىنەن قۇرالعان كوميسسيا سوڭعى ەكى اپتادان بەرى تىڭعىلىقتى قاراپ، اراسىنان 16 جوبانى ۇزدىك دەپ تانىدى. ناتيجەسىندە،  "اۋىلدى كوركەيتۋ"، "مادەنيەت جانە بوس ۋاقىتتى دۇرىس ۇيىمداستىرۋ"، "وتباسىلىق قۇندىلىقتار جانە ءداستۇر"، ء"بىلىم بەرۋدىڭ كىشى جوبالارى"، "سالاۋاتتى ءومىر سالتىن ۇستانۋ"، "ەكولوگيا جانە اباتتاندىرۋ"، "تۋريزم" باعىتتارى بويىنشا اقتوبە قالاسىنان -5، اۋدانداردان 11 جوبا وزىق دەپ تانىلدى. سونىڭ ىشىندە بايعانين اۋدانىنان – 4، حرومتاۋ اۋدانىنان – 2،  قوبدا، مۇعالجار، ايتەكە بي، تەمىر، مارتوك اۋداندارىنان ءبىر-ءبىر جوبادان ماقۇلداندى.  ەندى جوبا اۆتورلارىنىڭ  ارقايسىسى 1 ميلليون 200 مىڭ تەڭگەدەن باستاپ 2 ميلليون تەڭگەگە دەيىنگى ارالىقتا  گرانتقا يە بولدى.   

1

وبلىستا تۇڭعىش رەت ۇيىمداستىرىلعان كونكۋرس جەڭىمپازدارىن ماراپاتتاعان وبلىس اكىمى وڭداسىن ورازالين بولاشاق كاسىپكەرلەردىڭ باستامالارىنا ساتتىلىك تىلەي وتىرىپ، بيىك ناتيجەلەرگە تەك جاڭا ءبىلىم يگەرۋ مەن  شەبەرلىكتى شىڭداۋ، تىنىمسىز ەڭبەك ارقىلى قول جەتكىزۋگە بولاتىنىن اتاپ ءوتتى.

سوڭعى جاڭالىقتار

ۇقساس جاڭالىقتار